جاقىندا ەلوردانىڭ رەسپۋبليكاعا تارالاتىن «استانا اقشامى» گازەتىندە «جارناما جايىندا جانايقاي» دەگەن ماقالا جارىق كوردى. ماقالانىڭ ماقساتى بىرەۋدى مۇقاتۋ نەمەسە تىرناق استىنان كىر ىزدەۋ ەمەس. رەداكتسيا پوشتاسىنا كەلىپ تۇسكەن جارنامالىق ماتىنگە بايلانىستى قازىرگى قوعامدا قالىپتاسىپ وتىرعان قازاق ءتىلىنىڭ مۇشكىل, شالاجانسار جاي-كۇيىنە كوپشىلىكتىڭ نازارىن اۋدارتۋ. ءتىلىمىزدى كەلەكە, مازاق قىلاتىن مۇنداي ماتىندەر قاي جەردە, قاي قالادا بولسا دا ۇلتتىق نامىسىمىزعا, قازاقي بولمىسىمىزعا تيەتىن ۇلكەن سىن ەكەنىن اشىق ايتۋ ەدى.
بىزگە وسى ماقالاعا وراي نۇر-سۇلتان قالاسىنىڭ تىلدەردى دامىتۋ جانە ارحيۆ ءىسى باسقارماسى قازىرگى ىستەلىپ جاتقان جۇمىستارى مەن قازاق ءتىلىنىڭ كەڭىنەن قولدانىسقا يە بولۋىنا قولبايلاۋ بولىپ, كەدەرگى كەلتىرىپ وتىرعان جايلاردى اشىق ايتىپ, جاۋاپ جازىپتى.
تىلدەردى دامىتۋ جانە ارحيۆ ءىسى باسقارماسى ءوز وكىلەتتىگى اياسىندا بار مۇمكىندىكتى پايدالانىپ جۇمىس جۇرگىزىپ جاتىر. الايدا 2018 جىلى كاسىپكەرلىك كودەكستەن جەرگىلىكتى اتقارۋشى ورگانداردىڭ باقىلاۋ, تەكسەرۋ وكىلەتىن الىپ تاستاعالى بيزنەس, شاعىن جانە ورتا كاسىپ وكىلدەرى قازاقستان رەسپۋبليكاسىنداعى مەملەكەتتىك ءتىل زاڭىنىڭ تالاپتارىن اياقاستى ەتەتىن بولدى. وعان نۇر-سۇلتان قالاسىنىڭ جانە ەلىمىزدىڭ وزگە دە شاھارلارىنىڭ كوشەلەرىندەگى تەك ورىس تىلىندە جازىلعان تومەندەگى جازۋلار مەن قاتەلەر ايعاق.
ەگەر بۇلاي كەتە بەرەتىن بولسا, ەندى ءبىر-ەكى جىلدا باس شاھار كوشەلەرىندەگى ماڭدايشا جازۋلارى مەن جارناما ماتىندەرىنىڭ ءتىلى تۇگەلىمەن ورىس تىلىنە اۋىسىپ كەتۋى ابدەن مۇمكىن. كورنەكى جارناما بىلاي تۇرسىن, وتىز جىلدان بەرى مەيرامحانا مەن اسحانا ءمازىرىن دە مەملەكەتتىك تىلگە كوشىرە المادىق قوي. تاماق ىشەتىندەردىڭ دەنى – قازاقتار. ويتكەنى جەرگىلىكتى اكىمدىكتەر مەن ءتىل باسقارمالارىنان كاسىپكەرلەردىڭ ءتىل تۋرالى زاڭ تالاپتارىنىڭ ورىندالۋىن باقىلاۋ قۇزىرەتى الىنىپ تاستالعان.
مۇنداي مەملەكەتتىك ءتىلدىڭ كەگەجەسىن كەيىن تارتاتىن ءجونسىز قادامعا قازاقستان رەسپۋبليكاسىنىڭ ۇكىمەتى مەن پارلامەنتى قالاي جول بەرىپ قويعان دەگەن وي مازالايدى. مەملەكەتتىك ءتىلدىڭ جايىن ايتىپ كۇن سايىن تەبىنىپ وتىراتىن دەپۋتاتتار مۇنى بىلمەي مە؟
مەملەكەتتىكتىڭ ەڭ باستى بەلگىسى – ءتىل. ءتىلى دامىماعان, ءتىلى وركەندەمەگەن ۇلتتىڭ بولاشاعى بۇلىڭعىر ەكەنى بەسەنەدەن بەلگىلى. ولاي بولسا الداعى ۋاقىتتا قازاقستان رەسپۋبليكاسىنداعى ءتىل, جارناما, كاسىپكەرلىك تۋرالى زاڭدارعا قازاق ءتىلىنىڭ مارتەبەسىن كوتەرىپ, قولدانىس اياسىن كەڭەيتەتىن وزگەرىستەر مەن تولىقتىرۋلار ەنگىزۋ كەرەكتىگى كەزەك كۇتتىرمەيتىن ماسەلە ەكەنىن باسا ايتقىمىز كەلەدى.
