«باتىر مايداندا, بولات قايناۋدا شىنىعادى» دەگەندەي, «بارىس» كومانداسىنىڭ ناعىز شىڭدالار تۇسى – شيرەك فينال. استانالىقتار قۇرلىقتىق حوككەي ليگاسىنىڭ پلەي-وفف كەزەڭىندە چەليابىلىك «تراكتورمەن» تىرەسىپ, باسىمدىق تانىتتى. ەندى كەلەسى قارسىلاسى – ماگنيتوگورسك قالاسىنىڭ «مەتاللۋرگ» كلۋبى.
«بارىس» كومانداسى «تراكتورمەن» قحل-دىڭ 1/8 فينالىنىڭ اياسىندا التى رەت كەزدەسىپ, اقىرى اسىعى الشىسىنان ءتۇستى. استانادا وتكەن سوڭعى ماتچ 2:1 ەسەبىمەن ايدىن يەلەرىنىڭ جەڭىسىمەن اياقتالدى.
ويىندا ەسەپتى الدىمەن قوناقتار اشقانىمەن, ەكىنشى اينالىمدا «بارىس» باسىپ وزدى. وسىلايشا, قارسىلاستارىن جالپى سەريادا 4:2 ەسەبىمەن جەڭىپ, كەلەسى كەزەڭگە ءوتتى.
ال شيرەك فينالداعى تىسقاققان قارسىلاسى «مەتاللۋرگ» قىتايلىق «كۋنلۋن رەد ستار» كومانداسىن جارىس جولىنان شىعاردى.
– پلەي-وفف كەزەڭىندە شامالاس ەكى كوماندا اياماي الىستى. بابىمىز كەلىسكەنىنىڭ ۇستىنە باعىمىز جاندى دەپ تە ايتۋعا بولادى. كوماندادا جەڭىسكە تويماعان ءالى تالاي ساقا جىگىتتەرىمىز بار. سوندىقتان «مەتاللۋرگتىڭ» مىقتى ەكەنىن بىلسەك تە, ايلامىزدى اسىرامىز دەپ ويلايمىن, – دەيدى «بارىستىڭ» باس باپكەرى ەدۋارد زانكوۆەتس.
«بارىس» كلۋبى «مەتاللۋرگتى» استانادا 13 جانە 15 ناۋرىز كۇندەرى قابىلدايدى. ماتچ بيلەتتەرى 8 ناۋرىزدان باستاپ ساتىلا باستايدى. ال ابونەمەنت يەلەرى 7 ناۋرىزدان باستاپ تاماشالايتىن ورىندارىن ناقتىلاي الادى.
ورىنبەك وتەمۇرات
