ءبىز كەشە «استانا-كوگالداندىرۋ قۇرىلىسى» اق قىزمەتكەرلەرىمەن بىرگە ەلوردا كوشەلەرىنە گۇل وتىرعىزۋ جۇمىسىنا قاتىسىپ قايتتىق.
مامىر ايى تۋىسىمەن قالا كوشەلەرىنىڭ جايناپ شىعا كەلەتىن جىلداعى ادەتى بار. ەلوردانىڭ ءىشى-سىرتى قالى كىلەمدەي قۇلپىرىپ, گۇلورداعا اينالا باستايدى. بىرنەشە جىلدان بەرى استانا كوشەلەرىنىڭ ۇزاتىلعان قىزدىڭ جاساۋىنداي جايناپ تۇرعانىنا جانار ۇيرەتىپ الدىق. كورگەن كوز سۇيسىنەدى. سامالاداي شاھاردىڭ سامال جەلىنە قىزىلدى-جاسىلدى وسىمدىكتەردىڭ ءيىسى قوسىلىپ, ساف اۋاسىن سىيلاۋدا. ادەمىلىككە ءسۇيسىنۋ – زاڭدىلىق. دەسەك تە, سول سۇلۋلىقتىڭ ءوزى وڭاي كەلمەيتىنىن جانە ايتۋىمىز كەرەك. استانانىڭ سۇلۋلىعىن ايداي الەمگە ايشىقتاپ تۇرعان جاسىل مايسا مەن وسىمدىكتەردى ءوسىرىپ, باپتاۋدىڭ ءوز ماشاقاتى جەتكىلىكتى.
باسقاسىن ايتپاعاندا, ولاردى ينفەكتسيالىق اۋرۋدان باستاپ, باسقا دا زيانكەستەردەن امان ساقتاۋ ءۇشىن جۇزدەگەن ادام كوز ىلمەيدى. تۇبىمەن توپىراققا وتىرعىزىپ, ولاردىڭ گۇلدەگەنىن كورمەيىنشە دامىل تاپپايدى. وعان باعباندارمەن بىرگە كوشەگە گۇل وتىرعىزۋ جۇمىسىنا بارعان كەزدە كوز جەتكىزدىك.
مەكەمەنىڭ 80-نەن استام قىزمەتكەرى كۇن سايىن تاڭعى ساعات التىدان باستاپ كوگالداندىرۋ جۇمىسىنا كىرىسەدى. بيىلعى جوسپار بويىنشا باعباندار قالاداعى 151 127 شارشى مەتر اۋماقتى گۇلزارعا اينالدىرامىز دەپ وتىر. كاسىپورىن جىلىجايلارىندا شىرايگۇل, ەسىنەك, تاگەتيس, سالۆيا, بەگونيا سىندى گۇلدەردىڭ 54 ءتۇرى ءوسىرىلدى. كوگالداندىرۋ ماماندارىنىڭ ايتۋىنشا, بيىلعى جىلى بۇل گۇلدەردىڭ قاتارىنا گۇلدەردىڭ جاڭا تۇرلەرى قوسىلىپتى. اتاپ ايتساق, ولار – شىرماۋىقگۇل, باقىتگۇل, تەگەۋرىنگۇل, بوزوت, ابريەتا, گەيحەرا, پينەتسەتۋم دەپ اتالاتىن كوپجىلدىق وسىمدىكتەر.
ادەتتە, ماماندار جىل سايىن گۇل وتىرعىزۋ ناۋقانىن مامىردا باستاپ, قالا كۇنىنە ساناۋلى كۇن قالعاندا اياقتايتىن. بيىل ولار ماۋسىم ايىنىڭ اياعىنا دەيىن وتىرعىزىپ بولامىز دەپ وتىر. بۇل مەجەگە جەتۋگە ەش كەدەرگى جوق. جەرسىندىرىلەتىن گۇلدەر دايىن. وعان قوسا قىس كەزىندە كاسىپورىننىڭ لاندشافتىق جوبالاۋ شەبەرحاناسىنىڭ ماماندارى گۇلدەستەلەردىڭ جوباسىن ازىرلەپ قويعان.
بۇگىندە «اقوردا», «قازاق ەلى» الاڭدارى مەن «شابىت» شىعارماشىلىق سارايى, «ستۋدەنتتەر» ساياباعى مەن قالالىق اكىمدىك, «اباي» ەسكەرتكىشىنىڭ اۋماعى كوك مايسامەن كومكەرىلدى. بۇعان قوسا, استانا كوشەلەرى كوپكە گۇل مۇسىندەرمەن دە بەلگىلى. جاسىل جەلەكتەن جاسالعان 25 ءمۇسىننىڭ العاشقىلارى قويىلا باستادى. سول جاعالاۋداعى گۇلدەن توقىلعان «كيىز ءۇي», «قىز بەن جىگىت», «تۇيەلەر» سىندى مۇسىندەردىڭ تاماشالاۋشىلارى تابىلدى.
اينۇر شوشاەۆا
