رەسەيدىڭ ەكاتەرينبۋرگ قالاسىندا بوكستان كەزەكتى الەم چەمپيوناتى مارەسىنە جەتتى. بۇل – الداعى جىلى توكيودا وتەتىن جازعى وليمپيادا ويىندارى قارساڭىنداعى سىندارلى جارىس بولعانى ءسوزسىز. بايراقتى باسەكەدە سىنعا تۇسكەن قازاقستان قۇراماسى بۇل جولى دا الەمدەگى مىقتىلاردىڭ ءبىرى ەكەنىن دالەلدەپ قايتتى.
«ەكاتەرينبۋرگ ەكسپو» كەشەنىندە كەرىلگەن شارشى الاڭعا الەمنىڭ 100-گە جۋىق ەلىنەن بوكسشىلار شىقتى. بيىلعى جارىستىڭ ءبىر ايتارلىق ەرەكشەلىگى, چەمپيونات باعدارلاماسى وليمپيادالىق باعدارلاماعا سايكەس 8 سالماق دارەجەسى بويىنشا ءوتتى. جۇلدە سانى وسىلايشا قىسقارتىلعانىنا قاراي, ءار جەكپە-جەكتىڭ ماڭىزى ارتا ءتۇستى.
چەمپيوناتتىڭ العاشقى ون كۇنىندە ىرىكتەۋ جەكپە-جەكتەرى ءوتىپ, جارتىلاي فينالعا كىل مىقتىلار ىرىكتەلىپ شىقتى. وكىنىشكە قاراي, 63 كەلى سالماقتا ونەر كورسەتكەن زاكير سافيۋللين مەن 57 كەلى سالماقتا ونەر كورسەتكەن 2017 جىلى گامبۋرگتە الەم چەمپيونى اتانعان قايرات ەراليەۆ شيرەك فينالدان وتە الماي قالدى. العاشقىسى وسىعان دەيىن ەكى دۇركىن, سونداي-اق ەكاتەرينبۋرگتە دە الەم چەمپيونى اتانعان كۋبالىق ەندي گومەسكە جول بەرسە, قازاقستاندىق الەم چەمپيونى وسى بىرىنشىلىكتىڭ جەڭىمپازى بولعان وزبەك بوكسشىسى ميرزازيبەك ميرزاحاليلوۆپەن ايقاستا قاباعىن جارىپ الىپ, تەحنيكالىق جەڭىلىسكە ۇشىرادى. ال قالعان 6 بوكسشىمىز امان-ەسەن, ايقىن سەنىمدىلىكپەن جارتىلاي فينالعا ءوتىپ, ۇلتتىق قۇرامانىڭ قورجىنىنا 6 مەدالدى سالىپ قويعان.
ال نەگىزگى قارسىلاستارىمىزدان, اتاپ ايتقاندا, كۋبا قۇراماسىنان – 3, انگليا قۇراماسىنان – 3, رەسەي قۇراماسىنان – 4, وزبەكستان قۇراماسىنان 5 بوكسشى باس جۇلدەگە ۇمىتكەرلەردىڭ قاتارىنا تولىقتىردى.
شيرەك فينالدان كەيىن بوكستان قازاقستان رەسپۋبليكاسىنىڭ مەملەكەتتىك جاتتىقتىرۋشىسى بولات ابدراحمانوۆ الداعى شەشۋشى كەزدەسۋلەر جايىندا ءوز پىكىرىن بىلايشا ءبىلدىردى: «ءبىزدىڭ بوكسشىلاردىڭ ازىرگە كورسەتكىشى جامان ەمەس. 8 سالماقتا 6 بوكسشىمىز – جۇلدەگەرلەر قاتارىندا. ەندىگى ماقسات, سول مەدالداردىڭ ساپاسىندا بولماق. سىرالعى قارسىلاستارىمىز دا قالىپ جاتقان جوق. سوندىقتان جىگىتتەرىمىزدى بارىنشا قايراپ, جەڭىسكە جىگەرلەندىرەمىز. قىسقاشا ايتقاندا, ەڭ شەشۋشى ايقاستار الدىمىزدا».
