قازىرگى تاڭدا ەلىمىزدىڭ قاي قالاسىندا بولماسىن تۇرعىن ءۇي الۋ ماسەلەسى وزەكتى بولىپ وتىر. ەلوردا تۇرعىندارى باسپانالى بولۋ جولىندا ءبىرشاما قيىندىق پەن تۇسىنبەۋشىلىككە تاپ بولاتىن كورىنەدى. كوكەيدەگى سۇراقتاردىڭ كوبى: «مەملەكەت باسپانالى بولۋعا كومەكتەسە الا ما؟».
وسى ماسەلە توڭىرەگىندە 23 ماۋسىم كۇنى قر پرەزيدەنتىنىڭ ءىس باسقارماسى مەديتسينالىق ورتالىعىنىڭ قىزمەتكەرلەرىمەن تۇرعىن ءۇي ماسەلەسى بويىنشا وتىرىس ءوتتى. جيىنعا AMANAT پارتياسى باستاۋىش پارتيا ۇيىمىنىڭ قىزمەتكەرلەرى قاتىسىپ, باسپانالى بولۋدىڭ جولدارىمەن تانىستى.
AMANAT پارتياسى نۇر-سۇلتان قالالىق «بىرلىك» فيليالىنىڭ «دەنساۋلىق» بپۇ-نىڭ ءتورايىمى گۇلجان يسكاكوۆا ارنايى ۇيىم وكىلدەرىنىڭ باسىن قوستى. وتىرىستا نۇر-سۇلتان قالاسى اكىمدىگى تۇرعىن ءۇي قورى حالىقپەن بايلانىس ءبولىمىنىڭ باسشىسى ارماناي وڭعارباەۆا جانە «وتباسى بانكى» اق-تىڭ كوشباسشى-كونسۋلتانتى جادىرا قاسىموۆا اقپارات بەردى.
جيىندا ۇجىم قىزمەتكەرلەرىن تولعاندىرعان بىرنەشە ماسەلە قارالدى. ولار: مەملەكەتتىك باعدارلاما بويىنشا تۇرعىن ءۇي الۋ جولدارى, كەزەكتە تۇرعاندارعا ارنالعان تۇرعىن ءۇي, جاستارعا ارنالعان جالعا بەرىلەتىن باسپانا, كوپبالالى, تولىق ەمەس جانە ەرەكشە بالالاردى تاربيەلەپ وتىرعان وتباسىلارعا ءۇي الۋعا كومەك كورسەتۋ ماسەلەلەرى.
كەزدەسۋ بارىسىندا سپيكەرلەر قالامىزدا تۇرعىن ءۇي الۋعا ارنالعان باعدارلامالار جايىندا مالىمەت بەرىپ ءوتتى. ايتىلعان باعدارلامالاردىڭ بىرەۋىن مىسالعا كەلتىرەر بولساق, «ەلوردا جاستارى» باعدارلاماسىنىڭ باستاپقى جارناسى 10%, پايىزدىق مولشەرلەمەسى 5%, نەسيەنىڭ ەڭ ۇزاق مەرزىمى 25 جىلعا دەيىن جانە قارىزدىڭ ەڭ جوعارى سوماسى 18000000-عا دەيىن.
سونداي-اق كەزدەسۋدە مەديتسينا ماماندارىنا ارنالعان باعدارلامالار جايىندا ايتىلدى. سپيكەرلەر ۇجىمنىڭ قوسىمشا قويىلعان سۇراقتارىنا جەكە توقتالىپ, ءار قىزمەتكەردى جەكە كونسۋلتاتسيادان وتۋگە كەڭەس بەرىپ, كەڭسەگە شاقىردى.
AMANAT پارتياسى نۇر-سۇلتان قالالىق
فيليالىنىڭ
ءباسپاسوز قىزمەتى
