قاليبەك قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى جاڭا ححىى ماۋسىمىن اشتى.
ماۋسىماشارعا شاقىرىلعان قوناقتاردىڭ بارلىعى ەلىمىزدىڭ قايتالانباس ءبىرتۋار ونەر قايراتكەرى, ايتۋلى رەجيسسەر ءازىربايجان مامبەتوۆتىڭ 80 جىلدىعىنا ارنالعان «رەجيسسەر تاعىلىمى» اتتى دوڭگەلەك ۇستەلگە قاتىستى. القالى جيىننىڭ الدىندا قادىرمەندى ونەرسۇيەر قاۋىمعا قازاقتىڭ اتىن الەمگە تانىتۋدا ەرەن ەڭبەك سىڭىرگەن وسىناۋ تۇلعاعا ارنالعان تۇڭعىش كىتاپتىڭ تۇساۋى كەسىلدى. «رەجيسسەر مامبەتوۆ فەنومەنى» دەپ اتالعان تۋىندى اۆتورى كۇمىسبالا مولتوباروۆا كىرىسپە سوزىندە رەجيسسەردىڭ كوزى تىرىسىندە جازىلا باستاعان ەڭبەگى تۋرالى از-كەم اڭگىمەلەپ, قوناقتار تاراپىنان قويىلعان ساۋالدارعا جاۋاپ بەردى.
تەاتر جانە كينو ونەرىندە قايتالانباس ءىز قالدىرىپ, وزىندىك بەت-بەينەسىمەن ەرەكشەلەنە بىلگەن رەجيسسەردىڭ سوڭىندا قالعان ەڭبەكتەرى از ەمەس. استانا تەاترىنىڭ دەڭگەيىن كوتەرۋ جولىنداعى شىعارماشىلىق ىزدەنىسى ءوز جەمىسىن بەرىپ كەلەدى. قاللەكي تەاترىندا ول بەلسەندى قىزمەت ەتتى. قازىرگى بەلگىلى دەگەن ارتىستەردىڭ دەنى سول كەزدە ەلورداعا العاش ات باسىن تىرەگەن جاس ماماندار ەدى. قازىر الدى قازاقستانعا ەڭبەك سىڭىرگەن قايراتكەر اتاعىن يەمدەنىپ جاتقانىن ايتا كەتكەن ءجون. ەلباسىنىڭ شاقىرتۋىمەن استانانىڭ دراما تەاترىنا كوركەمدىك جەتەكشى بولعان كۇننەن باستاپ اياداي عانا ساحنانى گۇلدەي جايناتقان رەجيسسەر ش.ايتماتوۆتىڭ «انا – جەر-انا», «عاسىردان دا ۇزاق كۇن», م.اۋەزوۆتىڭ «قاراگوز», ع.مۇسىرەپوۆتىڭ «قوزى كورپەش – بايان سۇلۋ», «قىز جىبەك», ا.چەحوۆتىڭ «ۆانيا اعاي» جانە ت.ب كوپتەگەن پەسالاردى ساحنالادى. 2000 جىلى ءا.مامبەتوۆتىڭ تىكەلەي اتسالىسۋىمەن ەلوردادا وپەرا تەاترى اشىلادى. سول ونەر ورداسىنىڭ تىرناقالدىسى م.تولەباەۆتىڭ «ءبىرجان مەن سارا» وپەراسىنا دا ءوزى رەجيسسەرلىك ەتكەن. سول جىلى ول «حالىق قاھارمانى» اتاعىنا يە بولادى.
باسقوسۋعا رەجيسسەرمەن بىرگە قىزمەت ەت- كەن ارىپتەستەرى قاتىستى. ولاردىڭ قاتارىندا جارى قورلان قاليلامبەكوۆا, قازاقستاننىڭ حالىق ارتىستەرى گۇلجان اسپەتوۆا, تىلەكتەس مەيراموۆ, تەاتر سىنشىسى باۋىرجان نوگەربەك, ونەرتانۋشى وتەن احمەت, ساحنا ساڭلاقتارى ەرىك جولجاقسىنوۆ, بەكبولات قۇرمانعوجاەۆ جانە ت.ب. كوپتەگەن تەاتر جاناشىرلارى كەسەك تۇلعا جونىندە تەبىرەنە ءسوز سويلەپ, ىزگى لەبىزدەرىن ءبىلدىردى. اسەرلى كەزدەسۋدى ماۋسىماشارعا ورايلاستىرعان تەاتر ديرەكتورى ەركىن جۋاسبەك بيىلعى شىمىلدىقاشار ءا.مامبەتوۆتىڭ رەجيسسەرلىعىمەن قويىلعان «عاسىردان دا ۇزاق كۇن» سپەكتاكلىن كورۋگە شاقىردى. قويىلىمنان كەيىن رەجيسسەردىڭ رۋحىنا باعىشتالعان اس بەرىلدى. ال, مۇنداي يگىلىكتى شاراعا ارنايى ات باسىن بۇرعان مادەنيەت باسقارماسى باستىعىنىڭ ورىنباسارى سامات تەرگەمباەۆ قالا اۋقىمىندا دا مەرەيلى كەشتەر جالعاسىن تابادى دەپ ەسكەرتىپ, بۇل شارا اتالمىش باسقارمادا جوسپارلانىپ جاتقانىن ءمالىم ەتتى.
«عاسىردان دا ۇزاق كۇن» سپەكتاكلىنە رەپەتيتسيا جاساپ جاتقانبىز. سوندا مەن نەمەرەسىن جەتەكتەگەن كەمپىر بولىپ ساحنانى جارىپ وتەم. ءبىر ءجۇرىپ ءوتتىم, ازەكەڭ ماعان قارادى دا, اينالاڭا قاراشى, مىنا بۇرىشتا سەنىڭ شالىڭنىڭ زيراتى, مىنا جەردە ۇلىڭ جاتىر, مۇندا كەلىنىڭ, زال تولا سەنىڭ ەت جاقىندارىڭنىڭ مولاسى دەپ ەلەستەتشى دەدى. مەن سول ءسوزدى كوكەيىمە ءتۇيىپ, ساحناعا قايتا شىققانىمدا, ول توقتاتپادى. توقتاتپادى دەگەنىم ول مەندەگى وزگەرىستى ۇناتتى دەگەن ءسوز ەدى. وسىنداي ءبىر اۋىز سوزبەن سەنىڭ جەتكىزە الماي تۇرعان بەينەڭدى اشۋعا بار ىنتاڭدى اۋدارىپ جىبەرەتىن ەرەكشەلىگى بار ەدى» دەپ ەسكە الادى ۇستازىن شاكىرتى گۇلبارشىن قىلىشباي.
شىنار ءابىلدا
