قاليبەك قۋانىشباەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترى جاسوسپىرىمدەرگە بازارلىق رەتىندە «بالا مەرگەن» ەرتەگىسى نەگىزىندە سپەكتاكل قويدى.
تەاتردىڭ قالىپتاسۋ كەزىندە ەڭبەك ءسىڭىرىپ, رەپەرتۋاردىڭ بايۋىنا ۇلەس قوسقان قازاقستاننىڭ حالىق ءارتىسى, رەجيسسەر قادىر جەتپىسباەۆتىڭ 80 جىلدىعىنا ارنالعان قويىلىمدى تاماشالاۋعا ەلورداداعى ءبىلىم ورداسىنىڭ وقۋشىلارى كوپتەپ كەلدى. ءيا, زالدا ينە شانشار ورىن جوق. وقۋشىلار قويىلىمدى تاماشالاپ قانا قويماي, كورىنىستەگى ەپيزودتارعا شىنايى ەموتسياسىن ءبىلدىرىپ, بەلسەندى كورەرمەنى بولدى.
قويىلىمنىڭ باس قاھارمانى – بالا مەرگەن. ادامگەرشىلىگى مول ادام. باتىل دا شەشىمتال جىگىت. ون ساۋساعىنان بال تامعان ونەر يەسى اققانات سىرماق توقۋدان الدىنا جان سالمايدى. ەستەتيكالىق بۇيىمدى قولدى ەتۋدى ويلاعان قارانيەتتىلەر ساحناعا شىعادى.
اقىلىنا كوركى ساي اققاناتتى مىستان كەمپىر قۇرىعىنا ءتۇسىرىپ, زۇلىمدىق جايعان پاتشالىققا اكەتەدى. اجەسى اقبالداق ودان كوز جازىپ قالادى. بالا مەرگەن اجەسىنىڭ باتاسىمەن جولعا شىعىپ, ارۋدى ىزدەيدى. جولاي تۇتقىنداعى تىڭشى قابىل مەن بالۋان دابىل كەزىگىپ, ولاردى كىسەننەن بوساتادى. ولار ءبىر-بىرىنە انت بەرىپ, دوس بولۋعا ۋاعدالاسادى. ۇشەۋى ايلا ويلاستىرىپ, مىستان كەمپىردى تۇتقىنعا ءتۇسىرىپ, جەر استىنا ءوتۋدىڭ جولىن سۇرايدى.
وندا تورتقۇلاق حان جانە ونىڭ ءۋازىرى مەن جەندەتتەرى كۇتىپ الىپ, استامشىلىقپەن جەر-كوكتى ورتكە وراپ, ادامزاتتى قايعى-قاسىرەتكە ۇشىراتقانى باياندالادى.
بالا مەرگەن جانە ونىڭ دوستارى زۇلىمداردىڭ قارۋ ساقتايتىن قويماسىن ورتەپ, اققاناتتى بوساتىپ, ەلىنە ورالادى.
ۇلتتىق قۇندىلىقتى, ولەڭنىڭ قۇدىرەتىن دارىپتەگەن ق.جەتپىسباەۆتىڭ «بالا مەرگەن» ەرتەگىسى جاسوسپىرىمدەردىڭ سانا-سەزىمىن وياتىپ, پاتريوتتىق سەزىمىن قالىپتاستىرىپ, قيال كوكجيەگىن كەڭەيتەدى, ادامگەرشىلىككە باۋليتىنى اقيقات.
ونداعى ارتىستەردىڭ كاسىبي شەبەرلىگى, كورەرمەندەرمەن ديالوگ ورناتىپ, بالالارعا جامان ادەتتەن اۋلاق بولۋعا ۇندەۋى ۇتىمدى شەشىم بولدى. تەلەفوندى شامادان تىس كوپ قولدانباي, TikTok-تا ۇزاق ۋاقىت وتىرماۋدى ەسكەرتتى. كورەرمەندەرگە ادال دوس بولۋدىڭ پارقىن ءتۇسىندىرىپ, ءبىلىمدى بولۋدىڭ ماڭىزىن دارىپتەدى.
– قويىلىمنان ەرەكشە اسەر الدىم. ءۇش دوس – بالا مەرگەن, قابىل, دابىلدىڭ اقىلداسا وتىرىپ, اققاناتتى تۇتقىننان بوساتقانى كوڭىلىمنەن شىقتى. اقىل, ايلا, بىرلىك بولعان جەردە جەڭىس جاقىن ەكەنىن ۇعىندىردى. مىستان كەمپىر جاعىمسىز كەيىپكەر بولعانىمەن, بىزبەن سويلەسىپ, ءبىلىم الۋدىڭ ارتىقشىلىعىن ۇندەگەنى ۇنادى, – دەيدى كورەرمەن بولعان دىنمۇحامەد ايتجان.
قويۋشى رەجيسسەر نۇرفات ۆاحيتوۆ پەن ارتىستەر بالالاردىڭ تالعامىنان شىعاتىن قويىلىم قويىپ, كورەرمەندەرگە ادامدىقتىڭ, ادالدىقتىڭ پارقىن ءتۇسىندىردى.
جاسوسپىرىمدەر رۋحاني كەمەلدەنىپ, پاتريوت بولىپ جەتىلۋدە تەاترعا ءجيى اپارىپ, تالعامى مەن تالابىن شىڭداۋ مىندەتى تۇر. تەاترعا بارىپ سونداي وي تۇيدىك.
