تۇرعىندارىنىڭ سانى كۇن ساناپ ءوسىپ جاتقان ەلوردامىزدا وزەكتى سانالاتىن سالانىڭ ءبىرى – ءبىلىم بەرۋ. بيىل نۇر-سۇلتان قالاسىندا 25 000 بالا ءبىرىنشى سىنىپقا بارادى دەپ كۇتىلۋدە. وسى رەتتە ەلوردادا جاڭا مەكتەپتەر سالىنا ما, بالالاردىڭ جازعى دەمالىسى قالاي وتەدى, مۇعالىمدەردىڭ الەۋمەتتىك جاعدايى قالاي شەشىلىپ جاتىر جانە باسقا دا قانداي وزگەرىستەر بولاتىنى جونىندە ءبىلىم باسقارماسىنىڭ باسشىسى ەگجەي-تەگجەيلى باياندايدى.كەشە نۇر-سۇلتان قالاسى ءبىلىم باسقارماسىنىڭ باسشىسى قاسىمحان سەنعازىۇلى «El-Orda» YouTube-كانالىنا ارنايى سۇحبات بەردى. سۇحبات بارىسىندا قاشىقتان وقىتۋدىڭ ءبىلىم ساپاسىنا اسەرى, اكىمدىك تاراپىنان بولىنەتىن گرانتتار, مەكتەپتەگى جازعى لاگەرلەر, ءبىلىم جۇيەسىندەگى سوڭعى وزگەرىستەر تۋرالى ايتىلدى.
– قاسىمحان سەنعازىۇلى, سۇحباتقا كەلىسكەنىڭىز ءۇشىن راقمەت! جالپى ەلورداداعى ءبىلىم بەرۋ ساپاسىنا كوڭىلىڭىز تولا ما؟
– قالامىزداعى بالاباقشا, باستاۋىش سىنىپ, ورتا جانە جوعارى مەكتەپ, كوللەدجدەر مەن جوو-نىڭ ءبىلىم ساپاسى جاقسى دەڭگەيدە دەپ ايتا الامىن. قازىر ءبىلىم بەرۋ سالاسىنا وتە ۇلكەن كوڭىل ءبولىنىپ جاتىر. بارلىق جاعداي جاسالعان. ماسەلەن, جىل سايىن قالاداعى ءبىلىم بەرۋ سالاسىنا بولىنەتىن بيۋدجەت ارتىپ كەلەدى. بىلتىر 140 ملرد تەڭگە بولسا, بيىل 150 ملرد تەڭگە ءبولىندى. ياعني ءبىر جىلدا 10 ملرد-قا ءوسىپ وتىر. بۇل – ءبىلىم سالاسىنا دەگەن مەملەكەت تاراپىنان ءبولىنىپ جاتقان ۇلكەن كومەك. 2019 جىلى «پەداگوگ مارتەبەسى» زاڭى قابىلدانعان بولاتىن. سول زاڭنىڭ اياسىندا جىلدان-جىلعا جالاقى ءوسىپ كەلە جاتىر. اتاپ ايتقاندا, 1 قاڭتاردان باستاپ قالامىزداعى ۇستازداردىڭ جالاقىسى 25 پايىزعا كوتەرىلدى. مۇنىڭ ءبارى ءبىلىم ساپاسىنىڭ جاقسارۋىنا اسەر ەتەتىنى ءسوزسىز.
