بالعىن سۋرەتشىلەر بايقاۋى
استانادا «بالالار الەمدى بەينەلەيدى. ورتالىق ازيا 2013-2014» اتتى يۋنەسكو-نىڭ حالىقارالىق فەستيۆالى ءوتتى. وعان قازاقستان, قىرعىز رەسپۋبليكاسى, تاجىكستان, تۇركىمەنستان جانە وزبەكستان سىندى ەلدەردىڭ جاس سۋرەتشىلەرى قاتىستى.
بىرنەشە كۇنگە سوزىلعان فەستيۆال بارىسىندا ءتۇرلى ترەنينگتەر, شەبەرلىك ساباقتارى وتكىزىلىپ, جاس دارىندار بەينەلەۋ ونەرىنىڭ حاس شەبەرلەرىنەن دارىستەر الدى. مادەنيەت جانە سپورت قايراتكەرلەرىنىڭ قىزىقتى اڭگىمەلەرىن تىڭداپ, جەتىستىككە جەتۋدىڭ فورمۋلاسىن انىقتاعانداي بولدى. ەلوردانىڭ كورىكتى جەرلەرىن ارالادى.
سونىڭ ىشىندە سول جاعالاۋدا جاڭادان بوي كوتەرگەن نازارباەۆ ورتالىعىندا بولىپ, تەڭدەسسىز عيماراتتىڭ ىشكى-سىرتقى كورىنىسىنە تامساندى. وسى جەردە فەستيۆالدىڭ جابىلۋ ءراسىمى ءوتىپ, قاتىسۋشىلاردىڭ شىعارماشىلىعى جايلى نەبىر جىلى سوزدەر ايتىلدى. ۇزدىك جۇمىس يەلەرى ماراپاتتالدى. ماراپاتتالعانداردىڭ ەڭ كىشكەنتايى 3 جاستا بولسا, ۇلكەنى – 17 جاستا. ولارعا سىيلىقتارمەن بىرگە, «بالالار الەمدى بەينەلەيدى» سەرياسىمەن شىققان البوم تابىستالدى.
يۋنەسكو باس ديرەكتورىنىڭ باستاماسىمەن بۇل سەرياداعى البومدەر 1999 جىلى العاش رەت جارىق كوردى. وعان ەلىمىزدەگى جاس سۋرەتشىلەردىڭ جۇمىستارى دا ەندى. وسى ۋاقىتتان باستاپ قازاقستاندا ونەرلى بالالاردى بىرىكتىرەتىن يۋنەسكو كلۋبتارى دا پايدا بولىپ, قازىرگى تاڭدا ولاردىڭ سانى وتىز بىرگە جەتتى. فەستيۆالگە سول كلۋبتاردىڭ مۇشەلەرى جانە ورتا ازيادان كەلگەن جاس سۋرەتشىلەر, بارلىعى150 ادام قاتىستى.
سۇبەلىسوز
سەرىك ساپيەۆ, وليمپيادا چەمپيونى, يۋنەسكو ەلشىسى:
– وسىنداي شارالار مەملەكەتتەردىڭ قارىم-قاتىناسىنىڭ دامۋىنا مول ۇلەس قوسىپ, الەمدەگى بەيبىتشىلىكتى نىعايتادى. قاتىسۋشىلار ارقىلى ءتۇرلى ەل جايلى بىلگەننىڭ ۇستىنە بىلە تۇسۋىنە جاعداي تۋدىرادى. اسىرەسە, بالالار ءۇشىن مول پايدا اكەلەدى.
ءوز باسىما كەلسەم, ۇيىمداستىرۋشىلاردىڭ بالالارمەن كەزدەسۋ ۇسىنىسىنا بىردەن كەلىستىم. رياسىز اڭگىمە بارىسىندا ولاردىڭ كىرشىكسىز كوڭىلدەرىنە ءتانتى بولدىم. سۇراق-جاۋاپ تۇرىندە وتكەن كەزدەسۋىمىزدە جەتىستىككە قالاي جەتكەنىم جايلى ايتىپ بەردىم.
قوناقتاردىڭ بىرنەشەۋىن اڭگىمەگە تارتتىق. اشحاباد قالاسىنداعى ب.ءنۇرالي اتىنداعى بالالار كوركەمسۋرەت مەكتەبىنىڭ شاكىرتى ايشا سەيىتوۆا «ءوز ەلىمنەن جىراققا ءبىرىنشى رەت شىعىپ, ونەرگە قىزىعاتىن ءوزىم سياقتى وزگە ەلدەردىڭ بالالارىمەن كەزدەسىپ, قۋانىشتى جاعدايدى باستان كەشىپ وتىرمىن. ماعان فەستيۆال اياسىندا وتكەن شارالار وتە ۇنادى. قازاقستاننىڭ استاناسىن دا ارالاپ, مول اسەر الدىم. ەلىمە قايتىپ بارعان سوڭ, قازاقستاندا ءبىزدى قالاي قارسى العاندىعى جونىندە دوستارىما ايتىپ بەرۋگە اسىعۋدامىن» دەسە, دۋشانبەدەن كەلگەن فيرۋز ميرزوحاەتوۆ: «نازارباەۆ ورتالىعىن ارالاتقاندارى ءۇشىن ۇيىمداستىرۋشىلارعا العىسىمدى بىلدىرەمىن. مۇندا كوزدى الا المايتىن سۇلۋلىققا تاپ بولدىم. وتكىزىلگەن شەبەرلىك ساباقتارى دا ماعان وتە ۇنادى» دەيدى.
امانعالي شميتۇلى