اۋىت مۇقيبەكتىڭ «جاس جۇرەك جايىپ ساۋساعىن», «قالقاتايعا قاراي-قاراي تالدى كوز», «ءمولدىر», «الپامىس تەكتى ۇل», «ۇلىلىق پەن ماڭگىلىك», «راياننىڭ ولەڭدەرى» اتتى جىر جيناقتارى مەن «كوش, كوشكە كىم ءوش؟!», «زاڭ تۇزەلدى, قانداسىم, سەن دە تۇزەل!», «ورالمان ەمەس, قانداسپىز!» اتتى پۋبليتسيستيكالىق كىتاپتارى جارىق كورگەن. قازىر ول «نۇر وتان» پارتياسى ورتالىق اپپاراتىندا قىزمەت ىستەيدى. وسى ورايدا ءبىز اقىن, بەلسەندى ازاماتپەن جۇزدەسىپ,اڭگىمەلەسكەن ەدىك.
– اۋىت مۇقيبەكۇلى, اتامەكەنگە كەلگەنىڭىزگە جيىرما جىلدان اسىپتى. قىتايدا تۋىپ, سوندا ءوستىڭىز. قازاقستان دەگەن ءسوزدى العاش قاشان, كىمنەن ەستىدىڭىز, سوندا قانداي اسەردە بولدىڭىز؟
– «قازاقستان» دەگەن سوزدەن بۇرىن «الماتى» دەگەن ءسوزدى ءبىرىنشى رەت ەستىگەن سەكىلدىمىن. مەن مالشى وتباسىندا دۇنيەگە كەلدىم. ءوزىمىز ىلە قازاق اۆتونوميالى وبلىسىنا قاراستى بولعانىمىزبەن, قىستا مالدى بۇراتالا موڭعول اۆتونوميالىق وبلىسىنا وتارلاتىپ بارىپ, قىستايتىنبىز. سەبەبى, ول جاققا قار جۇقا تۇسەدى. قىس بويى تاۋدىڭ قۋىسىندا, تاستان قالانعان توشالادا جالعىز ءۇي وتىرامىز. باسقا مالشىلارمەن ارامىز الىس بولادى. اينالاسىن قوجىر-قوجىر قارا تاستار قورشاعان قىستاۋ مەن ءۇشىن تىم قورقىنىشتى, سۇركەيلى كورىنەدى. بىراق بىرتە-بىرتە كوزىڭ ۇيرەنىپ, ۇيرەنىسىپ كەتەسىڭ. كەلىمدى-كەتىمدى كىسى جوقتىڭ قاسى. ون ءبىر جاسىمدا مەكتەپكە باردىم. مەن ەس بىلگەننەن باستاپ, مەكتەپكە بارعانعا دەيىن وسىنداي كوشپەلى ءومىردى كورىپ ءوستىم. ءبىزدىڭ ءۇيدىڭ ەڭ باعالى جانە ەڭ قاستەرلى جالعىز دۇنيەسى بولدى. ول – بىلعارىمەن قاپتالعان راديوقابىلداعىش ەدى. كوشىپ-قونعاندا سىندىرىپ الماۋ ءۇشىن, ساۋىت اعام قالىڭ توننىڭ ىشىنەن ونى موينىنا اسىپ الاتىن.
سول راديوقابىلداعىشتى قوسىپ, ۇلكەندەر اۋا رايى تۋرالى مالىمەتتى تىڭدايدى. ساڭقىلداعان قوڭىر داۋىستى ادامنىڭ «سويلەپ تۇرعان الماتى!» نەمەسە «الماتىدان سويلەپ تۇرمىز!» دەگەن سوزدەرى مەنىڭ قۇلاعىمدا قالىپتى. سوسىن, دىنمۇحامەد قوناەۆتىڭ اتى كوپ اتالاتىن. اكەم «بۇل دا قازاقتىڭ ءبىر مىقتىسى عوي» دەپ, قوناەۆ تۋرالى ايتىپ وتىراتىن.
