تاياۋدا استاناداعى قاليبەك قۋانىشباەۆ اتىنداعى اكادەميالىق قازاق مۋزىكا دراما تەاترىندا تاۋەلسىزدىكتىڭ شيرەك عاسىر مەرەكەسىنە وراي قازاقستاننىڭ «اق جول» دەموكراتيالىق پارتياسىنىڭ ماڭعىستاۋ وبلىستىق فيليالى جانىنداعى «اق جول – جاستار» قاناتىنىڭ تالاپتى اۋەسقوي ارتىستەرىنىڭ سومداۋىمەن جازۋشى-دراماتۋرگ وتەن احمەتتىڭ ۇلت ۇستازى احمەت بايتۇرسىنۇلى مەن ونىڭ ادال جارى الەكساندرانىڭ ء(بادريسافا) ومىرىنەن سىر شەرتەتىن «ازاپپەن وتكەن ءومىر-اي!» اتتى درامالىق تۋىندىنى ەلوردالىقتارعا ۇسىندى.
جالپى, ومىردە احاڭنىڭ ادال جارى الەكساندرا تۋرالى كوپ ايتىلمايدى. سوندىقتان دا اياۋلى جان جايىنداعى دەرەكتەر دە سيرەك سويلەيدى. ارداقتىلاردىڭ كوزىن كورگەندەردىڭ جازىپ قالدىرۋىنشا, احمەت پەن ءبادريسافا قارقارالىدا تانىسقان. احمەت اتامىز تۇرمەگە تۇسكەندە, الەكساندرا دەگەن ورىس قىزى وعان تاماق تاسىپ, كومەك قولىن سوزادى. ۇلت ۇستازى كەيىن سەمەي تۇرمەسىنە قامالعاندا, ارتىنان ىزدەپ بارادى. اباقتىدان شىققاننان كەيىن احاڭ جانى نازىك, پەيىلى اق ورىس قىزىنىڭ ادالدىعىنا كۋا بولىپ, وعان ۇيلەنەدى. الەكساندرا مۇسىلمان ءدىنىن قابىلداپ, ەسىمىن وزگەرتەدى.
قويىلىمدا وسى وقيعالاردىڭ ءبارى نازىك شەبەرلىكپەن ورىلگەن. سونىمەن بىرگە, وتىزىنشى جىلدارداعى ەل ومىرىندەگى جاقسىلاردىڭ سوڭىنا شام الىپ ءتۇسىپ, ءبىر-ءبىرىن ساتقان قاراۋسىز پەندەلەردىڭ تىرلىگى جان اۋىرتادى. باس كەيىپكەر ءبادريسافانىڭ ءوزى قۋعىندا جۇرسە دە, ارداقتى احاڭىمەن وتكەن قىزىققا تولى شاقتاردى قامىعىپ ەسكە الادى. سوڭعى دەمى قالعانشا ادال جارىنا دەگەن ماحابباتىن وشىرمەيدى. ونىڭ رولىندە ويناعان اكتريسا دا ونىڭ تەڭىزدەي تولقىعان جان تولعانىسىن شىنايى بەينەلەيدى. سول دۇربەلەڭ ۋاقىتتاردا ءار اۋىلدا اتسىزعا ۇقساعان جاعىمسىز, ساتقىن بەينەلەردىڭ كوپ بولعانى دا جاسىرىن ەمەس. وسى ءبىر بەينە دە قويىلىمنىڭ نەگىزگى وزەگىن كوتەردى.
ارينە, سپەكتاكلدىڭ كەمشىلىكتەرى دە جوق ەمەس. كەيبىر ءرولدەردە ويناعان اكتەرلەردىڭ شەبەرلىكتەرى كەمشىن ءتۇسىپ جاتتى. بىراق ءبىز ولاردىڭ ءبارى اۋەسقوي ارتىستەر ەكەنىن ءبىلىپ, كەشىرىممەن قارادىق. اسىرەسە, بىزگە احمەت بايتۇرسىنۇلىنىڭ ءرولىن سومداعان ماڭعىستاۋ ەنەرگەتيكالىق كوللەدجىنىڭ 2-كۋرس ستۋدەنتى عازيز ىزتۇرعانوۆتىڭ, الەكساندرانىڭ جاس كەزىن بەينەلەگەن نۇرگۇل بەكتۇرسىنوۆانىڭ, الەكساندرانىڭ قارتايعانداعى شاعىن ويناعان «اق جول – جاستار» قاناتىنىڭ جەتەكشىسى ءاليا يساەۆانىڭ, اتسىزدىڭ رولىندەگى رامازان تاڭسىقباەۆتىڭ, پەريزاتتى ويناعان گۇلجاينا باقىتجانوۆانىڭ ونەرلەرى ءسۇيسىندىردى.
– «مەن كوردىم ۇزىن قايىڭ قۇلاعانىن» دەپ ۇلى اقىن اباي ايتقانداي, مەن بۇگىن تالاي كورەرمەننىڭ ىشكى اسەرىن ىركە الماي جىلاعانىن كوردىم. قاللەكي تەاترىنىڭ كيەلى ساحناسىندا قويىلعان ماڭعىستاۋ وبلىستىق «اق جول – جاستار» قاناتىنىڭ سومداۋىمەن الاش كوسەمدەرىنىڭ ءبىرى احاڭنىڭ ادال جارى ءبادريسافا (الەكساندرا) ومىرىنەن سىر شەرتكەن سپەكتاكل وسىنداي كوركەمدىك قۋاتقا جەتتى. جانرى جوق, ۋاقىتى بەلگىسىز, ادام تاعدىرى جوق, مودا سالونى بوپ كەتكەن قازىرگى كاسىپقوي تەاترلارىمىزدىڭ قويىلىمدارىمەن سالىستىرعاندا بۇل ءبىر ەرەكشە قۇبىلىس بولدى. كورەرمەندەر ادەتتەگىدەي ماسسوۆكا ەمەس ەدى, استانانىڭ ونەردى شىن سۇيەتىن تالعامپاز قاۋىمى ەدى. ارينە, مەنىڭ پەسام بويىنشا قويىلعان سپەكتاكلدىڭ وسىلايشا كورەرمەننىڭ جۇرەگىن ەلجىرەتكەنى توبەمدى كوككە ءبىر جەتكىزدى, – دەيدى دراماتۋرگ وتەن احمەت. سونداي-اق, ول كىسى قويىلىمنىڭ 8 جەلتوقسانعا بەلگىلەنۋىنىڭ سەبەبى دە جوق ەمەس, ويتكەنى وسى كۇنى احمەت بايتۇرسىنۇلىنىڭ وققا ۇشقان كۇنى ەكەنىن ايتتى.
قويىلىم سوڭىندا بەلگىلى عالىم ومىرزاق وزعانباي جاستاردىڭ تالانتىنا ريزا بولىپ, باتاسىن بەرسە, قازاقستاننىڭ «اق جول» دەموكراتيالىق پارتياسىنىڭ توراعاسى, قر پارلامەنتى ءمəجىلىسىنىڭ دەپۋتاتى ازات پەرۋاشەۆ «تاۋەلسىزدىكتىڭ 25 جىلدىعى قارساڭىندا وسىنداي درامانىڭ قويىلعانى وتە ورىندى جانە جاستاردىڭ اكتەرلىك شەبەرلىكتەرى دە كوڭىلدەن شىقتى» دەپ ىزگى لەبىزىن ءبىلدىردى.
ازامات ەسەنجول
