الماتى قالاسىندا ومىربەك جولداسبەكوۆ اتىنداعى ماتەماتيكا جانە مەحانيكادان زەرتتەۋ جۇمىستارىنىڭ ءVى حالىقارالىق بايقاۋى ءوز مارەسىنە جەتتى. تارتىستى باسەكەدە ەلوردالىق وقۋشىلار جوعارى ناتيجە كورسەتىپ, جۇلدەلى ورىنداردى ەنشىلەدى.
ءبىلىم دوداسىندا استاناداعى «كوگىلدىر جەلكەن» قازاق-تۇرىك ليتسەيىنەن, «ميراس» حالىقارالىق مەكتەبىنەن جانە №66, №17, №75, №51, №4 مەكتەپتەردەن 22 شاكىرت باق سىنادى. مۇنىڭ الدىندا تالانتتى ۇل-قىزدار جارىستىڭ ىرىكتەۋ كەزەڭىنەن سۇرىنبەي وتكەن-ءدى. عىلىمي جوبالارىن بارىن سالا قورعاعان ۇلاندار قازىلار القاسىنىڭ كوڭىلىنەن شىعىپ, بيىك تۇعىردان كورىندى. اتاپ ايتقاندا, استانالىق 5 وقۋشى – ءبىرىنشى, 8 وقۋشى – ەكىنشى جانە 5 وقۋشى – ءۇشىنشى ورىندى قانجىعاعا بايلادى.
– ءداستۇرلى ءتۋرنيردىڭ باستى مىندەتى – جاستاردىڭ ماتەماتيكا عىلىمىنا دەگەن قىزىعۋشىلىعىن ارتتىرىپ, جاڭا جەتىستىكتەرگە باعىتتاۋ. بيىلعى سايىس حالىقارالىق دەڭگەيدە ۇيىمداستىرىلدى. وعان قازاقستاننىڭ 16 ءوڭىرى جانە ازەربايجان مەن قىرعىزستان ەلدەرىنەن كەلگەن جوعارى سىنىپ شاكىرتتەرى قاتىستى. بايگەنىڭ قانشالىقتى قيىن بولعانى وسىدان-اق اڭعارىلادى. ايتكەنمەن, ءبىزدىڭ قابىلەتتى بالالارىمىز بىلىمدەرىن دالەلدەپ, ارتىلعان ءۇمىتتىڭ ۇدەسىنەن شىقتى, – دەيدى «استانا دارىنى» رەسپۋبليكالىق عىلىمي-پراكتيكالىق ورتالىعىنىڭ ادىسكەرى ءراش ەرماعانبەتوۆا.
ماتەريالدى “استانا اقشامى” گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.
