ەلىمىزدە مۇلىكتى جاريا ەتۋ ناۋقانى جالعاسىپ جاتىر. استانادا اتالعان اكتسيانىڭ بارىسىن ءار اۋداندا قۇرىلعان كوميسسيالار باقىلاپ وتىر. سارىارقا اۋدانى اكىمىنىڭ ورىنباسارى, اۋدانداعى مۇلىكتى جاريا ەتۋ ناۋقانىنا جاۋاپتى ريشات تۇردىبەكوۆ ءبىزدى اتالمىش اۋماقتا وسى كۇندەرگە دەيىن اتقارىلعان جۇمىسپەن تانىستىردى.
ونىڭ ايتۋىنشا, بۇگىنگى كۇنگە دەيىن اۋدانداعى مۇلىكتىڭ جاريا ەتىلۋىن قارايتىن كوميسسياعا 5641 نىسان بويىنشا 2087 ارىز كەلىپ تۇسكەن. سونىڭ ىشىندە 5479 جىلجىمايتىن مۇلىككە قاتىستى 2019 ارىز قارالىپ, 2347 مۇلىك بويىنشا وڭ شەشىم شىعارىلدى. ۇسىنىلعان قۇجاتتاردىڭ قر زاڭنامالارىنا سايكەس كەلمەگەندىكتەن جانە تولىق بولماۋىنان 2735 نىسان بويىنشا 1160 ارىز كەرى قايتارىلدى.
«وسى رەتتە مىنانى ايتا كەتەيىن: مۇلىكتەرىن جاريا ەتكىسى كەلەتىن ادامدار كوميسسياعا سايكەس ءوتىنىشتى, جەكە باسىن كۋالاندىراتىن قۇجاتتىڭ ءتۇپنۇسقاسىن كورسەتىپ, ونىڭ كوشىرمەسىن وتكىزۋى كەرەك. سونداي-اق, عيماراتتار مەن قۇرىلىستاردىڭ قۇرىلىس نورمالارى مەن ەرەجەلەرىنە ءسايكەستىگىن تەحنيكالىق تەكسەرۋدى جۇزەگە اسىراتىن اتتەستاتتالعان ساراپشىنىڭ قورىتىندىسى مەن جىلجىمايتىن مۇلىكتىڭ تەحنيكالىق پاسپورتىن تاپسىرۋى ءتيىس», دەگەن ر. تۇردىبەكوۆ كەرى قايتارىلعان قۇجاتتاردى تولىقتىرىپ, قايتا تاپسىرۋعا جانە كوميسسيا شەشىمىنە نەمەسە مۇلىكتى جاريا ەتۋ بارىسىندا تۋىنداعان داۋلارعا قاتىستى قر زاڭنامالارىنا سايكەس سوتقا شاعىمدانۋعا بولاتىنىن ايتتى.
اۋدانداعى كوميسسيا توراعاسىنىڭ سوزىنشە, حالىق نەگىزىنەن تۇرعىن ۇيلەردى, تۇرعىن نەمەسە تۇرعىن ەمەس جايلاردى, شارۋاشىلىق قۇرىلىستاردى, گاراجداردى زاڭداستىرعىسى كەلەدى. كەلىپ تۇسكەن ارىزدار كوبىنەسى وسى مۇلىكتەرگە قاتىستى بولعان. كوميسسيا شەشىم قابىلداردا عيماراتپەن بەلگىلى ءبىر قۇرىلىستىڭ قۇرىلىس نورمالارى مەن ەرەجەلەرىنە سايكەستىگىنە, قۇرىلىستىڭ 2014 جىلدىڭ 1 قىركۇيەگىنە دەيىن سالىنۋىنا, سونداي-اق, مۇلىكتى جاريا ەتۋگە ارىز بەرگەن ادامنىڭ يەلىگىندەگى جەر تەلىمىنىڭ ماقساتتى پايدالانۋىنا ەرەكشە نازار اۋدارادى.
مۇلىكتى جاريا ەتۋگە قاتىستى ارىزدار مەن سۇراقتار استانا اكىمدىگى مەن اۋدان اكىمدىگىنىڭ سايتتارىنا, قالا اكىمدىگىنىڭ كەڭسەسى ارقىلى دا تۇسۋدە ەكەن. وسىنداي جولمەن 36 ءوتىنىش كەلىپ ءتۇسىپ, ولارعا ءتيىستى جاۋاپتار بەرىلدى.
ر. تۇردىبەكوۆ اۋدان اكىمدىگى مۇلىكتى (اقشادان وزگە) جاريا ەتۋ بويىنشا ارىزداردى اتالعان ناۋقان اياقتالعانشا, ياعني بيىلعى جىلدىڭ 30 قاراشاسىنا دەيىن قابىلدايتىنىن, سۇراقتار تۋىندايتىن بولسا, 55-66-02 تەلەفون نومەرىنە حابارلاسۋعا بولاتىنىن ايتادى.
امانعالي قالجانوۆ
ماتەريالدى “استانا اقشامى” گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.