– بيىل ەڭ كوپ تالقىلانعان ماسەلەلەردىڭ ءبىرى قاشىقتان وقىتۋ فورماتى بولدى. رەداكتسيا جۇرگىزگەن ساۋالناما قورىتىندىسى بويىنشا elorda.info قازاقستاندىقتاردىڭ 74 پايىزى ونلاين ءبىلىم بەرۋ ساپاسىنا كوڭىلى تولمايتىنى انىقتالدى. ونلاين وقۋ فورماتى قالاي جۇزەگە استى؟ قانداي قيىندىقتار كەزدەستى؟
– قاشىقتان وقىتۋ فورماتىنا كوشۋ ەلدەگى ەپيدەميالىق جاعدايعا بايلانىستى ءماجبۇرلى شارا بولعانى بەلگىلى. بيىل 1 قىركۇيەكتەن باستاپ مەكتەپكە بارادى دەگەندە, شىنى كەرەك, قۋاندىق. العاشقى ايلاردا وتە قيىن بولدى. بىرىنشىدەن, بۇل بالالارعا; ەكىنشىدەن, ۇستازدارعا اۋىر ءتيدى. سەبەبى مۇعالىمدەرگە ءوز پاندەرىنىڭ مازمۇنىن ەكران پريزماسى ارقىلى جەتكىزۋ قيىن. بىراق مۇنداي وزگەرىستەرگە قاراماستان, ولار جاڭا تالاپتارعا تەز بەيىمدەلدى. اكىمدىك تاراپىنان جەدەل تۇردە بارلىق جاعداي جاسالدى. دەگەنمەن ونلاين وقىتۋ وقۋشىلاردىڭ ءبىلىم ساپاسىنا اسەر ەتكەنىن مويىندايمىز. ونلاين وقۋ فورماتىنان شىققاننان كەيىن ءبىز ناتيجەنىڭ ناشارلاعانىن بايقادىق. ماسەلەن, ونلاين وقىتۋ كەزەڭىندە ءبىلىم ساپاسى قالا بويىنشا 67 پايىزدى قۇراسا, وفلاين كەزىندە 52 پايىزعا دەيىن تومەندەگەن. بىراق ءۇشىنشى توقساننىڭ قورىتىندىسى بويىنشا وقۋشىلار اراسىندا اكادەميالىق كورسەتكىشتىڭ ءوسۋى بايقالادى. وسىلايشا ۇلگەرىمنىڭ پايىزدىق كورسەتكىشى 2,5 پايىزعا ارتىپ, 54,5 پايىزدى قۇراپ وتىر. قاشىقتان وقىتۋ فورماتى قالامىزدىڭ قولايسىز اۋا رايىندا ساباقتى ونلاين فورماتتا وتكىزۋگە ۇيرەتتى. سەبەبى ءجيى اياز بولىپ, قاتتى جەل سوعاتىن كۇندەر بولادى. سول كەزدە ونلاين وتكىزەمىز. بۇرىن مۇنداي كەزدە ساباقتى دەمالىس ۋاقىتىندا نەمەسە باسقا ارنايى ۋاقىت ءبولىپ وقىتىلاتىن ەدى. وسى جاعىنان ءتيىمدى بولعانىن ايتا الامىن.
– 1-سىنىپقا قابىلداۋ قۇجاتتارىن 1 ءساۋىر-1 تامىز ارالىعىندا قابىلدايمىز. BINOM مەكتەپتەرىنە قابىلداۋ كەزىندە ءتۇرلى داۋ تۋىنداپ جاتىر. سەبەبى اتا-انالار بالالارىن سوندا وقىتقىسى كەلەدى. سۇرانىس وتە جوعارى. ءبىز قابىلداۋدى باستاعان كەزدە العاشقى 44 مينۋتتىڭ ىشىندە بارلىق 1-سىنىپتارعا ورىن تولدى. بىراق BINOM-عا قابىلدانباسا, باسقا مەكتەپتەرگە قابىلدامايدى دەگەن ەرەجە جوق
– قاشىقتان وقىتۋ فورماتى بويىنشا جوبالار جالعاسا ما؟
– ازىرگە بۇل ناقتى بەكىتىلمەدى. ەلىمىزدە مەكتەپكە بارماي, ۇيدەن وقۋعا تەك ەرەكشە قاجەتتىلىگى بار بالالاردىڭ مۇمكىندىگى بار. ونىڭ ۇستىنە ساۋالناما ناتيجەسىندە اتا-انالاردىڭ 74 پايىزى قاشىقتان وقىتۋ فورماتىنا كەلىسپەدى. مەنىڭشە, بالالار مەكتەپكە بارۋ كەرەك. سەبەبى وعان ورتا, قارىم-قاتىناس جانە تاربيە كەرەك. سول ءۇشىن مەكتەپتەردى قاشىقتان وقىتۋعا كوشىرۋگە بولمايدى.