كەيىن بىلدىك قوي, الماتى – قازاقستاننىڭ استاناسى, ماناعى قوڭىر داۋىستى كىسى اتاقتى ديكتور انۋاربەك بايجانباەۆ ەكەن. قۇدايعا مىڭ تاۋبە, سول الماتىعا تابانىمىز ءتيدى, ون ءتورت جىل سول قالادا ءومىر ءسۇردىم.
– ءسىز سوندا وقۋ ءبىتىرىپ, اۋەلى مۇعالىم, كەيىن مەكتەپ ديرەكتورى بولىپ جۇرگەندە اۋىلىڭىزعا جاڭا مەكتەپ سالدىرىپسىز. وسىنشاما ءتاپ-ءتاۋىر قىزمەت اتقارا ءجۇرىپ, وتانعا ورالۋىڭىزعا نە سەبەپ بولدى؟
– مەن ينستيتۋتتا وقىپ جۇرگەندە قازاقستان تاۋەلسىزدىك الدى. وعان دەيىن بالتىق جاعالاۋىنداعى ەلدەردىڭ جانە بىرنەشە رەسپۋبليكالاردىڭ كەڭەس وداعى قۇرامىنان ءبولىنىپ شىعىپ جاتقانىن ەستىپ جاتتىق. بۇكىل ەسىل-دەرتىمىز – قازاقستاننىڭ تاۋەلسىزدىگىن جاريالاۋى بولدى, اسىعا كۇتتىك. اقىرى ارمانىمىز ورىندالدى. قۋانىشتى حاباردى «ازاتتىق» راديوسىنان, حاسەن ورالتاي اعامىزدىڭ اۋزىنان ەستىپ, توبەمىز كوككە جەتكەندەي قۋاندىق. كۋرستاستار باس قوسىپ, قازاقستانعا كەتۋگە ۋاعدالاستىق.
جاڭا جىل قارساڭىندا تۇڭعىش پرەزيدەنت «شالقار» راديوسىندا ءوزى سويلەپ, شەتتەگى قازاقتاردى جاڭا جىلمەن قۇتتىقتاپ, «الىستا جۇرگەن اعايىندارعا اق تىلەك» دەگەن اتاقتى ۇندەۋىن جولدادى. سول تاريحي ۇندەۋىندە «قىمباتتى وتانداستار! ەجەلگى اتامەكەنىنەن جىراقتاپ قالعان سىزدەردى كەشەگى كۇنگە دەيىن اتا-بابا جەرىنە قايتىپ كەلە الامىز با دەگەن سۇراقتىڭ الاڭداتىپ كەلگەنىن مەن جاقسى بىلەمىن. تۋعان جەردىڭ ءتۇتىنى دە ىستىق دەيدى حالقىمىز. قانداس باۋىرلارىمىزدى بايىرعى اتا قونىسىنا تارتۋ ماقساتىندا ادام پراۆوسى تۋرالى ەلارالىق ەرەجەلەردى باسشىلىققا الا وتىرىپ, قازاقستان ۇكىمەتى «باسقا رەسپۋبليكالاردان جانە شەتەلدەردەن سەلولىق جەرلەردە جۇمىس ىستەۋگە تىلەك ءبىلدىرۋشى بايىرعى ۇلت ادامدارىن قازاقستاندا قونىستاندىرۋ ءتارتىبى مەن شارتتارى تۋرالى» ارنايى قاۋلى قابىلدادى. سوندىقتان اتامەكەنگە كەلەمىن دەۋشى اعايىندارعا جول اشىق. اتا-بابا ارۋاعى الدارىڭىزدان جارىلقاسىن!» دەپ, اعىنان جارىلىپ, اق باتاسىن بەردى نۇرسۇلتان نازارباەۆ.
