«ماحاببات» ماشاقاتى

كەشە استاناداعى «ماحاببات» تۇرعىن ءۇي كەشەنى توڭىرەگىندە وربىگەن داۋعا بايلانىستى ءباسپاسوز ءماسليحاتى ءوتىپ,  «اگروفيرما «كازەكسپورتاستىق» جشس  زاڭ ءبولىمىنىڭ جەتەكشىسى ماكسيم يگناتوۆيچ پەن «قازاگروحولدينگ» جشس وكىلى التاي دۇيسەنوۆ جۋرناليستەرگە ماسەلەنىڭ ءمان-جايىن ءتۇسىندىردى.جاقىندا «ماحاببات» تۇرعىن ءۇي كەشەنىنىڭ ءبىر توپ تۇرعىنى نارازىلىق شاراسىن وتكىزگەن بولاتىن. ولاردىڭ ايتۋىنشا, 2009 جىلى تۇرعىن ءۇي كەشەنىنەن جالعا الۋ ارقىلى ساتىپ الۋ قۇقىعىمەن پاتەر الىپ, باسپانا قوجايىنىنا اقشا تولەپ كەلگەن. كەيىن ءۇي باسقا كومپانياعا ساتىلىپ كەتكەن كەزدە جاڭا قوجايىن ولارعا پاتەردى بوساتۋدى تالاپ ەتكەن.
ماسەلەنىڭ مانىنە ۇڭىلسەك, 2006 جىلى «اگروفيرما «كازەكسپورتاستىق» جشس «ماحاببات» تۇرعىن ءۇي كەشەنىن تۇرعىزىپ جاتقان «ازبۋكا جيليا» كومپانياسىمەن ۇلەستىك قاتىسۋ تۋرالى كەلىسىمشارت جاساسادى. كەيىن 63 پاتەر مەن جاپسارلاس سالىنعان 20 عيمارات ۇلەستىك قاتىسۋشىنىڭ قولىنا وتەدى. «بىزگە بەرىلگەن پاتەرلەرگە ول كەزدە جوندەۋ جۇمىستارىن جۇرگىزگەن جوقپىز. ۇيلەر سىلانباعان كۇيدە تۇردى. ال 2011 جىلى وسى پاتەرلەردە بەلگىسىز ءبىر ادامدار تۇرىپ جاتىر دەگەن حابار الدىق. كوپ ۇزاماي الگى ادامداردىڭ اراسىنان باستاماشىل توپ ءبىزدىڭ كوكشەتاۋداعى كەڭسەمىزگە كەلىپ, جالداپ الۋ جونىندەگى كەلىسىمشارت جاساسۋدى ۇسىندى. ارينە, ءبىز كەلىسكەن جوقپىز», – دەيدى «اگروفيرما قازەكسپورتاستىق» جشس-ءنىڭ زاڭ ءبولىمىنىڭ جەتەكشىسى ماكسيم يگناتوۆيچ.
اتالمىش كاسىپورىن قارجىلىق قيىندىققا بايلانىستى پاتەرلەردى بىلتىر«كازاگروحولدينگ» جشس-نە ساتادى. ءۇيدىڭ جاڭا قوجايىنى زاڭسىز تۇرىپ جاتقان ازاماتتارعا پاتەردى بوساتۋىن تالاپ ەتەدى. داۋ وسىدان ءوربيدى. تۇرعىنداردىڭ ۋاجىنە سەنسەك, «اگروفيرما «كازەكسپورتاستىك» دەگەن كاسىپورىننىڭ وكىلى م.مۇقاتاەۆ ولارمەن پاتەردى 2015 جىلعا دەيىن جالعا الىپ, ءارى قاراي ساتۋ تۋرالى كەلىسىمشارت جاساسادى. كەيىن الگى ازامات تۇرعىنداردىڭ قولىنداعى كەلىسىمشارتتى «باسشىلىققا قول قويعىزامىن» دەگەن جەلەۋمەن جيناپ العان. قازىر تۇرعىنداردىڭ قولدارىندا سوزدەرىن راستايتىن نە كەلىسىمشارت, نە پاتەردىڭ جالعا الۋ قۇنىن تولەگەنىن راستايتىن تۇبىرتەك جوق. ال سوت شەشىمى «كازاگروحولدينگ» جشس-ءنىڭ پايداسىنا شەشىلدى. ەندى كاسىپورىن وكىلدەرى «سوت اكتىلەرىنىڭ نەگىزىندە تۇرعىندار پاتەرلەردى بوساتۋعا ءتيىس» دەپ وتىر.