ەلوردادا بالالار مەن جاسوسپىرىمدەرگە ارنالعان اۋلا كلۋبتارىنىڭ جەلىسى دامىپ كەلەدى. بۇگىندە قالادا 23 وسىنداي ۇيىم بار, وندا 2500 وقۋشى اينالىسادى. ولار ءۇشىن 28 سپورت سەكتسياسى مەن 21 شىعارماشىلىق ۇيىرمە جۇمىس ىستەيدى.
«استانا جاستارى» جاستار رەسۋرسى ورتالىعى 2015 جىلدىڭ باسىنان اۋلا كلۋبتارىنىڭ قىزمەتىنە كۋراتور بولىپ كەلەدى. سول ۋاقىتتا قالادا 6 اۋلا كلۋبى بولسا, بۇگىندە ولاردىڭ سانى 23-كە جەتتى. 2020 جىلى «يلينكا», «كۇيگەنجار», «چۋگۋنكا», «لەسوزاۆود» جانە «كوكتال» تۇرعىن الاپتارىندا 5 جاڭا اۋلا كلۋبى اشىلدى. 2021 جىلى اۋلا كلۋبتارىنىڭ سانىن 23-تەن 28-گە, ال تاربيەلەنۋشىلەردىڭ سانىن 2500-دەن 3000-عا دەيىن ۇلعايتۋ جوسپارلانىپ وتىر» دەپ اتالىپ ءوتىلدى «استانا جاستارى» جاستار رەسۋرستىق ورتالىعىنىڭ مالىمەتىندە.
ايتا كەتەيىك, 2020 جىلدىڭ 12 اقپانىندا نۇر-سۇلتان قالالىق ءماسليحاتى «اۋلا كلۋبتارىن جاڭعىرتۋدىڭ 2023 جىلعا دەيىنگى تۇجىرىمداماسىن» بەكىتكەن. وعان سايكەس اۋلا كلۋبتارى قىزمەتىنىڭ باستى مىندەتى – ەلوردانىڭ ءتورت اۋدانىندا حالىقتىڭ الەۋمەتتىك وسال توپتارىنان تۇراتىن جاستاردى بۇقارالىق سپورتقا, شىعارماشىلىق ۇيىرمەلەرگە تارتۋ, ومىرلىك داعدىلاردى ۇيرەتۋ ارقىلى ءومىر ساپاسىن جاقسارتۋ.
