باستى ۇستانىم – «قاۋىپسىز قالا» قاعيداتى
ەلوردالىق ءماسليحاتتىڭ زاڭدىلىق, قۇقىقتىق ءتارتىپ جانە قوعاممەن جۇمىس ماسەلەلەرى جونىندەگى تۇراقتى كوميسسياسىنىڭ وتىرىسىندا ەكونوميكا جانە بيۋدجەتتىك جوسپارلاۋ باسقارما باستىعىنىڭ ورىنباسارى ايجان تۇگەلباەۆا دەپۋتاتتاردىڭ قاراۋىنا استانا قالاسىنىڭ 2017-2019 جىلدارعا ارنالعان بيۋدجەتىنىڭ جوباسىن ۇسىندى.
جيىن بارىسىندا ەلوردانىڭ الەۋمەتتىك-ەكونوميكالىق دامۋىنىڭ نەگىزگى ءوسۋ قارقىنى ايتىلدى. بيىلعى جىلدىڭ ءى جارتىجىلدىعىندا ءوندىرىس كولەمى رەسپۋبليكالىق جالپى ىشكى ءونىمنىڭ 11 پايىزىن قۇراعان.
– استانانىڭ نەگىزگى الەۋەتى ورتا جانە شاعىن بيزنەس بولىپ تابىلادى, ونىڭ ۇلەسىنە كاپيتال سالىمىنىڭ جالپى كولەمى شامامەن 60 پايىزعا تيەسىلى. ەڭبەك نارىعىندا جۇمىسسىزدىق ينديكاتورى 4,7 پايىز دەڭگەيىندە ساقتالىپ, بۇل ەلىمىزدەگى باسقا ايماقتار اراسىندا ەڭ تومەنگى كورسەتكىش بولىپ سانالادى, – دەدى ايجان الىمقىزى.
وسىلايشا, ەلوردا ەكونوميكاسىنىڭ ناقتى سەكتورىن دامىتۋ سالىقتىق ءتۇسىمدەردىڭ تۇراقتى ءوسۋىن قامتاماسىز ەتۋگە مۇمكىندىك تۋدىرىپ, ولاردىڭ ەسەبىنەن الداعى ءۇش جىلعا ارنالعان بيۋدجەتتىك باعدارلامالاردى قارجىلاندىرۋ قامتاماسىز ەتىلمەك. ۇسىنىلعان بيۋدجەت جوباسى «قاۋىپسىز قالا» قاعيداتتارىنا سۇيەنە وتىرىپ, حالىقتىڭ جانە قوعامدىق ينستيتۋتتاردىڭ پىكىرىن ەسكەرىپ, ءتيىستى قۇرىلىمدار مەن جۇيەلەردىڭ جۇمىس ساپاسىن ارتتىرۋعا باعىتتالعان.
ودان كەيىن استانا اكىمى اپپاراتىنىڭ قارجى-شارۋاشىلىق ءبولىمىنىڭ جەتەكشىسى ميحايل جمۋرين ءوز سالاسىنا قاتىستى قىسقاشا شولۋ جاسادى. ال قالالىق ىشكى ىستەر دەپارتامەنتى باستىعىنىڭ ورىنباسارى الىبەك مۇساحمەتوۆ ءوز بايانداماسىندا ءۇش جىلعا جوبالانىپ وتىرعان قارجىنىڭ اياسىندا جۇزەگە اساتىن ءمىندەتتەرگە توقتالدى. كەلەسى جىلى ەسىل اۋداندىق ىشكى ىستەر ءبولىمىنىڭ عيماراتىنىڭ قۇرىلىسى باستالماق. سونىمەن بىرگە ەكسپو-2017 حالىقارالىق كورمەسىنىڭ قاۋىپسىزدىگىنە ەرەكشە كوڭىل ءبولىنىپ وتىرعاندىعىن جەتكىزدى. دەپۋتاتتار تاراپىنان قالاداعى قوعامدىق ءتارتىپ ماسەلەسى دە ءسوز بولدى.
ەلوردالىق ىشكى ساياسات باسقارماسى باسشىسىنىڭ ورىنباسارى قايرات قامباروۆ ءوز سالاسى تۋرالى دا قىسقا دا نۇسقا ايتىپ ءوتتى. «ىشكى ساياسات سالاسىنىڭ اۋقىمى كەڭ. استانا اكىمىنىڭ الەۋمەتتىك جۇمىستارىنىڭ بارىندە ىشكى ساياسات سالاسىنىڭ قاتىسى بار. كوپتەگەن شارالاردىڭ ۇيلەستىرۋشىسى. قالالىق اكىمدىكتىڭ جۇمىسى مەن قوعامدىق-ساياسي جانە مادەني شارالاردى بۇقارالىق اقپارات قۇرالدارى ارقىلى تاراتاتىن مەملەكەتتىك ورگان» دەپ ءوز ءسوزىن تۇيىندەپ ءوتتى. ول الداعى ەكسپو-2017 كورمەسى اياسىندا مىڭداعان شارا جوسپارلانىپ وتىرعانىن جەتكىزدى. ال, قالالىق ءدىن ىستەر باسقارماسىنىڭ باسشىسى دانيار ەسين دەپۋتاتتار الدىندا اتالعان باسقارمانىڭ ماقساتى مەن الداعى جىلدارعا جوبالانىپ وتىرعان جۇمىستارى جايىندا ءسوز قوزعاپ, ولاردىڭ سۇراقتارىنا جاۋاپ بەردى.
ازامات ەسەنجول