پارلامەنت ماجىلىسىندە ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆتىڭ قاتىسۋىمەن «اتاۋلى الەۋمەتتىك كومەك سالاسىنداعى مەملەكەتتىك ساياساتتى ىسكە اسىرۋدىڭ تيىمدىلىگى» تاقىرىبىندا ۇكىمەت ساعاتى ءوتتى. ونىڭ بارىسىندا مينيستر دەپۋتاتتار مەن باق وكىلدەرىنە ااك بەرۋدىڭ جاڭا تەتىكتەرى تۋرالى ەگجەي-تەگجەيلى ايتىپ بەردى.
اتاۋلى الەۋمەتتىك كومەك جۇيەسىن دامىتۋ پەرسپەكتيۆالارىنا توقتالعان مينيستر 2 قىركۇيەكتەگى مەملەكەت باسشىسىنىڭ قازاقستان حالقىنا جولداۋىندا قر ۇكىمەتىنە ااك ءبولۋ تەتىكتەرىن, ونىڭ اشىقتىعىن, ادىلەتتىلىگىن جانە جۇمىسقا ىنتالاندىرۋىن قامتاماسىز ەتۋ, سونداي-اق تابىسى از وتباسىلاردىڭ بالالارىنا كەپىلدەندىرىلگەن الەۋمەتتىك توپتامانى ەنگىزۋ تۋرالى تاپسىرما بەرگەنىن ەسكە سالدى. ونىڭ باستى باعىتى – ەڭبەككە ىنتالاندىرۋ, ازاماتتاردىڭ تابىستارىن جانە مەملەكەتتىك قولداۋ مولشەرىن ەسەپكە الۋعا قاتىستى اشىقتىق پەن ادىلەتتىكتى قامتاماسىز ەتۋ. جاڭا زاڭ جوباسىندا كوپبالالى وتباسىلارعا مەملەكەتتىك جاردەماقىنى تابىسىنا قاراماستان تولەۋ ۇسىنىلىپ وتىر.
وسىلايشا, 2020 جىلعى 1 قاڭتاردان باستاپ زاڭ جوباسىندا كامەلەتكە تولماعان بالالارىنىڭ 4 جانە ودان دا كوپ بالالارى بار وتباسىلارعا نەمەسە ورتا ارناۋلى جانە جوعارى وقۋ ورىندارىندا ءبىلىم الىپ جاتقان جاسى 23-كە تولماعان بالالارى بار انالارعا اقى تولەۋ كوزدەلگەن. بۇل جاردەماقى وتباسىنىڭ تابىسىنا قاراماستان سارالانعان مولشەردە: 4 بالاعا – 42 496 تەڭگە, 5 بالاعا – 53127 تەڭگە, 6 بالاعا – 63 757 تەڭگە, 7 جانە ودان كوپ بالاعا 74 388 تەڭگە كولەمىندە تاعايىندالادى.
ااك ۇسىنۋدىڭ جاڭا تاسىلدەرىنە ءار توقسان سايىن اتاۋلى الەۋمەتتىك كومەك تاعايىنداۋ; ااك تاعايىنداۋدىڭ قازىرگى شەكتى ولشەمىن ساقتاۋ (وتباسىنىڭ ءار مۇشەسىنە شاققانداعى ورتاشا كىرىس كۇنكورىس دەڭگەيىنىڭ 70 پايىزىنان كەم بولۋى كەرەك); وتباسىنىڭ بارلىق مۇشەلەرى ءۇشىن ااك مولشەرىن جان باسىنا شاققانداعى كىرىستەر مەن كەدەيلىك شەگىنىڭ اراسىنداعى ايىرماشىلىق رەتىندە انىقتاۋ; ەڭبەككە قابىلەتتى ازاماتتارعا قويىلاتىن تالاپتاردى كۇشەيتۋ (ەگەر ولار جۇمىس ىستەۋدەن باس تارتسا ااك تولەۋ بۇكىل وتباسى ءۇشىن توقتاتىلادى); ۋچاسكەلىك كوميسسيالاردىڭ وسى پروتسەستەگى ءرولىنىڭ ارتۋىمەن وتباسىنىڭ ماتەريالدىق جاعدايىنا زەرتتەۋ جۇرگىزۋ مەرزىمىن 3 كۇننەن 7 كۇنگە دەيىن ۇلعايتۋ ەنگىزىلدى.
كەپىلدەندىرىلگەن الەۋمەتتىك توپتامانى ۇسىنۋ شەڭبەرىندە 1 جاستان 6 جاسقا دەيىنگى تابىسى از وتباسىلارىنىڭ بالالارىن ازىق-تۇلىك جيىنتىعىمەن جانە گيگيەنالىق قۇرالدارمەن, 6 جاستان 18 جاسقا دەيىنگى بالالاردى مەكتەپتەردە ىستىق تاماقپەن, وقۋ قۇرالدارىمەن جانە مەكتەپ كيىممەن قامتاماسىز ەتۋ ۇسىنىلادى. سونداي-اق ولارعا مەكتەپكە دەيىنگى جول ءجۇرۋ شىعىندارى وتەلەدى. مەديتسينالىق, ونىڭ ىشىندە ستوماتولوگيالىق كومەك 18 جاسقا دەيىنگى بالالارعا تەگىن مەديتسينالىق كومەكتىڭ كەپىلدىك بەرىلگەن كولەمى جانە مىندەتتى الەۋمەتتىك مەديتسينالىق ساقتاندىرۋ شەڭبەرىندە كورسەتىلەتىن بولادى.
سونىمەن قاتار, مينيستر جاڭا ااك تەتىگى ەكى تارماققا جاڭا باعىت بەرەتىن E-Halyk اقپاراتتىق جۇيەسى ارقىلى جۇزەگە اسىرىلاتىنىن اتاپ ءوتتى. بۇل جۇيە 7 ميلليونعا جۋىق قازاقستاندىق وتباسىنىڭ الەۋمەتتىك كارتاسى جاسالىپ, ولاردىڭ ءال-اۋقاتىنىڭ دەڭگەيىن انىقتاۋعا مۇمكىندىك بەرەدى.
جادىرا مۇراتبەكوۆا