– ۇلتتىق بىرىڭعاي تەستىلەۋ بىلتىر ەلەكتروندى فورماتتا وتكىزىلدى. بيىل قالاي وتكىزىلەدى, قانداي وزگەرىستەر بار؟
– سوڭعى 3-4 جىلدا ۇبت-دا جاقسى جاعىنان وزگەرىستەر بايقالۋدا. قوعامدا ۇبت-نىڭ وتكەنىنە سەنىمسىزدىك كوپ ەدى. قازىر سەنىم پايدا بولا باستادى. بيىل 8000-عا جۋىق 11-سىنىپ وقۋشىسى تەستىلەۋگە قاتىسىپ جاتىر. ءالى دە قاتىساتىندارى بار. ءبىراز وزگەرىستەر بار. اتاپ ايتقاندا, «1 وقۋشىعا – 1 كومپيۋتەر, 2 كامەرا». وسىنداي قاعيداتپەن وتەدى. پروكتورينگ جۇيەسى ەنگىزىلگەن. ياعني بۇرىنعىداي بىرەۋدىڭ ورنىنا باسقا ادام كىرىپ كەتۋ دەگەن بولمايدى. گرانتقا ءتۇسۋ ءۇشىن ەكى رەت تاپسىرۋعا مۇمكىندىك بەرىلدى. تاعى ءبىر جاقسى جاڭالىق – وقۋشىلاردىڭ تەست ناتيجەلەرى مەن تالداۋلارى مەكتەپ اكىمشىلىگىنە بەرىلەدى. بۇل ءپان مۇعالىمدەرى مەن وقۋشىنىڭ دايىندىعىن نىعايتىپ, قاتەمەن جۇمىس ىستەۋىنە زور ىقپالىن تيگىزەدى.
– ۇبت-نى تاپسىرا الماي قالعان جاستار قايدا, قالاي جۇمىس ىستەي الادى؟
– ەگەر مەكتەپ ءبىتىرۋشى تۇلەك جوو-عا تۇسە الماي قالسا, كوللەدجگە بارا الادى. كوللەدجدە بەلگىلى ءبىر ماماندىقتى 10 ايدا مەڭگەرىپ, نارىققا شىعىپ, جۇمىس ىستەي الادى. بۇدان بولەك, 1 جىل 10 اي ىشىندە تەحنيك ماماندىعىن وقۋىنا, ءارى قاراي جوو-عا ءتۇسىپ جالعاستىرۋىنا دا بولادى. بىراق بارلىق ماماندىق بويىنشا گرانت قاراستىرىلماعان. كوللەدجدەن بولەك, قىسقا مەرزىمدى كۋرستار دا دايىن تۇر. ياعني قازىرگى تاڭدا 132 قىسقا مەرزىمدى كۋرس بار. جۇمىسپەن قامتۋ ورتالىعىنا بارىپ, جۇمىسسىز بوپ تىركەلەدى. سول ارقىلى تەگىن وقىپ, سەرتيفيكات الا الادى.
– جىل سايىن اكىمدىك تاراپىنان گرانتتار بولىنەتىنىن بىلەمىز. بيىل قانشا گرانت بولىنەدى؟
– بيىل دا اكىم گرانتى بولىنەدى دەپ جوسپارلانىپ وتىر. قالادا مۇعالىم جانە دارىگەر ماماندىعىنا سۇرانىس كوپ. وعان 2500-گە جۋىق مۇعالىم قاجەت. وسىلاردىڭ بارلىعىن سارالاي كەلە, اكىمدىك اتىنان پەداگوگيكا سالاسىنا 1000 گرانت, مەديتسينالىق سالاعا 250 گرانت بولىنەدى.
