مۇعالىمدەر كۇنىنە وراي ەلورداداعى №78 مەكتەپ-گيمنازياسىنىڭ وقۋشىلارى «قۇرمەت بەلگىسى» وردەنى جانە ى. التىنسارين توسبەلگىسىنىڭ يەگەرى, قر ءبىلىم بەرۋ ءىسىنىڭ قۇرمەتتى قىزمەتكەرى, قر مادەنيەت قايراتكەرى وسپان سۇلەيمەنۇلىمەن كەزدەستى.
«باقىتقا جەت, جاس ۇرپاق» تاقىرىبىنداعى تاعىلىمدى كەشتە ونەر سالاسىندا 50 جىل ۇستازدىق ەتكەن وسپان سۇلەيمەنۇلى بالالارعا ونەگە بولارلىق اڭگىمەلەر ايتتى. اقىن, سازگەر, كۇيشى سەكىلدى جەتى ءتۇرلى ونەردى بويىنا سىڭىرگەن سەگىز قىرلى, ءبىر سىرلى مۇعالىم ءوزىنىڭ ومىرلىك جەتىستىكتەرىن ۇلكەندەر تاربيەسىمەن, جاقسى ورتامەن بايلانىستىرادى.
– ەگەمەندىگىمىزدىڭ ارقاسىندا استانا تورىندە قاسيەتتى ءبىلىم ورداسىندا ءدارىس الىپ جاتقان سىزدەر وتە باقىتتىسىزدار. الدارىڭىزدا نەشە ءتۇرلى جاڭا تەحنولوگيالار بار. ال ءبىزدىڭ زاماندا ولاردىڭ ەشبىرى بولماعان. مايشامدى جاعىپ قويىپ كىتاپ وقيتىنبىز. ونى سىزدەر بىلمەيسىزدەر, بىلمەي-اق تا قويىڭىزدار. قازىر جارىق تا بار, ءتۇرلى كىتاپ تا بار, – دەيدى ۇستاز.
«اتالارعا ءجيى ەرىپ جۇرىڭىزدەر, ۇلكەندەردىڭ ورتاسىنان قالماڭىزدار. سول كىسىلەردىڭ اڭگىمەلەرىن ىقىلاسپەن تىڭداڭىزدار» دەگەن اقىلىن ايتتى.
شاكىرتتەر مەكتەپكە كەلگەن قۇرمەتتى قوناققا وزدەرىن قىزىقتىرعان سۇراقتارىن قويىپ, كوپتى كورگەن ۇستازدىڭ بالا كەزى مەن جاستىق شاعى تۋرالى ەستەلىكتەردى تىڭدادى.
ۇستاز وقۋشىلار الدىندا جەتىستىكتەرىمەن ماقتانۋدى ءجون كورمەدى. كەزدەسۋ باعدارلاماسىن ولارمەن تىلدەسۋگە, ارمان-ماقساتتارىن بىلۋگە باعىتتادى. جاس جەتكىنشەكتەردىڭ ونەرىن دە تاماشالاپ, «وركەنىڭ ءوسسىن», «ونەرىڭ ورگە ءجۇزسىن» دەپ باتاسىن بەردى.
ءوزى دە جاس شاعىندا نۇرعيسا تىلەنديەۆتىڭ دارىستەرىن تىڭداپ, اق باتاسىن العان ەكەن. اتاقتى كۇيشى كومپوزيتوردىڭ الدىندا ورىنداعان, ءسوزى مەن ءانىن ءوزى شىعارعان «اتا وسيەت» اتتى جىرىن دومبىراعا قوسىپ ايتىپ بەردى. بۇل ولەڭنىڭ «اتامنىڭ ۇمىتپايمىن ايتقان ءسوزىن» دەگەن جولدارى كوپشىلىككە تەرەڭ وي سالدى دەگەن ۇمىتتەمىز.
ءمادينا جاقىپ
