قازاقتا «بالەلى جەرگە بارماعىڭدى تىقپا, باسىڭ بالەگە قالادى» دەگەن ءسوز بار. بۇل جولى سونداي بىلقىلداق جەرگە بياتلونشىلارىمىز بارىپ قالىپتى. مۇنى بۇرناعى كۇنى حالىقارالىق بياتلونشىلار وداعى انىقتاپ, ءبىزدىڭ قۇرامانىڭ 9 مۇشەسىن ەندى باستالعالى تۇرعان الەم كۋبوگىنىڭ كەزەڭدىك جارىستارىنان شىعارىپ تاستادى.
بۇرىن بولسا, مۇنى حالىقارالىق ۇيىمنىڭ رەسپۋبليكا سپورتشىلارىنا قىرىن قاراعان ءبىر ساتىنە سايىپ, ءوزىمىزدى-ءوزىمىز قورعاشتاپ شىعا كەلەر ەدىك. بىراق اۋىر اتلەتتەرىمىزدىڭ بىرنەشە جىلعا سوزىلعان ديسكۆاليفيكاتسياسى مەن ولاردىڭ سوڭعى ءىرى جارىستاعى ناتيجەلەرىنەن كەيىن بۇلاي دەۋگە اۋزىمىز بارماي وتىر. دەمەك, ءشوپتىڭ باسى بەكەر قوزعالماعان شىعار.
ءشوپتىڭ باسىنىڭ بەكەر قوزعالماعانىن وسى ماسەلەگە سەبەپ بولىپ وتىرعان الەم كۋبوگىنىڭ 2017 جىلعى قاڭتاردا يتاليانىڭ انتەرسەلۆا قالاسىندا وتكەن كەزەكتى كەزەڭى كەزىندە ءبىزدىڭ قۇراما پايدالانعان زاتتار اراسىنان وسىعان ناقتى ايعاق تابىلعانى بايقاتىپ وتىر. جەرگىلىكتى ءبىر تۇرعىن الدىمەن بىرنەشە اۆتوبۋستان دالاعا لاقتىرىپ تاستالعان كارتون قوراپتارعا پوليتسيا نازارىن اۋدارادى. ال ونىڭ ىشىنەن شپريتستەر, ءتۇرلى ينەكتسيا امپۋلالارى, سونداي-اق دوپينگ قولدانىلعانى ىقتيمال ەكەنىن بىلدىرەتىن جازبا قاعازدار شىعادى. تەكسەرە كەلگەندە, بۇل قوراپتاردىڭ قازاقستاندىق سپورتشىلاردان قالعانى انىقتالادى. كەيىن وسىعان بايلانىستى اۆستريا جانە يتاليا جەرىندە تەكسەرۋ جۇمىستارى جۇرگىزىلەدى. ونىڭ قورىتىندىسىمەن قازاقستان قۇراماسى بياتلونشىلارىنا جارىس كەزىندە تىيىم سالىنعان پرەپاراتتار پايدالانعان دەگەن كۇدىك تاڭىلادى.
دوپينگكە قاتىستى دۇربەلەڭگە گالينا ۆيشنەۆسكايا, الينا رايكوۆا, داريا كليمينا-ۋسانوۆا, ولگا پولتورانينا, يان ساۆيتسكي, ماكسيم براۋن, اننا كيستانوۆا, انتون پانتوۆ جانە ۆاسيلي پوتكورىتوۆ ەسىمدى بياتلونشىلارىمىز ءتۇسىپ وتىر. ەندى ولار وسىعان بايلانىستى حالىقارالىق بياتلونشىلار وداعىنا تۇسىنىكتەمە بەرۋگە ءتيىس. وداق سودان كەيىن ولاردىڭ سانكتسيالارى مولشەرىن انىقتايتىن بولادى.
دامير قوجامقۇل