– بۇل ايتىپ وتىرعان گرانت سانىنا بايلانىستى ارنايى تالداۋ جۇرگىزىلدى مە؟
– اكىم گرانتى ارنايى زەرتتەۋ ناتيجەسى بويىنشا ءبولىنىپ وتىر. قالامىزدا قانداي ماماندىقتار جەتىسپەيتىنى انىقتالدى. مۇعالىمدەر, اسىرەسە باستاۋىش سىنىپ مۇعالىمدەرى, مەكتەپالدى دايارلىق توبىنىڭ ماماندارى جەتىسپەيدى. وسى رەتتە گرانت ءبولىپ, مامانداردى دايارلايمىز. بۇعان دەيىن اكىم گرانتىمەن وقىعان تۇلەكتەردى ءار مەكتەپكە ءبولىپ, جۇمىسقا ورنالاستىردىق.
– گرانت بەرىلگەن كەزدە ستۋدەنتتەرمەن كەلىسىمشارت بولا ما؟
– ءيا, ەكى جاق كەلىسىمشارت جاساسادى. ستۋدەنت بىتىرگەن سوڭ 3 جىل بويى ءبىز تاڭداعان نۇر-سۇلتانداعى وقۋ ورىندارىندا نەمەسە مەديتسينالىق مەكەمەلەردە قىزمەت ەتەدى. ال وقىپ جۇرگەندە مەملەكەتتىك گرانت سەكىلدى ولارعا ستيپەنديا قاراستىرىلعان.
– بيىل بالالاردى جازعى ۋاقىتتا مەكتەپتە قوسىمشا وقىتۋ ماسەلەسى قاراستىرىلعان. بۇل مىندەتتى مە؟
– مىندەتتى ەمەس, اتا-انا بالاسىن جىبەرە مە, جوق پا – ءوزى شەشەدى. الايدا مەنىڭ كەڭەسىم – بالالاردى جازعى مەكتەپكە اپارۋ كەرەك. ويتكەنى ءبىز كارانتين كەزىندە ءبىر جارىم جىلداي قاشىقتان وقىدىق, سول كەزدە كەتكەن ولقىلىقتاردى تۇزەتۋگە وسى جازعى مەكتەپ باعدارلاماسى كومەكتەسەر ەدى. جازعى مەكتەپ كەزىندە ەڭبەك, دەنە شىنىقتىرۋ دەگەن سياقتى پاندەر بولمايدى, تەك فيزيكا, حيميا, ماتەماتيكا سەكىلدى نەگىزگى پاندەر وقىتىلادى. باراتىن سىنىپتارعا كەلسەك, 1-8 جانە 10-سىنىپ وقۋشىلارى جازعى مەكتەپكە جىبەرىلەدى. ال 9 جانە 11-سىنىپتار مەملەكەتتىك ەمتيحان تاپسىراتىنى سەبەپتى جازعى مەكتەپ باعدارلاماسىنا قاتىسا المايدى.
