ەلوردا اكىمى التاي كولگىنوۆ سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆپەن كەزدەستى. قوس تاراپ سىبايلاس جەمقورلىق تاۋەكەلدەرىنىڭ الدىن الۋ مەن بولدىرماۋ جانە حالىقتىڭ ءال-اۋقاتىن ارتتىرۋ بويىنشا بىرلەسكەن جۇمىستىڭ جاڭا فورماتىن تالقىلادى.
كەزدەسۋ بارىسىندا قالا باسشىسى بارلىق قۇرىلىمدىق بولىمشەلەر ءوز جۇمىسىندا باسىمدىقتى حالىقتىڭ سەنىمىنە يە بولۋعا بەرىپ, ولاردىڭ قىزمەتىن تۇرعىندار باعالاۋ كەرەكتىگىن اتاپ ءوتتى. سونىمەن قاتار, ول سىبايلاس جەمقورلىقتىڭ الدىن الۋ ىسىندە بارلىق مەملەكەتتىك ورگانداردىڭ بىرلىگى مەن ءوزارا ءىس-قيمىلى ماڭىزدى ءرول اتقاراتىنىن ايتتى.
«ازاماتتاردىڭ سەنىمى وتە ماڭىزدى. ۋاقىت وزگەرەدى, مەحانيزمدەر دە ەسكىرەدى. ءبىزدىڭ جۇمىسىمىزدا ناتيجە كەرەك. سوعان جەتۋ جولىندا ءاربىر ازامات ءىستى وزىنەن باستاۋى كەرەك» دەدى اكىم.
ءوز كەزەگىندە اليك شپەكباەۆ بۇگىندە اگەنتتىكتىڭ جۇمىسى سىبايلاس جەمقورلىق تاۋەكەلدەرىنىڭ پايدا بولۋ سەبەپتەرى مەن جاعدايلارىن, اكىمشىلىك كەدەرگىلەردى, بيۋروكراتيالىق راسىمدەردى جويۋعا باعىتتالعانىن اتاپ ءوتتى. بۇل باعىتتا «ادالدىق الاڭى» جوباسىنىڭ ماڭىزى زور.
– جالپى العاندا, سىبايلاس جەمقورلىق كورىنىستەرىنىڭ تومەندەۋى بايقالادى. سەبەبى ءىستىڭ سالدارىمەن ەمەس, العاشقى پايدا بولۋ سەبەپتەرىن جويۋعا باسا نازار اۋدارىلۋدا. ءارى قاراي دا ءىستىڭ العاشقى سەبەپتەرىنە باسا ءمان بەرىلەتىن بولادى. سوندىقتان سىزدەر دە ءوز تاراپتارىڭىزدان وسى باعىتتا قولداۋ كورسەتۋلەرىڭىز كەرەك, – دەدى توراعا.
كەزدەسۋدە سىبايلاس جەمقورلىققا قارسى ءىس-قيمىل اگەنتتىگى قالالىق دەپارتامەنتىنىڭ جاڭا باسشىسى تانىستىرىلدى. بۇل قىزمەتكە نۇرلان قىدىرباەۆ تاعايىندالدى. ال ونىڭ ءبىرىنشى ورىنباسارى اقبىلەك ميادىەۆا بولدى.
