استانا قالاسىنىڭ اكىمى يمانعالي تاسماعامبەتوۆتىڭ قاتىسۋىمەن وتكەن كوشپەلى كەڭەس بارىسىندا كولىك قۇرالىنىڭ جاڭا جۇيەسى تانىستىرىلدى.
ەلوردا اكىمىنىڭ تاپسىرماسى بويىنشا جانە «استانا قالاسىنىڭ جاڭا كولىك جۇيەسى» جوباسىنىڭ اياسىندا 2014 جىلدىڭ 4 مامىرىنان باستاپ باس قالادا كولىك ماماندارىنىڭ بىلىكتىلىگى ورتالىعى جۇمىس ىستەي باستاعان ەدى. استانا باسشىسى وسى ورتالىقتا بولىپ, وقۋ سىنىپتارىن ارالادى. جاڭا تەحنولوگيالارمەن جانە جابدىقتارمەن جاراقتاندىرىلعان ورتالىقتا 4 وقۋ, 2 كومپيۋتەرلىك جانە ارناۋلى تەحنولوگيالىق كابينەت بار.
بىلىكتى جۇرگىزۋشىلەردى دايارلاۋ ماقساتىندا الداعى ۋاقىتتا قازىرگى زامان تالابىنا ساي ەكى مۋلتيمەديالىق اۆتوبۋس ترەناجەرى, جولاقىنى ەلەكتروندى جۇيەدە تولەۋگە ارنالعان دەمو-قۇرىلعى, BRT ديسپەتچەرلەندىرۋگە قاجەتتى قۇرىلعىلار ساتىپ الىنباقشى.
23 ادامنان قۇرالعان ورتالىق اكىمشىلىگىندەگىلەردىڭ ون ءۇشى – وقىتۋشى. ەۋروپالىق تاجىريبەلەرگە سۇيەنە وتىرىپ, قازىرگى كەزدە ولار قالالىق جولاۋشىلار كولىگىنىڭ جۇرگىزۋشىلەرىنە, كوندۋكتورلار مەن باقىلاۋ-رەۆيزيا قىزمەتى ماماندارىنا, سونداي-اق تاكسي جۇرگىزۋشىلەرىنە ساباقتار وتكىزىپ جاتىر.
ورتالىقتا ينجەنەرلىك-تەحنيكالىق ماماندار, جوندەۋ تسەحىنىڭ جۇمىسشىلارى, BRT جاڭا كولىك جۇيەسىنىڭ قىزمەتكەرلەرى جانە قالانىڭ كولىك سەكتورىنىڭ باسقا دا ماماندارى وقيدى. اي سايىن ورتالىق ارقىلى 180-200 ادام ءبىلىم السا, جىل سوڭىنا دەيىن 1500-دەن استام ادامدى وقىتۋ جوسپارلانىپ وتىر. بۇگىنگى تاڭدا مۇندا 455 اۆتوبۋس جۇرگىزۋشىسى مەن 254 كوندۋكتور بىلىمدەرىن جەتىلدىرۋدە.
«استانا قالاسىنىڭ جاڭا كولىك جۇيەسى» (ۆRT, ITS) جوباسى كەلەر جىلى ىسكە قوسىلادى. جوبانىڭ باستى ارتىقشىلىقتارىنىڭ ءبىرى – قوعامدىق كولىك قىزمەتىن پايدالانعانى ءۇشىن جولاۋشى جولاقىنى ايالدامالار سانى نەگىزىندە تولەيدى. وسىعان وراي, ەندى جولاۋشىلار ءتۇرلى باعىتتاعى كولىكتەرگە اۋىسىپ وتىرۋ مۇمكىندىگىنە يە بولادى. بۇل ولاردىڭ ۋاقىتى مەن اقشاسىن ۇنەمدەۋگە مۇمكىندىك بەرەدى. ال جولاۋشىلار اعىنى قالالىق باعدارلار بويىنشا بىركەلكى بولىنەدى. بۇل, تۇپتەپ كەلگەندە, جولاۋشىلاردى تاسىمالداۋ قىزمەتىنىڭ تارتىمدىلىعى مەن قولايلىلىعىن ارتتىرادى.
بيلەت ساتۋ جۇيەسىنىڭ جۇمىسىنا توقتالساق, بۇل رەتتە قالا مەن ونىڭ تۇرعىندارىنا بىرقاتار ارتىقشىلىقتار قاراستىرىلعان. اتاپ ايتساق, جولاقىنى تولەۋ كونتاكتىسىز كارتالارمەن بيلەت ساتۋ اۆتوماتتارى ارقىلى, ياعني, ەلەكتروندى تۇردە جۇزەگە اسىرىلادى. العاشقى كەزدە جولاقى بيلەتىن ساتىپ الۋدىڭ 4 ءتۇرى ەنگىزىلەدى. ولار: زەينەتكەرلەرگە, مۇگەدەكتەر مەن مەكتەپ وقۋشىلارىنا جانە ستۋدەنتتەرگە بەرىلەتىن جەكە پلاستيكالىق كارتا; بارلىق توپتاعى تۇرعىندارعا قولجەتىمدى كادۋىلگى تولتىرىلاتىن پلاستيكالىق كارتا; كونتاكتىسىز قاعاز بيلەت – نەگىزگى تۇتىنۋشىلارى قالا قوناقتارى; اۆتوبۋس جۇرگىزۋشىسىنەن قولما-قول اقشا ساتىپ الىناتىن كادۋىلگى قاعاز بيلەت.
قازىرگى كەزدە جوبانىڭ زاڭدى قۇرىلىمىنا جانە قارجى كەستەسىنە بايلانىستى دايىندىق جۇمىستارى قولعا الىنعان كورىنەدى.
گۇلبارشىن وكەشقىزى