كوپ وتپەي, ۇرىمجىدەن جازۋشى جاقسىلىق
ءساميتۇلى, تاريحشى تۇرسىنحان زاكەن, ارميابەك ساعىندىقۇلى, عالىم قاليبەكۇلى باستاعان ءتورت وتباسىنىڭ قازاقستانعا كوشكەلى جاتقانى تۋرالى حابار شىقتى. بۇل ءتورت جازۋشىنىڭ كوشى ءبىزدىڭ لاۋلاپ تۇرعان سەزىمىمىزگە ماي قۇيدى, ودان ارى جالىنداتتى.
سۇيىكتى قازاقستانىمىزعا جەتسەك دەگەننەن باسقا وي دا, ارمان دا بولعان جوق. ول كەزدە بىردەن كەتە قالۋ قيىن, شاقىرۋ الدىرىپ, تولقۇجات راسىمدەۋىمىز كەرەك. ودان ارى ۆيزا اشتىرۋ بار. سول بىتكەنشە, ەشتەڭەگە زاۋقىمىز سوقپاي, سەندەلدىك تە قالدىق.
شەكارادان ءوتىپ, قاسيەتتى قازاق جەرىنە تابانىمىز تيگەندە ازاتتىقتىڭ اۋاسىن قۇشىرلانا جۇتتىق. تاۋەلسىز وتانعا, ونىڭ تۇڭعىش پرەزيدەنتىنە دەگەن سول ماحاببات, سول سەنىم ءبىزدىڭ جۇرەگىمىزدە سول كۇيىندە قالدى.
ءسويتىپ, توقسانىنشى جىلداردىڭ باسىندا ينستيتۋتتا بىرگە وقىعان, قازاقستانعا كەتەمىز دەپ ۋاعدالاسقان كۋرستاستارىمنان ەكەۋمىز عانا اتاجۇرتقا ورالدىق. ونىڭ ءبىرى – مەن, ەكىنشىسى –جاڭىل سماعۇلقىزى. ەكەۋمىز دە نۇر-سۇلتان قالاسىندا تۇرامىز.
الەمدەگى قازاقتىڭ جالعىز وتانى – قازاقستان. قازاقتىڭ ودان باسقا بارار جەرى, باسار تاۋى, پاناسى جوق. ءبىزدى مۇندا ايداپ اكەلگەن كۇش– تاۋەلسىزدىك! ءبىز – اتاجۇرتقا ەلباسىنىڭ اق باتاسىمەن ورالعان قازاقپىز!
– ءسىزدى تانيتىن كىسىلەر قازاق پوەزياسىنىڭ كورنەكتى وكىلى – تۇمانباي مولداعاليەۆپەن جاقىن ارالاسىپ, ءتىپتى, سول كىسىنىڭ «بالاسى» بولدى دەگەندى ايتادى. اقىن باسقارعان «بالدىرعان» جۋرنالىندا ەڭبەك ەتتىڭىز, جالپى, تۇمانباي اعا تۋرالى نە ايتاسىز؟
– ءيا, جۇرت جاقسى بىلەدى, مەن قازاقستانعا تۇماعانى پانا تۇتىپ كەلدىم. مەنىڭ تۇمانباي مولداعاليەۆتى پانا تۇتىپ كەلۋىم – ءبىر جاس جىگىتتىڭ قازاقتىڭ ماڭدايعا باسقان تارلان اقىنىن جاي ىزدەپ كەلە سالۋى ەمەس ەدى. بۇل كەلۋدىڭ اتادان بالاعا جالعاسقان وزگەشە سالت نەمەسە عاجايىپ ءداستۇر ەكەنىن باسا ايتقىم كەلەدى. ءتىپتى, باعا جەتپەس قۇندىلىق دەپ تە ايتۋعا بولادى.
قاراڭىز, «كەڭەس وداعى» دەيتىن وكتەم يمپەريانىڭ تەكپىسىمەن قازاقستانداعى ءوزىنىڭ بايىرعى مەكەنىندە وتىرعان قازاقتار 1916, 1928, 1932 جىلدارى لەك-لەگىمەن ءۇش رەت شەتەلگە قونىس اۋدارۋعا ءماجبۇر بولدى. سونىڭ باسىم بولىگى قىتاي جاققا اۋدى.
