ەلوردادا پاتەرىن جەزوكشەلەرگە جالعا بەرگەن ازاماتتىڭ ۇستىنەن ءىس قوزعالدى. استانا قالاسى مامانداندىرىلعان اۋدانارالىق سوتى ماحامبەت ەسىمدى پاتەر يەسىنە 174 مىڭ تەڭگە كولەمىندە ايىپپۇل سالدى.قر اكىمشىلىك قۇقىق بۇزۋشىلىق كودەكسىنە جاڭا باپ ەنگىزىلگەنى بەلگىلى. اتاپ ايتقاندا, جەزوكشەلەرگە جالعا پاتەر بەرگەن جەكە تۇلعالار – 100, زاڭدى تۇلعالار – 200, ال شاعىن جانە ورتا بيزنەس وكىلدەرى – 300 ايلىق ەسەپتىك كورسەتكىش كولەمىندە ايىپپۇل تولەيتىن بولادى.
ءتارتىپ ساقشىلارى استانادا جۇرگىزىلگەن ءىس-شارا بارىسىندا سوڭعى ەكى ايدا 30-عا جۋىق پاتەر يەلەرىن انىقتاعان. ونىڭ 12-ءسى سوتقا جولدانعان كورىنەدى. وڭاي ولجاعا كەنەلگىسى كەلگەن ولار جەزوكشەلەردىڭ ارقايسىسىنان كۇنىنە 3-4 مىڭ تەڭگە كولەمىندە اقشا الىپ وتىرعان.
ەستەرىڭىزدە بولسا, بۇعان دەيىن ءوز باسپاناسىن جەڭىل ءجۇرىستى قىزداردىڭ جىن ويناعى ءۇشىن بەرگەن ەلوردالىق تۇرعىنعا 411 مىڭ تەڭگە ايىپپۇل سالىنىپ ەدى.
بۇدان بىلاي سوت پاتەرىن جالعا بەرۋشىلەردى قر اكىمشىلىك قۇقىق بۇزۋشىلىق تۋرالى كودەكسىنىڭ 341-بابى بويىنشا (كورىنەۋ جەزوكشەلىكپەن اينالىسۋ نەمەسە جەڭگەتايلىق ءۇشىن ءۇي-جايلار ۇسىنۋ) اكىمشىلىك جاۋاپكەرشىلىككە تارتىپ, ايىپپۇل سالادى.
گۇلميرا ايماعانبەت
