ەلىمىزدە ەلەكتروندىق ۇكىمەت جۇيەسى ەنگىزىلىپ, ورتالىق باسقارۋ ورگاندارى مەن مەملەكەتتىك مەكەمەلەر باسشىلارىنىڭ جەكە بلوگى اشىلعاندا بيلىك پەن بۇقارانىڭ اراسى ءبىر تابان جاقىندادى دەپ قۋانعانىمىز ەسىمىزدە.راسىمەن دە وسى ۆيرتۋالدى الەم ومىرىمىزگە كەلگەلى مەملەكەتتىك قىزمەتتەرگە قاتىستى ءبىراز جۇمىستار جەڭىلدەپ, ۋاقىتىمىز ۇنەمدەلدى. ايتالىق, بۇرىن بالاباقشاعا تىركەلگەن بالامىزدىڭ كەزەگى قالاي جىلجىپ جاتقانىن ءبىلۋ ءۇشىن ءبىلىم باسقارماسىنا سابىلاتىن ەدىك. قىل اياعى, ءبىر جاپىراق انىقتاما الۋ ءۇشىن دە ءبىرتالاي مەكەمەنىڭ تابالدىرىعىمەن قوسا جۇيكەمىزدى دە توزدىراتىنبىز. ال, قازىر وسى شارۋالاردىڭ بارلىعى ەلەكتروندى جۇيەگە كوشتى. ۇيدە وتىرىپ-اق مەملەكەتتىك ورگاندارعا سۇرانىس جىبەرىپ, قاجەتتى قاعاز, انىقتامالاردى ءاپ-ساتتە الۋعا بولادى.
بۇل قىزمەت ءتۇرى حالىققا پايدالى عانا ەمەس, مەملەكەتتىك ورگانداردىڭ جۇمىس ىستەۋ دەڭگەيىن ايناداي كورسەتىپ بەرەتىن جاقسى اقپاراتتىق قۇرالعا دا اينالىپ وتىر. قازىر كەز كەلگەن مەكەمەنىڭ سايتىن اشساڭىز, ولاردىڭ جۇرتشىلىقپەن قانشالىقتى جۇمىس ىستەپ جاتقانىن بىردەن بىلە قوياسىز.
استانا قالاسىندا ەلمەن ەتەنە جۇمىس ىستەيتىن سايت – ەلوردالىق اكىمدىكتىڭ سايتى. بۇعان كۇنىنە 150-گە جۋىق سۇراق كەلىپ تۇسەدى ەكەن. بارلىعىنا دەر كەزىندە جاۋاپ بەرىلىپ, ماسەلەگە بايلانىستى ءتيىستى شارا قولدانىلادى. استانالىقتارعا ەڭ تانىمال سايت وسى. ال, كەرىسىنشە, استانالىق باسقارمالاردىڭ سايتتارىنىڭ بەلسەندىلىگى تومەن. ولارعا تۇرعىنداردان سۇراقتار ءۇيىلىپ كەلىپ, باسشىلارىڭ وعان اق تەر, كوك تەر بولىپ جاۋاپ جازىپ جاتقانىن كورمەيسىڭ. «سەن تيمەسەڭ, مەن تيمەن, بادىراق كوز» دەپ جاتقان ءبىر مىلقاۋ الەم. ءتىپتى ماسەلەسى شاش-ەتەكتەن بولىپ جاتاتىن ءبىلىم, دەنساۋلىق ساقتاۋ, جەر قاتىناستارى باسقارمالارىنىڭ وزىندە بىرەر ايدا ءبىرلى-جارىم عانا سۇراق كەلىپ تۇسكەن. قالعان باسقارمالاردىڭ «سۇراق-جاۋاپ» ءبولىمى مۇلدە بوس جاتىر. سوندا ەلدى تولعاندىراتىن ماسەلە قالماعان با, الدە كۇللى باسقارما ءبىر استانا اكىمدىگىنىڭ سايتىنا سەنىپ العان با؟
قاراپايىم حالىقتىڭ مەكەمە باسشىسىنا تىكەلەي كىرىپ, مۇڭ-مۇقتاجىن ايتۋعا مۇمكىندىگى از. قابىلداۋعا الدىن الا جازىلۋ ءبىرتالاي ۋاقىتتى قاجەت ەتەدى. ال, مەملەكەتتىك مەكەمەلەردىڭ سايتى وسىنىڭ ورنىن تولتىرۋعا ءتيىس-ءتىن. بىراق باسقارمالاردىڭ حالىققا ارنالعان ەلەكتروندى قىزمەتى ءوز مىندەتىن ءتيىستى دەڭگەيدە اتقارا الماي وتىر. سايت ارقىلى جۇرتشىلىقپەن بايلانىس ورناتىپ, ولاردى قانداي ماسەلە تولعاندىراتىنىن بىلگىسى كەلەتىن باسشىنىڭ جوقتىعى قىنجىلتادى. ءار مەكەمە جەكە سايتتارىنا جەتە كوڭىل ءبولىپ, حالىقپەن تىكەلەي ديالوگتىق الاڭ قۇرۋدى داستۇرگە اينالدىرسا دەيمىز.
قىمبات توقتامۇرات