ايتقانداي-اق, ناعىز جان الىسىپ, جان بەرىسكەن ايقاستار جارتىلاي فينالدان باستالدى. ءبىرىنشى جەكپە-جەككە شىققان ساكەن بيبوسىنوۆ ءۇندىستان بوكسشىسىنان ايلاسىن اسىرا المادى. ودان كەيىنگى ابىلايحان ءجۇسىپوۆ تە (69 كەلى) قانشا تىرىسقانىمەن, رەسەيلىك قۇرامانىڭ كاپيتانى 33 جاسار اندرەي زامكوۆويعا ەسە جىبەرىپ الدى. 75 كەلىدە سىنعا تۇسكەن تۇرسىنباي قۇلاحمەت تە فيليپپين بوكسشىسىنا جول بەرىپ قويدى. ال ۆاسيلي لەۆيتتىڭ جەڭەتىنىنە كادىمگىدەي سەنىمدى بولعان ەدىك. بىراق تورەشىلەر جاعى فيليپپين بوكسشىسى جەڭدى دەپ شەشتى. ءسويتىپ بىرىنەن سوڭ ءبىرى ءتورت بوكسشىمىز جەڭىلىس تاپقاننان كەيىن ەڭسەمىز ءتۇسىپ كەتكەن ەدى. كەلەسى شىعاتىن بەكزات نۇرداۋلەتوۆ (81 كەلى) شيرەك فينالداعى قارسىلاسىن نوكداۋنمەن ۇتىپ, كوڭىلىمىزدى ەداۋىر كوتەرىپ تاستاعان ەدى. الايدا ونىڭ جارتىلاي فينالداعى قارسىلاسى الەمنىڭ 4 دۇركىن چەمپيونى, وليمپيادا ويىندارىنىڭ جەڭىمپازى لا كرۋس ەكەنىن بىلگەندە بۇل سالماقتا دا قولانى قاناعات تۇتامىز-اۋ دەگەن ويدىڭ تۇڭعيىعىنا ءتۇسىپ كەتكەنىمىزدى نەسىنە جاسىرايىق. الايدا بەكزاتىمىز ايدى اسپاننان ءبىر-اق شىعاردى! «تاياق جەمەيتىن» تاكتيكاسىن ۇستاناتىن كۋبالىق قابىلان بۇل جولى قازاق بالاسىنىڭ قارقىندى شابۋىلىنا توتەپ بەرە المادى. ەكىنشى راۋندتا لا كرۋس شىقشىتىنا ءدوپ تيگەن سوققىنى كوتەرە الماي قۇلادى, ابىروي بولعاندا شارشى الاڭنىڭ ارقانى قۇتقارىپ قالدى, ايتپەگەندە كۋبالىقتىڭ اياعى اسپاننان كەلەر مە ەدى… ءسويتىپ بەكزات ءۇشىنشى راۋندتا دا باسىمدىعىن دالەلدەپ, بەسىنشى رەت الەم چەمپيونى اتانامىن دەپ جۇرگەن بوكسشىنىڭ ارمانىن كۇل-پارشا ەتتى. ال ەڭ اۋىر سالماقتاعى, قۇرامانىڭ كاپيتانى قامشىبەك قونقاباەۆ جارتىلاي فينالدا اۆستراليا بوكسشىسى جيۋستين ءحۋنيدى قينالماي ۇتتى. ءدال وسى جەكپە-جەكتەن كەيىن وزبەكتىڭ الىپ بوكسشىسى جالولوۆ اقش بوكسشىسىن ەسىن تاندىرعان. جەدەل كلينيكاعا جەتكىزىلگەن توررەستىڭ ەكى ساعاتتان كەيىن عانا ەسىن جيعانى تۋرالى حابار ەستىدىك.
