«استانا اقشامى» جانە «ۆەچەرنيايا استانا» گازەتتەرىنىڭ 30 جىلدىعى اياسىندا ءوتتى.
جۋرناليستەر كوپشىلىك ءۇشىن قولىندا قالامى مەن ميكروفونىن ۇستاعان ماماندار عانا بولىپ كورىنەتىنى انىق. ال شىن مانىندە سول جۋرناليستەر جان-جاقتى بولاتىنىن, ونەر مەن سپورتقا دا ەرەكشە قابىلەتتى ەكەنىن ەسكەرە قويمايدى. بيىل جەتىنشى رەت ۇيىمداستىرىلعان باق ليگا چەمپيوناتى وسى ءسوزىمىزدىڭ دالەلى دەسەك قاتەلەسپەيمىز.
باق ليگا چەمپيوناتى جىل سايىن ەكى رەت جۋرناليستەردىڭ باسىن قوساتىن تارتىستى دا قىزىقتى باسەكەگە اينالدى.
بيىلعى چەمپيونات «ELORDA AQPARAT» جشس قولداۋىمەن ۇيىمداستىرىلىپ, جارىس جەڭىمپازدارى مەن جۇلدەگەرلەرىنە, ۇزدىك ويىنشىلارعا سىيلىقتار تاعايىندالدى. ءۇش ايعا سوزىلعان جارىستىڭ قورىتىندىسىندا, «ا» ليگاسىندا «حابار» – جەڭىمپاز, «قازاق راديولارى» – كۇمىس جۇلدەگەر, «استانا تۆ» كومانداسى قولا مەدال ەنشىلەدى.
ال بۇعان دەيىن باق ليگا چەمپيوناتىنىڭ «ۆ» ليگاسىندا چەمپيون بولعان, «ا» ليگاسىندا كۇمىس پەن قولا جۇلدەگەر اتانعان «Elorda Aqparat» كومانداسى ەكىنشى ورىن ءۇشىن «حابار 24» كومانداسىمەن كەزدەسىپ, «ەلوردالىقتار» 7:2 ەسەبىمەن جەڭىسكە جەتىپ, كۇمىس جۇلدەگەر اتاندى. باس جۇلدەنى چەمپيوناتقا ءبىرىنشى رەت قوسىلعان قورعانىس مينيسترلىگىنىڭ «ديك مو» كومانداسى يەلەندى. باق ليگا چەمپيوناتىنىڭ ۇزدىك ويىنشىلارى قاتارىندا ەلتاي نۇرعازين مەن ايان بەكجانۇلى سەكىلدى ارىپتەستەرىمىزدىڭ اتالعانى «Elorda Aqparat» ۇجىمى ءۇشىن ماقتانىش بولعانى ءسوزسىز.
چەمپيوناتتىڭ جەڭىمپازدارى مەن جۇلدەگەرلەرىن اتاقتى فۋتبولشى, قازاقستان ۇلتتىق قۇراماسىنىڭ جانە «استانا» فۋتبول كومانداسىنىڭ ەكس-كاپيتانى قايرات نۇرداۋلەتوۆ پەن «Elorda Aqparat» جشس كومپانياسىنىڭ ديرەكتورى جارقىن ءجۇمادىلوۆ ماراپاتتادى.
سونىمەن, ءۇش ايعا جالعاسقان باق ليگا چەمپيوناتىنىڭ ءبىرىنشى ماۋسىمى دا مارەسىنە جەتتى. ال جازعى جارىس COVID-19 جاعدايىنا بايلانىستى وتپەي قالدى. ەڭ باستىسى, جۋرناليستەر باسەكەسى جالعاسا بەرسىن دەمەكپىز.