– بيىل مەكتەپتە جازعى لاگەر ۇيىمداستىرىلا ما؟ كىمدەر قاتىسادى؟
– ءيا, جازعى لاگەر ۇيىمداستىرىلادى. مەكتەپ جانىنداعى لاگەرلەر 1 ماۋسىم-1 شىلدە ارالىعىندا, ال جازعى لاگەرلەر 14 ماۋسىم-6 تامىز ارالىعىندا جۇمىس ىستەيدى. «ديدارلى جاس» سەكىلدى سپورتتىق باعىتتا جۇمىس ىستەيتىن مەكتەپ جانىنداعى لاگەرلەر بار. ولاردان بولەك, قالا سىرتىندا «ارمان» جانە «بوروۆيچوك» لاگەرلەرى جۇمىسىن باستايدى. سونداي-اق وقۋشىلار سارايى, ونەر مەكتەبى, مۋزىكا مەكتەبى سەكىلدى قوسىمشا ءبىلىم بەرۋ ۇيىمدارىنىڭ جانىنان شىعارماشىلىق لاگەرلەر اشىلادى. بالانى لاگەرگە بەرۋ ءۇشىن اتا-انالار ۇيىمداردىڭ باسشىلىعىنا جۇگىنىپ, ءوتىنىش بەرۋى كەرەك. مەكتەپ جانىنداعى لاگەرلەر تەگىن جۇمىس ىستەيدى. تەك قوسىمشا ءبىلىم بەرۋ ۇيىمدارى جانىنان اشىلعان شىعارماشىلىق لاگەرلەردىڭ كەيبىرى اقىلى بولۋى مۇمكىن.
– بيىل قالامىزدا 25000 بالا 1-سىنىپقا بارادى. اكىمدىك تاراپىنان جاڭا مەكتەپ سالۋ ماسەلەسى قالاي ءجۇرىپ جاتىر؟
– 2021 جىلى وتىز مىڭ ورىندىق 15 مەكتەپ پايدالانۋعا بەرىلدى. وتكەن جىلى ءۇش اۋىسىمداعى 8 مەكتەپ پەن بالا سانى وتە كوپ 22 مەكتەپ بولعان ەدى. 15 مەكتەپ پايدالانۋعا بەرىلگەننەن باستاپ ءبىراز ماسەلەنى شەشتىك. ياعني ءۇش اۋىسىمداعى 4 مەكتەپ پايدالانۋعا بەرىلىپ, 22 بالا سانى وتە كوپ مەكتەپتى 15-كە دەيىن قىسقارتتىق.
– رەداكتسيامىزعا اتا-انالاردان 1-سىنىپ بالالارىن مەكتەپكە قابىلداۋ تۋرالى سۇراق وتە كوپ كەلەدى. بۇل ماسەلە قالاي شەشىمىن تاۋىپ جاتىر؟
– 1-سىنىپقا قابىلداۋ قۇجاتتارىن 1 ءساۋىر-1 تامىز ارالىعىندا قابىلدايمىز. BINOM مەكتەپتەرىنە قابىلداۋ كەزىندە ءتۇرلى داۋ تۋىنداپ جاتىر. سەبەبى اتا-انالار بالالارىن سوندا وقىتقىسى كەلەدى. سۇرانىس وتە جوعارى. ءبىز قابىلداۋدى باستاعان كەزدە العاشقى 44 مينۋتتىڭ ىشىندە بارلىق 1-سىنىپتارعا ورىن تولدى. بىراق BINOM-عا قابىلدانباسا, باسقا مەكتەپتەرگە قابىلدامايدى دەگەن ەرەجە جوق. بارلىق 1-سىنىپ وقۋشىلارىنا مەكتەپتە وقۋعا جاعداي جاسالعان. ولاردى وقۋلىقتارمەن دە قامتاماسىز ەتەمىز. «قامال», «ارناۋ» تك, ۇلى دالا مەن ماڭگىلىك ەل كوشەلەرىندە 1-سىنىپ وقۋشىلارىنىڭ مەكتەپكە سىيماي قالۋى ماسەلەسى تۋىنداپ وتىر. ونىڭ دا شەشىمىن تاپتىق. وسى مەكەنجايداعىلار ءۇشىن №82 جانە №95 مەكتەپتى قوسىپ, ءبىر مەكەمەگە بىرىكتىرەمىز. ياعني ءوز كەزەگىندە №95 مەكتەپ 1-سىنىپتاردى قابىلدايدى. بۇل ارنايى مەكتەپ ەمەس. بىراق مەكەمەدەگى ارنايى سىنىپتاردى ءبىر بلوكقا كوشىرەمىز. بارلىعىنا جاعداي جاسايمىز. سپورت زال, كىتاپحانا, ءپان كابينەتتەرىن, اسحانانى قالدىرامىز. تەك ايىرماشىلىعى ءبىر مەكەمەدە ەكى مەكتەپ وقيدى. №95 مەكتەپكە جوعارىدا اتاپ وتكەن مەكەنجايداعى تۇرعىندار ءوتىنىش بەرە الادى ءارى جاقىن.