سەبەبى, وندا قاسيەتتى قازاق جەرىنىڭ ءبىر قۇت قونعان قۇيقالى ءوڭىرى جاتىر. وندا مەكەندەپ وتىرعان بايىرعى ەل, بەرەكەسى كەتپەگەن قازاقتار بار.
ءبىر ەلدەن ەكىنشى ەلگە بارىپ ىرگە تەبۋ, ءسىڭىسىپ كەتۋ وڭاي ەمەس. بىراق, شەكارا بۇزىپ وتكەن قارعا تامىرلى قازاققا ونشا قيىن دا بولعان جوق. ءار ەلدىڭ ءجون بىلەتىن, حالقىنا ءسوزى وتەتىن تۇلعالارى بولادى. قازاق – «جانىم – ارىمنىڭ ساداعاسى!» دەگەن ۇستانىمداعى حالىق. ەلدىڭ نامىسى مەن ارى سول بي-بولىستاردىڭ تۋرا شەشىمىنە, جاساعان ارەكەتىنە قاراي ولشەنەدى. بەرگى بەتتەن اۋعان كوشتى باستاعان تۇلعالار ونداعى وزدەرى سەكىلدى ەل اعالارىن ىزدەدى, تاپتى, سويلەستى. ءبىزدىڭ ەل تىزگىنىن ۇستاعان اتالارىمىز باس بولىپ, الىستان پانا تۇتىپ كەلگەن باۋىرلارىن قاندالاعا تالاتپاي, ايدالاعا قاراتپاي, باۋىرىنا باسا ءبىلدى. وسىلايشا, ەلگە ەل قوسىلىپ, ارى قاراي قىز الىسىپ, قىز بەرىسىپ, بەرەكەلى حالىققا اينالدى.
بەرگى بەتتەن اۋىپ بارعان كەشەگى ەلدىڭ جەتىسۋ مەن بارقىتبەلدىڭ ارعى بەتىنە كوپ قيىندىق كورمەي, تەز ءسىڭىپ كەتۋىنىڭ سىرى وسىندا جاتىر.
ال سول ەلدىڭ ەلۋىنشى-الپىسىنشى جىلدارداعى كوشتەن قالعان جارتىسىنا جۋىعى سۇيرەتىلىپ ءالى سول ءۇش ايماقتا (التاي, ىلە, تارباعاتايدا) جاتىر.
ءسوزدىڭ توقەتەرىن ايتسام, تاۋەلسىز قازاقستانعا ورالعاندا, مەن دە التى الاشتىڭ تۇماعاسىن كەشەگى بابالار جولىمەن, قازاقى داستۇرمەن ىزدەپ كەلگەن جىگىتپىن.
مىنە, بۇل – ءومىردىڭ قايتالانىپ وتىراتىن فيلوسوفياسى.
