جانايىم اۋعانبايقىزىنىڭ جىر جيناعى – «اق ورامال» وقىرمانعا جول تارتتى. بەلگىلى اقىن, مەملەكەتتىك سىيلىقتىڭ لاۋرەاتى نەسىپبەك ايتۇلى, قازاقستان جازۋشىلار وداعىنىڭ حاتشىسى, اتالعان وداقتىڭ استاناداعى فيليالىنىڭ ديرەكتورى, اقىن داۋلەتكەرەي كاپۇلى, جازۋشى اسقار التاي, بەلگىلى ابايتانۋشى ومار جالەل, قىتاي قازاقتارىنان شىققان تانىمال ديكتور قىزىربەك جاناسىلۇلى جاڭا جىر جيناقتىڭ تۇساۋىن كەستى.
– قازاق پوەزياسىنىڭ ارعى-بەرگى تاريحىندا ولەڭمەن ورنەك سالعان مىقتى اقىن قىزدار از بولعان جوق. ۇلبيكە, سارالاردان تارتىپ, كەشەگى فاريزا, بۇگىنگى تاناكوز تولقىنقىزىنا دەيىن ايتار بولساق, جىر كوشىنە اقيىق جىرىمەن ءسان قوسقان ايەل اقىندار از ەمەس. بۇگىن, مىنە, سول كوشكە «اق ورامالمەن» جانايىم اۋعانبايقىزى قوسىلدى. «اق ورامالدى» پاراقتاپ وتىرىپ, جانايىمنىڭ ولەڭدەرىنەن نازىكتىكپەن قاتار قازاق قىزدارىنا ءتان يبالىلىقتى, بۇيىعى ۇياڭدىقتى بايقادىم. شىنىن ايتايىق, ءبىزدىڭ قازىرگى قازاق قىزدارىنىڭ پوەزياسىندا, باتىستىڭ اسەرىنەن بە, الدە ورىس جازۋشىلارىنىڭ ىقپالى ما, ءبىر ادەپسىزدىك بەلەڭ الىپ بارادى. ولەڭ دەگەن وسى ەكەن دەپ ءبارىن اشىق جازاتىن بولدى دا, قىزدارعا ءتان ادەپتىلىك, تەكتىلىك قاسيەت سۇيىلىپ بارا جاتقان ەدى. جانايىمنىڭ ولەڭدەرى وقىرمانداردى سول قاسيەتپەن قايتا قاۋىشتىردى. مەن وسىعان قۋاندىم, – دەدى نەسىپبەك ايتۇلى. اقىن داۋلەتكەرەي كاپۇلى جازۋشىلار وداعى باسقارماسىنىڭ توراعاسى ۇلىقبەك ەسداۋلەتتىڭ سالەمىن جەتكىزىپ, جازۋشىلار وداعى اتىنان جاقىندا جارىق كورگەن كىتاپتاردى سىيلاپ, جانايىمنىڭ شىعارماشىلىق جولىنا تابىس تىلەدى.
سالتاناتتى ءىس-شارانىڭ سوڭىندا كەزەك جانايىم اۋعانبايقىزىنىڭ سوزىنە جازىلعان اندەرىنە بەرىلىپ, ونى نۇرلان ونەرباەۆ, مايرا ءىلياسوۆا سىندى تانىمال انشىلەر ورىندادى.
