استانا قالاسىنىڭ قابانباي باتىر داڭعىلىنداعى 58 ب ۇيدە «Priton» لاۋندج-بارى مەن «بوتاقان» بالالار باقشاسىنىڭ قاتار تۇرعانىنا بەسىنشى جىلعا اينالىپ بارادى ەكەن. رەداكتسياعا ارنايى كەلىپ, ماسەلەنىڭ ءمانىسىن ايتقان اقساقال مۇنى بىزگە اشىنىپ جەتكىزدى.
ۇكىمەت بيزنەس يەلەرىنە تيىسپەڭدەر دەگەندە, قالانىڭ قاق تورىندە ءدامحانا اشىپ, ماڭدايشاسىنا ويىڭا كەلگەن ءسوزدى جازىپ, قاراپايىم جۇرتتىڭ قىتىعىنا تيەتىن ءىس جاساپ, ادامشىلىقتان اسىپ كەت دەپتى مە؟! الدە ءتيىستى مەكەمەلەرگە «Priton» اشايىن دەپ وتىنىشپەن بارعاندا بۇل ءسوزدىڭ نە ماعىنا بەرەتىنىن ونداعىلار بىلمەدى مە ەكەن؟
پريتون – ارام ويلى قاسقويلەر مەن بۇرالاڭ جولعا تۇسكەندەردىڭ جينالاتىن جەرى. بۇل ءسوزدىڭ شىعۋ تەگىن تەكسەرگەندە ەجەلگى گرەكتىڭ «pritania» سوزىنە تىرەلەدى. ول كەزدە پريتوندا قۇرمەتتى ازاماتتار باس قوسادى ەكەن. زامان وزگەردى, قازىر بۇل ءسوز ناشاقورلار مەن قىلمىستى توپتىڭ جارگونىنا اينالدى. بۇل, دالىرەك ايتقاندا, ۇرىلاردىڭ ۇياسى. پريتوننىڭ ءبىر ءتۇرى «بوردەل» دەپ جەزوكشەلەردىڭ جينالاتىن جەرىن ايتادى. ويىنپازدار, ناشاقورلار پريتونى مەن الكوپريتوندار اتىن دا زاتىن انىقتاپ وتىر.
بۇل «Priton» قىلمىستى الەمگە كوڭىلىن دە كوزىن دە ۇيرەتىپ, جامانشىلىققا شاقىرىپ تۇرعانداي. اسىرەسە, جانىندا جۇمىس ىستەپ تۇرعان «بوتاقان» بالاباقشاسىنىڭ بۇلدىرشىندەرىنە وبال-اق. حالىقتىڭ تانىمىنا قارسى, مادەنيەتىنە قايشى, مەنتاليتەتىن بۇزاتىن اتاۋلاردى الدىرىپ تاستاي المايتىنداي ەتىپ, استانالىق قۇزىرلى باسقارمانىڭ قولىن بايلاپ قويعان زاڭدى جاڭا قازاقستان دەپۋتاتتارى وزگەرتەتىن كەز كەلدى. ايتپەسە, بالاباقشادان جامان اتاۋعا ەتى ۇيرەنىپ وسكەن بالا ەل بيلىگىنە كەلىپ مەملەكەتىمىزدى پريتونعا اينالدىرماسىنا كىم كەپىل؟!