تۇمانباي اقىن مەنى بەتىمنەن قاققان جوق. قايتا, ءوز بالالارىنان كەم كورمەي, اكە-شەشەم ورىنداپ ۇلگەرمەي كەتكەن پارىزدى كۇلتاي تاتەم ەكەۋى اتقاردى. قاسىنان ءبىر ءسات تاستاماي ەرتىپ ءجۇردى. ءوزى بارعان جەردىڭ بارىنە ەرتىپ باردى. جاقسى مەن جايساڭنىڭ ءبىرازىنا تانىستىردى. گۇلبايان اتتى سۇلۋ قىزعا قۇدا ءتۇسىپ, ءبىر جىلقىسىن سويىپ, ۇيلەندىردى. قاشان ومىردەن وزعانشا, «اۋىتىمنىڭ جۇرگەن جەرى – بەرەكە!» دەپ, ماڭدايىمنان سيپاپ ءوتتى جارىقتىق…
– جۇرتشىلىق ءسىزدى قانداستاردىڭ جاناشىرى دەپ بىلەدى. ءبىر جىلدارى ەپتەپ سايابىرسىپ قالعان قازاق كوشىنىڭ جاندانۋىنا ۇلەس قوستىڭىز, وسى باعىتتاعى قابىلدانعان زاڭدار مەن نورماتيۆتىك قۇجاتتارعا وزگەرىستەر مەن تولىقتىرۋلار ەنگىزۋگە ىقپال ەتتىڭىز. ايتىڭىزشى, قازاق كوشىنىڭ الداعى تاعدىرى نە بولادى؟
– مەن وپتيميست اداممىن. ءومىردىڭ جارىق جاعىن تەز كورەم, جاعىمدى تۇسىن كوبىرەك ايتام. باردى جوق دەپ, اۋىزدى قۋ شوپپەن سۇرتە بەرەتىندەردى اسا ۇناتا بەرمەيمىن.
ال سۇراعىڭىزعا كەلسەك, قۇدايعا شۇكىر, ەلىمىزدە كوشى-قون ساياساتى بار. بۇل ساياسات قازاقستان تاۋەلسىزدىگىن جاريالاۋدان, اتاپ ايتسام, 1991 جىلعى 18 قاراشادا جولعا قويىلعان. سوندىقتان «نۇرسۇلتان نازارباەۆ دەگەندە, ول كىسىنىڭ جاڭا مەملەكەت قۇرۋ تاريحىندا كوشى-قون ساياساتى ءبىرىنشى كەزەكتە ايتىلۋ كەرەك!» دەگەن ءسوزدى مەن ءجيى-ءجيى قايتالاپ وتىرام. ەلباسىنىڭ ءوزى دە ءار جينالىس سايىن «تاعدىردىڭ جازۋىمەن الەمنىڭ ءار تۇكپىرىنە تارىداي شاشىراپ كەتكەن ءبىر ميلليوننان استام قانداسىمىزدى ەلگە قايتاردىق» دەپ ماقتانىشپەن ايتادى.
سونداي-اق ەلباسى Nur Otan پارتياسىنىڭ كەزەكتەن تىس وتكەن حح سەزىندە «كەلەمىز دەگەن ازاماتتاردىڭ بارلىعىن قازاقستان قۇشاق جايىپ قارسى الادى, مۇمكىندىگىنشە كومەكتەسەدى» دەپ, بۇل ساياساتقا تاعى توقتالدى.
ال پرەزيدەنت قاسىم-جومارت توقاەۆ «دۇنيەجۇزىندەگى قانداستارىمىزدىڭ باسىن تۋعان جەردە بىرىكتىرۋ – ءبىزدىڭ قاسيەتتى پارىزىمىز» دەپ وتىر. جاڭا پرەزيدەنتتىڭ پارمەنىمەن «ورالمان» اتاۋى «قانداس» دەپ وزگەرتىلدى. ءبىز بۇل وزگەرىستى ەرەكشە كۋانىشپەن قابىلدادىق…
قىسقاسى, وسى باعىتتاعى زاڭدار مەن نورماتيۆتىك قۇجاتتار ءبىرشاما دۇرىستالدى. كورىپ وتىرعانىڭىزداي, كوشى-قون ساياساتى كۇن تارتىبىنەن تۇسكەن جوق. ونىڭ ۇستىنە, كورشى ەلدەردە جۇرگىزىلگەن ساياسي قىسىم شەتتەگى قانداستارىمىزدىڭ كوزىن اشتى, تاۋەلسىز وتانىنىڭ قادىرىن ابدەن بىلگىزدى.
قازىرگى پاندەمياعا بايلانىستى شەكارالار جابىق. سول سەبەپتى, كوش سايابىرلاپ قالدى. بۇل – ۋاقىتشا نارسە. كارانتين اياقتالسا, ولار قوتارىلا كوشۋگە دايىن. اللا قالاسا, قازاق كوشىنىڭ ەكىنشى «التىن ءداۋىرى» باستالادى.