– مەكتەپتەردىڭ الدىندا ۇنەمى كەپتەلىس بولادى. جاڭا مەكتەپتەر سالىنعان كەزدە وسى جاعداي ەسكەرىلە مە؟ كەيبىر مەكتەپتەردىڭ ورنالاسقان كوشەسىنەن ءوتۋ مۇمكىن ەمەس. بۇل ماسەلەنى شەشۋدىڭ جولى قانداي؟
– بىرىنشىدەن, بارلىق مەكتەپتە ءبىلىم بەرۋ ساپاسى, مۇعالىم دەڭگەيى, جاعداي بىردەي بولۋ كەرەك. وكىنىشكە قاراي, بىزدە ءارتۇرلى. اتا-انالاردىڭ كوپشىلىگى بالاسىن ساپالى ءبىلىم بەرەتىن مەكتەپتەردە وقىتقىسى كەلەدى. سوندىقتان دا كوپ اتا-انالار بالالارىن تۇرعىلىقتى مەكەنجاي بويىنشا ەمەس, الىس اۋدانداعى مەكتەپكە ءبىلىمنىڭ ساپالى بولعانى ءۇشىن اپارادى. كەيبىر مەكتەپتەردىڭ الدىڭعى ەسىكتەرى تار بولعاندىقتان, ۇلكەن كەپتەلىستەر كەزىندە قيىندىق تۋدىرادى. بولاشاقتا بۇل ماسەلە ەسكەرىلىپ, شەشىمىن تابادى دەپ ويلايمىن.
– اتا-انالار تاراپىنان ءبىلىم ساپاسى بويىنشا ارىز-شاعىمدار كەلەدى. قازىرگى ءبىلىم ساپاسى زاماناۋي ستاندارتقا سايكەس كەلە مە؟
– ءبىلىم ساپاسى كەرەمەت بولۋ ءۇشىن مازمۇنى جاقسى بولۋ كەرەك. زامان تالابىنا قاراي مازمۇن دا وزگەرىپ تۇرادى. ءبىلىمنىڭ ساپالى بولۋىنا وقۋلىق تا اسەر ەتەدى. قازىر جاڭارتىلعان ءبىلىم مازمۇنىمەن كوپتەگەن مۇعالىمدەر كۋرستان ءوتتى. زامان تالابىنا ساي جاڭا تەحنولوگيالارعا ساي لايىقتى ءبىلىم بەرۋ مازمۇنى بولۋ كەرەك.
– بيۋدجەت ءوسىپ جاتىر, مۇعالىمدەردىڭ ايلىعى ءوستى. مۇعالىمنىڭ ءبىلىم بەرۋ ساپاسىن ارتتىرۋ ءۇشىن تاعى دا قانداي شارالار جاسالىپ جاتىر؟
– مۇعالىمدەر 3 جىل سايىن بىلىكتىلىك كۋرسىنان ءوتىپ تۇرۋ كەرەك. بۇل مىندەتتى. كۋرس اقىسىز, شىعىندى مەملەكەت تولەيدى. ءبىزدىڭ تاراپتان دا مۇعالىمدەرگە تەگىن كۋرستار بەرىلۋدە. مۇعالىمدەر وسى كۋرستارعا قاتىسۋ كەرەك. قازىر ءبارى تەز وزگەرىپ جاتقاندىقتان, ءبىلىم بەرۋ مازمۇنى دا ءجيى وزگەرىپ جاتىر. وسىنى ەسكەرسەك, مۇعالىم دە وسىلاردىڭ ءبارىن ۋاقىتىلى مەڭگەرگەنى ءجون. ال اقىلى كۋرستاردى مۇعالىم ءوز ەركىمەن تاڭداپ, قاتىسۋعا قۇقىلى.