سونىمەن ءتورت قولانى قانجىعاعا بايلاپ قويىپ, اقتىق ايقاستارعا كەلدىك. اتاقتى لا كرۋستى تىزە بۇكتىرگەن بەكزاتتىڭ قارسىلاسى وزبەك بوكسشىسى ديلشوتبەك رۋزماتوۆ – ناعىز قارا كۇشتىڭ يەسى. ءار جەكپە-جەگىنە شىعا سالا ۇرىپ قۇلاتۋعا ۇمتىلادى. ال ءبىزدىڭ بەكزاتتىڭ دا سوققىسى دا وسال ەمەس. ءسويتىپ, ەكى مىقتىنىڭ اراسىندا الاپات ايقاس باستالىپ كەتتى. دەگەنىمىزدەي بولدى, وزبەك بوكسشىسى بىردەن العا وڭمەندەي بەردى. بەكزات بولسا, جەكپە-جەكتى ادەتتەگىدەي بايىپپەن باستادى. ءبىرىنشى راۋند ەكى جاقتى «بارلاۋمەن» ءوتتى. ەكىنشى راۋندتا ءبىزدىڭ جىگىت وڭمەندەگەن وزبەكتى بىرنەشە رەت قارسى سوققىمەن قارسى الدى. ءسىرا, سوققىنىڭ سالماعىن سەزىندى مە, ەكپىنى باسىلا بەردى. وسىنى اڭعارعان بەكزات تاعى ءبىر-ەكى رەت شىقشىتتان شاق-شاق ەتكىزدى. ارينە, رۋزماتوۆ تا قاراپ قالىپ جاتقان جوق, جەڭىستىڭ قولىنان سۋساپ بارا جاتقانىن بىلگەن سايىن جانتالاسا سەرمەيدى. الايدا ءبىر باسىندا قايراتى دا, نامىسى دا قايناپ جاتقان قازاقتىڭ جاس بوكسشىسى ءۇشىنشى راۋندتا دا ادەمى توبەلەسىپ شىقتى. ءسويتىپ بەكزات نۇرداۋلەتوۆ الەم چەمپيونى اتاندى. قامشىبەك قونقاباەۆ تا ەرلىككە ءتان ونەر كورسەتتى. بۇعان دەيىنگى قارسىلاستارىنىڭ ءبارىن ايقىن باسىمدىلىقپەن ۇتىپ كەلگەن وزبەك بوكسشىسى باحودير جالولوۆپەن قاسىق قانى قالعانشا شايقاستى. بىراق تورەشىلەر شەشىمى قامشىبەكتىڭ كۇمىس جۇلدەگەر بولعانىن ءبىلدىردى.
سونىمەن, ەكاتەرينبۋرگتەگى الەم چەمپيوناتىنان قازاقستان قۇراماسى 1 التىن, 1 كۇمىس جانە 4 قولا مەدالمەن ورالدى. وسىلايشا قازاق بوكسشىلارى الەمدەگى ۇزدىك قۇرامالاردىڭ ءبىرى ەكەنىن, سونىمەن قاتار بوكستىڭ ءوز ەلىمىزدە ۇلتتىق ماقتانىشقا اينالىپ وتىرعانىن تاعى ءبىر دالەلدەپ قايتتى.
الەم چەمپيوناتىنىڭ قورىتىندىسى بويىنشا كوماندالىق ەسەپتە وزبەكستان قۇراماسى ءبىرىنشى (3 التىن, 2 كۇمىس), رەسەي قۇراماسى ەكىنشى (3 التىن, 1 قولا), قازاقستان قۇراماسى ءۇشىنشى (1 التىن, 1 كۇمىس, 4 قولا) ورىننان كورىندى. كۋبا قۇراماسى (1 التىن, 1 كۇمىس, 1 قولا) ءتورتىنشى ورىنعا تابان تىرەدى.
نۇر-سۇلتان – ەكاتەرينبۋرگ – نۇر-سۇلتان