مەملەكەتتىڭ قاۋىپسىزدىگى جاعىنان الساق, كوشى-قون ساياساتىنىڭ ماڭىزى كۇن ساناپ ارتۋدا. شەكارالىق ايماقتار بوس قالىپ جاتىر. ەڭبەككۇش تاپشى. ونىڭ ۇستىنە, شەتەلگە قونىس اۋدارۋشىلار وتە كوپ. ەلباسى نۇرسۇلتان ءابىشۇلىنىڭ «بىرەۋدىڭ قازاقستاننان باسقا ەلگە كوشكەنىن ەستىگەن ساتتەردە مەنى ۋايىم باسادى» دەگەن ءسوزىن ەستىدىك. وتە اۋىر ءسوز. مەملەكەت بولىپ ويلاناتىن ماسەلە. سول ۋايىمنان ايىقتىراتىن جالعىز جول – شەتتەگى قانداستارىمىزدى اتامەكەنگە كوپتەپ ورالتۋ. سول ارقىلى كوشىپ كەتكەندەردىڭ ورنىن ەسەلەپ جابۋىمىزعا بولادى. باسقا جول جوق!
ول ءۇشىن مەملەكەت كوشى-قون ساياساتىنا تىڭ رەفورما جاساپ, «قازاق دياسپوراسىن مەملەكەتتىك قولداۋ تۋرالى» زاڭ جوباسى مەن شەتەلدەگى قازاقتاردى جانە ەرىكتى قونىس اۋدارۋدى قولداۋدىڭ ۇزاق مەرزىمگە ارنالعان مەملەكەتتىك باعدارلاماسىن تەزىرەك جاساپ, بەكىتۋى قاجەت.
– «نۇر-وتان» پارتياسى ۇيىمداستىرعان پرايمەريزگە قاتىستىڭىز, مۇندا قانداي ماسەلەنى كوتەردىڭىز, ەل سەنىمىنىڭ ۇدەسىنەن شىقتىم دەپ ويلايسىز با؟
– Nur Otan پارتياسى تۇڭعىش رەت پرايمەريز وتكىزدى. ەلىمىزدىڭ سايلاۋ جۇيەسىندەگى جارقىن جاڭالىق رەتىندە قابىلداپ, قۋانا-قۋانا قاتىستىم. مەنىمەن بىرگە وننان اسا قانداس ازامات باق سىنادى. قولداپ, ءتورت-بەس ماقالا دا جازدىم. داۋ جوق, Nur Otan پارتياسى پرايمەريز ارقىلى تولىمدى دەپۋتات تاڭدادى, مەملەكەتتىك باعدارلاما جاساپ بەردى, حالىقتىڭ ساياسي مادەنيەتىن كوتەردى.اسىرەسە, جاستاردىڭ پوتەنتسيالىن سىنادى, ساياساتقا دەگەن قىزىعۋشىلىعىن قاتتى وياتتى, نە ويلايتىنىن كورسەتتى…
الماتى وبلىسىنىڭ
ەڭبەكشىقازاق اۋدانىن تاڭداعام. ونداعى ماقساتىم, اتالعان اۋداندا, جوعارىدا ايتقان, 1916, 1928, 1932, 1960 جىلدارداعى ارى كوش, بەرى كوشتە ءبولىنىپ-
جارىلعان قازاقتاردىڭ ۇرپاعى كوپ. بيلىك تۇتقاسىن ۇستاپ وتىرعاندار دا – سولاردىڭ نەمەرە-شوبەرەلەرى. ەكى ەلدە قالىپ, ەڭىرەگەن تاعدىرلاردى قۇلاعىمەن ەستىپ, كوزىمەن كورگەن ازاماتتار كوشى-قون ماسەلەسىمەن اينالىسىپ, قازاقتىڭ باسىن قوسۋعا قۇلشىنىپ جۇرگەن مەنى تەرەڭ تۇسىنەدى, جابىلا قولدايدى عوي دەپ ويلاعام.
