شاش قىرقىپ, ماسساج جاساپ, شەت ءتىلىن ۇيرەتەمىن دەسەڭىز دە, ەسەپ-قيساپپەن اينالىسىپ, بۋحگالتەرلىك جۇمىس جۇرگىزگىڭىز كەلسە دە, كاسىپتى ۇيرەتەتىن كۋرستان ءوتىپ, ءتيىستى سەرتيفيكات الۋىڭىز شارت. سانامالاپ كەلگەنىمىزدە, اۋلا سىپىرۋشى مەن بالا باعۋشىدان عانا سەرتيفيكات تالاپ ەتىلمەيتىن بولىپ شىقتى.
باسقا-باسقا, ءبىزدىڭ قالادا جاقسى «نيانياعا» قول جەتپەيدى. مەكتەپكە دەيىنگى ءبىلىم بەرۋ مەكەمەلەرىندە بالا باعۋشىنىڭ ورنى – قات كاسىپتىڭ ءبىرى.
وسىنشاما قاجەتتى كاسىپكە ادام تارتۋدىڭ امالى قانداي؟ وسى كاسىپتى قالاي تارتىمدى ەتۋگە بولادى؟ الا تاڭنان كەشكە دەيىن بالا كۇتۋشىلەر نە تاربيە بەرىپ ءجۇر؟ ونى ويلاپ جاتقان جان بار ما؟ ەگەر بۇل قىزمەتتىڭ بىرەگەي ەرەجەسى بولىپ سەرتيفيكاتتالماسا, وندا ساپاسى دا قاداعالانبايدى دەگەن ءسوز ەمەس پە؟!
سەرتيفيكات تالاپ ەتىلمەگەن سوڭ كاسىپتىڭ ءمان-ماڭىزىن اشىپ, ونىڭ جۇمىسىن جۇيەلەندىرىپ, تارتىمدى ەتەتىن وقۋ ورىندارى, قىسقا كۋرستار ەشقاشان اشىلمايدى. سوندىقتان دا باس قالادا بالا باعۋشى تاپشى.
ايتا كەتۋ كەرەك, استانالىق سابيلەردىڭ جارتىسىنان كوبىن وسى «نيانيالار» باعىپ جاتىر. سەبەبىن ءوزىڭىز بىلەسىز, بالاباقشا بارىنە جەتپەيدى. سودان جاس كەلىنشەكتەر بالاسىنا قارايتىن ادام ىزدەگەندە الدىمەن الىس-جاقىن تۋىستارىنىڭ اراسىنان قولى بوسىن ىزدەيدى. ودان قالدى, تاجىريەسى بار ءبىر تانىسىنىڭ بالاسىن قاناتتاندىرعاندى قولايلى كورەدى. قولعا زورعا تۇسىرگەندە ولاردان سەرتيفيكات سۇرايدى دەيسىز بە؟ ونىڭ دەنساۋلىعى جايىن قايتسىن, ءتىپتى بالا پسيحولوگياسىنان قانشالىقتى حاباردار, ەبى قانداي, تاعى باسقاسىن ءبىلۋ ەسكە كىرمەيدى. تەك مەزگىلىمەن تاماعىن بەرىپ, كەرەك بولسا استىن قۇرعاتىپ, بىردەڭەگە ۇشىراتپاي قاراپ وتىرسا بولدى دەيدى. قىزمەتىنە ۋىستاپ اقشا بەرگەندە بۇل تىم از ەمەس پە؟!
ال بالا كۇن ساناپ وسەدى. ەگەر اتا-اناسىنىڭ مۇرشاسى بولماسا, ءسابي كۇتۋشىسى ارقىلى بولسا دا ءتالىم-تاربيە الۋعا قۇقىلى ەمەس پە؟!
ءتىپتى پەداگوگ بولماسا دا, ازاننان قارا كەشكە دەيىن بالا كۇتۋشىسى بولعاننان كەيىن دە پەداگوگيكالىق ىلىمنەن از دا بولسا دا حاباردار بولۋى ءتيىس. بالانىڭ جاسىنا سايكەس پسيحولوگيادان ماعلۇمات العاننىڭ ارتىعى جوق. بالانىڭ توسىننان مۇرنى قاناپ, ءىشى كەپكەن جاعدايدا دارىگەر كەلگەنگە دەيىن قاراپ وتىرماي, قارەكەت جاساي الاتىن بولۋى كەرەك. جانە بالانىڭ قاسىندا جۇرگەن سوڭ ءوزى دە دارىگەردىڭ باقىلاۋىندا بولىپ, دەنساۋلىعىنىڭ جارامدى ەكەنىن ءبىلىپ جۇرگەنىن دە ەسكەرگەن ءجون.
ارينە, مۇنىڭ ءبارى تەزگە كەلەر مە ەدى, بارلىق كۇتۋشىدەن سەرتيفيكات تالاپ ەتىلسە…
ايگۇل ۋايسوۆا
