تەڭگەنىڭ تەگەۋرىنى السىرەسە بولدى, الىپساتار الاياقتاردىڭ قۇدايى بەرىپ قالاتىن ادەتى عوي. ولار حالىقتىڭ الاڭداۋشىلىعىن ساتىمەن پايدالانىپ, ءبىرىنشى كەزەكتە تۇتىنىلاتىن تاۋار تۇرلەرىنىڭ باعاسىن اسپانداتىپ جىبەرەدى. «جۇمىرتقادان ءجۇن قىرقىپ» ۇيرەنگەندەرگە بۇل بۇيىم ەمەس. ارينە, قالالىق اكىمدىك تە قول قۋسىرىپ قاراپ وتىرعان جوق. تەڭگە ەركىن اينالىمعا جىبەرىلگەن بويدا ازىق-تۇلىك باعاسىن تۇراقتاندىرۋ شارالارىن باستاپ تا كەتتى.
استانا اكىمىنىڭ ورىنباسارى اندرەي لۋكين باستاعان ارنايى كوميسسيا قالاداعى ساۋدا ورىندارىنداعى باعا تۇراقتىلىعىن قاداعالاۋ ماقساتىندا رەيدكە شىققان بولاتىن. ونىڭ قۇرامىندا ءباسپاسوز وكىلدەرى دە بولدى.
قالالىق كوميسسيا الدىمەن شوقان ءۋاليحانوۆ كوشەسىندە ورنالاسقان «گرين» گيپەرماركەتىنە باس سۇقتى. مۇندا قانت كەلىسى 159 تەڭگەدەن ساتىلىپ جاتسا, كۇرىشتىڭ باعاسى 189 تەڭگە شاماسىندا ەكەن. نان جانە ءسۇت ونىمدەرى دە كۇندەلىكتى نارقىنان وزگەرە قويماپتى.
– بۇل ساۋدا ورنىندا باعا تۇراقتى ەكەن. نەگىزسىز كوتەرىلىپ جاتقانى بايقالمايدى. قالالىق اكىمدىك بۇگىننەن باستاپ ساۋدا ورىندارىنداعى ءبىرىنشى كەزەكتە تۇتىنىلاتىن ازىق-تۇلىك تۇرلەرىنە ۇنەمى قاداعالاۋ جۇرگىزىپ وتىرادى. وسى ماقساتتا ارنايى شتاب قۇرىلعان. ونى ءوزىم باسقارامىن. سونداي-اق, باعاعا قاتىستى تۇرعىنداردىڭ ارىز-شاعىمدارىن دا قاراپ, تەكسەرىپ وتىرامىز. ءبىزدىڭ ماقساتىمىز – باعانىڭ نەگىزسىز وسۋىنە جول بەرمەۋ. ءدال قاي ۋاقىتقا دەيىن ەكەنىن ايتا المايمىن, ول ءازىر بەلگىسىز. بىراق قالا اكىمدىگىنىڭ ارنايى كوميسسياسى ساۋدا ورىندارىنداعى ازىق-تۇلىك باعاسىن كۇندەلىكتى وسىلاي تەكسەرىپ وتىرادى, – دەدى باق وكىلدەرىنە جەدەل سۇحبات بەرگەن ا.لۋكين.
بۇدان سوڭ رەيدكە قاتىسۋشىلار ورتالىق بازار اۋماعىنداعى «ماگنۋم» ساۋدا ۇيىنە باس سۇقتى. بۇل ساۋدا ورنىندا دا كەيبىر تاۋار تۇرلەرىنە ارنايى جەڭىلدىكتەر ءجۇرىپ جاتىر ەكەن. قالا اكىمىنىڭ ورىنباسارى الدىمەن نان باعاسىمەن تانىستى. قارا بيداي ۇنىنان پىسىرىلگەن «دەنساۋلىق» نانى 87 تەڭگە بولسا, اق بيداي ۇنىنان پىسىرىلگەن نان 56 تەڭگە شاماسىندا. كوكونىس تۇرلەرىنىڭ باعاسى دا قول جەتىمدى بولىپ شىقتى.
بۇدان سوڭ «استىقجان» ساۋدا ۇيىنە باس سۇققان توپ جاپپاي ساتىلىمنىڭ ۇستىنەن شىققانداي اسەر الدى. كىر جۋاتىن سابىندار مەن ۇنتاقتار جارتى باعاسىنا ساتىلىپ جاتسا, وسىمدىك مايىنىڭ بەس ءليترى 1300 تەڭگەدەن 1 مىڭ تەڭگەگە دەيىن ارزانداتىلىپتى. ال ەت جانە شۇجىق ونىمدەرى دە بۇرىنعى باعاسىنان 250-300 تەڭگەگە دەيىن ارزان. ساۋدا ءۇيىنىڭ اكىمگەرىنىڭ ايتۋىنشا, مۇنداي جەڭىلدىكتەر ءار ايدىڭ سوڭعى ون كۇنى بويى ۇيىمداستىرىلىپ تۇرادى ەكەن. تەڭگە ەركىن اينالىمعا جىبەرىلگەندە, ءتىپتى, كەيبىر تاۋار تۇرلەرىنىڭ باعاسى تومەندەگەن.
قالا اكىمىنىڭ ورىنباسارى ساۋدا ءۇيىنىڭ باسشىلىعىنا باعانى تۇراقتى ۇستاپ وتىرعانىنا ريزاشىلىعىن ءبىلدىردى. بىرقاتار ساۋدا جاساۋشىلارمەن سويلەسىپ, ولاردىڭ پىكىرلەرىن تىڭدادى. ساۋدا ۇيىنە كەلۋشىلەر دە وسىندا ۇنەمى ساۋدا جاسايتىنىن, باعا تۇراقتىلىعىنا ريزا ەكەندىكتەرىن جەتكىزىپ جاتتى. اندرەي لۋكين ءوز كەزەگىندە قالالىق اكىمدىك جانىندا ارنايى شتاب جۇمىس ىستەيتىنىن, باعا تۇراقسىزدىعىنا قاتىستى قانداي دا بولسىن فاكتىلەر انىقتالىپ جاتسا, حابارلاسۋعا بولاتىنىن قاپەرلەرىنە سالدى. قالالىق اكىمدىك باعا تۇراقتىلىعىنا قاتىستى شارالاردى ودان ءارى جۇرگىزە بەرمەك.
مەڭدوللا شامۇراتوۆ