وكىنىشكە قاراي, 434 داۋىس الىپ, ءماجىلىس سايلاۋىنا قاتىساتىن كانديداتتاردىڭ تىزىمىنە ىلىنە المادىم. پارتيانىڭ ىشكى تارتىبىنە ساي, پرايمەريزدەن وتپەگەن ۇمىتكەر ورتالىق پارتيالىق كۆوتاعا الىنبايدى ەكەن.
شەتتەن ورالعان ازاماتتاردىڭ ءبارىنىڭ تومەن داۋىس الۋىنا Nur Otan پارتياسىڭ قۇرامىندا شەتتەن كەلگەن قانداستارىمىزدىڭ ازدىعى, ءتىپتى جوقتىعى ەڭ باستى سەبەپ بولدى. ايتپەسە, جارىسقا تۇسكەن ازاماتتاردىڭ كوبى قوعامدا وزىندىك ورنى بار, دەپۋتاتتىققا لايىق تۇلعالار ەدى.
ءوزىڭىز بىلەسىز, مەن 2015 جىلدان بەرى ماجىلىستەگى جۇمىس توبىنا قاتىسىپ, ۇسىنىستار بەرىپ كەلەم. كوشى-قون زاڭىن زەرتتەپ ءجۇرىپ, قانداستارىمىزدىڭ تەز قۇجاتتانۋىنا باستى كەدەرگى بولىپ كەلگەن ءبىر ماسەلەنى بايقادىم. ول – باسى ارتىق انىقتامالار تالاپ ەتۋ. بۇل نورما قاعازباستىلىق پەن جەمقورلىققا اپارىپ سوقتىرادى.
«حالىقتىڭ كوشى-قون تۋرالى» زاڭىن وسى انىقتاما تالاپ ەتەتىن نورمالاردان ارىلتىپ ەدىك, تۇراقتى تىركەۋگە تۇرۋ مەن ازاماتتىق الۋداعى كەدەرگىلەر جوق بولدى.
بۇل – قازاقستان زاڭدارىنا دەندەپ كىرىپ العان ورتاق دەرت. سونىڭ كەسىرىنەن كاسىپكەرلىك سالاسى دا دامي الماي وتىر.
دەپۋتات بولعىم كەلگەندەگى ءبىر ماقساتىم – زاڭنامالارداعى وسى ماسەلەنى شەشۋگە اتسالىسۋ, كومەكتەسۋ بولاتىن. تاجىريبەلى مامان,قانداستارىمىزدىڭ وكىلى رەتىندە وسى ساياساتپەن بەلسەنە اينالىسىپ ءجۇرىپ, ءبىر نارسەنى بايقادىم: نەگىزى, ماجىلىستە شەتتەن ورالعان اعايىنداردان دا ءبىر-ەكى دەپۋتات بولۋى ابدەن كەرەك ەكەن.
ءبىز قالاساق تا, قالاماساق تا, شەكارادان ءوتىپ, قاشان قۇجاتتانىپ, جاڭا ورتاعا ءسىڭىسىپ بولعانشا, قانداستارىمىزدىڭ ءبىر ۇلكەن الەۋمەتتىك توپ ەكەنى داۋسىز. ولاردىڭ جاعدايىن بىلەتىن, ءتىلىن تاباتىن لاۋازىمدى تۇلعالار كەرەك!
مىنە, كەلەسى جىلى قازاق كوشىنىڭ باستالعانىنا وتىز جىل تولادى. قازاقستان رەسپۋبليكاسى پارلامەنتىنىڭ تاريحىندا شەتتەن ورالعان قازاقتاردان بىردە-ءبىر ءماجىلىس دەپۋتاتى بولىپ كورمەپتى…
