بۇيرەك – اعزانىڭ قامقورشىسى
ادامنىڭ قوس بۇيرەگى – قانداعى بارلىق قاجەتسىز زاتتاردى ءسۇزىپ, تازارتاتىن ەڭ قاجەتتى مۇشە. ال ەگەر اعزادا قانداي دا ءبىر كادەگە اساتىن زيانسىز سۇيىقتىقتار كەزدەسسە, بۇيرەكتەگى تالشىقتار ولاردى ساقتاپ قويادى. الدەقانداي جاعدايمەن ادام سۋعا شولىركەپ, قينالعان ساتتە بۇيرەك الگى ساقتاپ قويعان سۇيىقتىقتاردى شىعارىپ, تىرشىلىكتى ءارى قاراي جالعاستىرۋعا سەبەپ بولادى. بۇيرەكتى اعزانىڭ قامقورشىسى دەيتىنىمىز دە سوندىقتان. وكىنىشكە قاراي, بۇيرەكتىڭ دەرتىنە ۇشىراعان جاندار ەلىمىزدە بارشىلىق. كوپشىلىگى اۋرۋىن ەلەمەي ءجۇرىپ, بۇيرەگى ابدەن ىستەن شىققاندا دارىگەرگە قارالادى ەكەن. بۇگىندە استانادا بۇيرەك دەرتىنىڭ اۋىر تۇرىنە شالدىققان 242 ناۋقاس تىركەلگەن.
دۇنيەجۇزىلىك بۇيرەك اۋرۋلارىنا قارسى كۇرەس كۇنىنە بايلانىستى ەلورداداعى №1 قالالىق اۋرۋحانادا اشىق ەسىك كۇنى ءوتتى. وندا استانا قالاسىنىڭ باس نەفرولوگى دۋمان تورەبەكوۆ سىرقاتتىڭ الدىن الۋ, ونىڭ العاشقى بەلگىلەرى جونىندە اڭگىمە ءوربىتتى. ال قالاداعى بىلىكتى دارىگەر-نەفرولوگتار بۇيرەگى اۋىراتىن تۇرعىنداردى قابىلداپ, ولارعا ءتيىستى اقىل-كەڭەستەرىن ايتتى.
دۋمان تورەبەكوۆتىڭ ايتۋىنشا, بۇيرەكتىڭ دەرتىن العاشقى ساتىسىندا ەمدەگەن جەڭىلىرەك. ال سىرقات اسقىنعان جاعدايدا ەڭبەككە جارامسىزدىققا, ءتىپتى, مۇگەدەكتىككە دەيىن اكەلۋى مۇمكىن. بۇيرەك اۋرۋلارى جۇرەككە سالماق ءتۇسىرىپ, 30 پايىزىندا ينفاركت پەن ينسۋلتتىڭ سەبەبى بولادى ەكەن. سوندىقتان جۇرەگى اۋىراتىندار, قان قىسىمى بار جاندار ءبۇيرەگىن دە تەكسەرتىپ العانى ابزال.
باس نەفرولوگتىڭ كەلتىرگەن مالىمەتى بويىنشا, بۇگىندە ەلىمىزدە 3 مىڭعا جۋىق ادام بۇيرەك ترانسپلانتاتسياسىنا ءزارۋ. 3182 ەمدەلۋشى جاساندى بۇيرەكپەن ءجۇر. سونىڭ ىشىندە 243-ءى – ەلوردالىقتار. ال استانادا 112 ەمدەلۋشى ترانسپلانتاتسيادان كەيىنگى باقىلاۋدا.
ءبىر ەسكەرەرلىگى, بۇيرەكتىڭ اۋرۋى باستاپقى كەزدە بىلىنبەيدى ەكەن. ونىڭ العاشقى بەلگىلەرى: السىزدىك, ۇيقىسىزدىق, تاماققا تابەتتىڭ بولماۋى. بۇعان ەشكىم ءمان بەرە بەرمەيدى. اۋرۋدىڭ اسقىنىپ كەتەتىنى دە سودان.
سوزىلمالى بۇيرەك اۋرۋىن ەرتە انىقتاۋ ءۇشىن قالالىق ەمحانالاردا اقپاراتتىق-ءتۇسىندىرۋ جۇمىستارى جۇرگىزىلگەن. مۇنداي جۇمىستار الداعى ۋاقىتتا دا جالعاسىن تاپپاق.
ماتەريالدى “استانا اقشامى” گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.