– ەگەر مۇعالىم تاراپىنان بالاعا قىسىم كورسەتىلسە نەمەسە وقۋشى مۇعالىمگە قىسىم كورسەتسە نە ىستەۋ كەرەك؟
– قوعام بولعان سوڭ ءارتۇرلى ماسەلەلەر بولىپ جاتادى. شەشىمىن تابۋعا تىرىسامىز. بۇل تاقىرىپقا قاتىستى مەكتەپتەگى مەدياتسيانى دامىتىپ جاتىرمىز. سول ارقىلى بالالاردىڭ ءبىر-بىرىمەن تابىسىپ, دوستاسۋىن ىسكە اسىرىپ جاتىرمىز. ەگەر ۇستازدىڭ تاراپىنان بالاعا قىسىم كورسەتىلسە, مەكتەپىشىلىك پەداگوگيكالىق كەڭەستە تالقىلاۋ كەرەك. «پەداگوگ مارتەبەسىندە» بۇل تۋرالى ارنايى جازىلعان. مۇنداي جاعداي ورىن السا, زاڭ جۇزىندە شارالار قولدانىلادى. ءتىپتى اتا-انالار تاراپىنان ۇستازعا قىسىم كورسەتىلسە دە, مەكتەپ ديرەكتورىنا بارۋ كەرەك. ماسەلە مەكتەپىشىلىك پەداگوگيكالىق كەڭەستە تالقىلانادى. ال ءبىر شەشىمى شىقپاسا, ءبىلىم باسقارماسىنا نەمەسە ءبىلىم سالاسىن باقىلاۋ دەپارتامەنتىنە حابارلاسۋ كەرەك.
– بالالار اراسىندا كەمسىتۋ وقيعاسى ورىن السا, قانداي شارالار جۇرگىزىلەدى؟
– كامەلەتكە تولماعان بالالاردىڭ قۇقىعىن قورعاۋ ءبولىمى بار. بۋللينگ ماسەلەسىمەن سولار اينالىسادى. 4 ايدىڭ ىشىندە بالالاردى كەمسىتۋ وقيعاسىن كەزدەستىرمەدىم. ەگەر مەكتەپ دەڭگەيىندە بۋللينگ ورىن السا, شەشۋگە تىرىسامىز. ارنايى شارالار قولدانامىز.
– جەكە ومىرىڭىزگە توقتالساق. قانشا بالاڭىز بار؟ ولاردىڭ ءبىلىمى قالاي؟
– ۇلكەن قىزىم ءبىلىم-يننوۆاتسيا ليتسەيىندە 11-سىنىپتا, ۇلىم №73 مەكتەپتە 6-سىنىپتا وقيدى. كىشكەنتاي قىزدارىم بار. ولار مەكتەپكە ەندى بارادى. بالالارىمنىڭ ۇلگەرىمى جاقسى. «باسقارما باسشىسىنىڭ بالاسى دەپ وتىرىك باعا قويماڭىز» دەپ مۇعالىمدەرىنە ەسكەرتىپ وتىرامىن.
– سىزدەرمەن قالاي بايلانىسىپ, حابارلاسۋعا بولادى؟ اقپاراتتى قالاي بىلەمىز؟
– اقپارات الۋدىڭ 3 ءادىسى بار. ءبىرىنشى, call-ورتالىقتىڭ 55-68-70 نومىرىنە حابارلاسۋعا بولادى. ەكىنشى, سايتتا مەنىڭ بلوگىما جازۋعا بولادى. ءبىز وتە تەز جاۋاپ بەرەمىز. ءۇشىنشى, الەۋمەتتىك جەلىدەگى پاراقشا ارقىلى سۇراقتارىن قويا الادى.
ايزادا جايىققىزى
