باق وكىلدەرىنىڭ دوپ دوداسى

بايلانىس جانە اقپارات قىزمەتكەرلەرى كۇنى قارساڭىندا ەلوردادا استانا قالاسى اكىمدىگىنىڭ ۇيىمداستىرۋىمەن بۇقارالىق اقپارات قۇرالدارى وكىلدەرىنىڭ اراسىندا شاعىن فۋتبولدان تۋرنير ءوتتى. ق.مۇڭايتپاسوۆ اتىنداعى ستاديوندا وتكەن ءداستۇرلى سپورت شاراسىن ىشكى ساياسات باسقارماسىنىڭ باسشىسى ەرلان قاناليموۆ اشىپ, جۋرناليس­تەر قاۋىمىن ءتول مەرەكەلەرىمەن قۇتتىقتادى.

اتالمىش تۋرنيرگە قاتىسۋعا نيەت تانىتقان جۋرناليس­تەردىڭ قاتارى كوبەيىپ كەلەدى. بيىل قالا اكىمىنىڭ كۋبوگىن 13 كوماندا ساراپقا سالدى. اتاپ ايتساق, «ەگەمەن قازاقستان», «قازاقستان», «قازاق راديوسى», «قازسپورت», «حابار», «حابار 24», «ەلارنا», «استانا», «Elorda Aqparat», «جەڭىس», «قازمەديا», «Dixinews» جانە «كوركەم» كوماندالارى ءتورت توپقا ءبولىنىپ, باق سىناستى.
ءار توپتان ۇپاي سانىمەن كوش باستاعان قوس كوماندا شيرەك فينالعا شىقتى. بۇل سىننان وتكەن «ەگەمەن قازاقستان», «حابار», «قازاق راديوسى», «Elorda Aqparat» كوماندالارى ءوزارا جۇلدەلى ورىنداردى تالاستى. ناتيجەسىندە فينالدا «ەگەمەن قازاقستان» «قازاق راديوسى» كومانداسىن 1:0 ەسەبىن جەڭىپ, چەمپيون اتاندى. ال ءۇشىنشى ورىن ءۇشىن بولعان ويىندا «Elorda Aqparat» «حابار» كومانداسىنا جول بەردى.
– قاتىسۋشى كوماندالار جەرەبە سالۋ بويىنشا 4 توپقا ءبولىندى. كوماندالار الدىمەن توپتىق كەزەڭدە ويناپ, كەيىن پلەي-­وفف دەڭگەيىنە كوشتى. ويىن بارىسىندا باق وكىلدەرى اراسىنان «حابار» تەلەارناسىنىڭ كومانداسى جاقسى ناتيجە كورسەتىپ, العا شىقتى. سونداي-اق, «قازاق راديوسىنىڭ» كومانداسى مەن «Elorda Aqparat» كوماندالارىنىڭ قارقىنى كۇشتى بولدى, –دەيدى ءتۋرنيردىڭ باس تورەشىسى داۋلەت حامزين.
سونىمەن قاتار, بۇل جارىستىڭ ۇزدىك ويىنشىلارى دا ماراپاتتالدى: ەڭ ۇزدىك قاقپاشى – قۋاندىق ءالىمجانوۆ («Elorda Aqparat»), ەڭ ۇزدىك قورعاۋشى ەرمەك تورەنيازوۆ («قازسپورت») جانە ەڭ ۇزدىك ويىنشى – مارعۇلان يبراەۆ («جەڭىس»).
جاقسى ۇردىسكە اينالعان بۇل ءتۋرنيردىڭ جەڭىمپازدارىن ءبىر كۇندە انىقتاۋ وڭاي بولمادى. ويتكەنى قاتىسۋشىلاردىڭ كوپتىگىنەن تاڭەرتەڭ ەرتە باستالعان دودا ءتۇس قايتا ءتامامدالدى. وعان دەيىن ءۇزىلىسسىز دوپ تەپكەن جۋرناليستەر اقتىق سايىسقا كەلگەندە ابدەن شارشاپ قالدى. سوندىقتان كەلەسى جولى كوماندالار سانىنىڭ ارتقانىن ەسكەرىپ, ءتۋرنيردى ەكى كۇنگە ءبولىپ وتكىزگەن ءجون.

ورىنبەك وتەمۇرات