ەلوردا تورىندەگى «اتامەكەن» قازاقستان كارتاسى» ەتنو-مەموريالدىق كەشەنى ءبىر كۇندە 13 يگى شارانىڭ باسىن قوسقان «جىل باسى – ناۋرىز» اتتى مەرەكەلىك توي-دۋمان وتكىزبەك. ۇلتتىق مادەنيەتىمىزدى ءارى ناسيحاتتايتىن, ءارى دارىپتەيتىن شارا 22 ناۋرىز كۇنى ساعات 11.00-دە باستالىپ 18.00-گە دەيىن جالعاساتىن بولادى.
ۇلىستىڭ ۇلى كۇنىنە وراي وتەتىن تاعىلىمدى شارانىڭ باعدارلاماسىنا «ەڭ ءدامدى ناۋرىز-كوجە», «ەڭ ءدامدى بال قىمىز», «ەڭ ءتاتتى باۋىرساق», «ەڭ ءدامدى ساماۋرىن ءشايى», «اق تىلەك, ناۋرىز باتا», «ۇلتتىق بي», «ناۋرىز مەيرامى» تۋرالى اقىندار ايتىسى, «كيىم ءپىرى-كيمەشەك», «بۇرىمدى قىز», «اتالار ءسوزى – اقىلدىڭ كوزى» ماقال-ماتەلدەر, «ناۋرىز-شۋاق» بالالاردىڭ سۋرەت سالۋ جانە «اتادان قالعان ۇلى مۇرا» قول ونەر جانە «سپورت ويىندارى» بايقاۋلارى ەنىپ وتىر. بۇل بايقاۋلارعا ءوز ونەرى مەن شەبەرلىگىن كورسەتەمىن دەۋشىلەر قاتىسا الادى. ال قاتىسىپ كوزگە تۇسكەن ۇجىمدار مەن جەكەلەگەن ازاماتتار باعالى سىيلىقتارمەن جانە ماقتاۋ قاعازدارىمەن ماراپاتتالاتىن بولادى. ولاي بولسا, «اتامەكەن» قازاقستان كارتاسى» ەتنو-مەموريالدىق كەشەنىندە وتەتىن تاعىلىمدى توي-دۋماننان تابىلايىق, اعايىن.
