ءومىر جولى تاقتايداي بىركەلكى ەمەس. تىرشىلىكتەگى بولماشى ءبىر ساتسىزدىكتىڭ ءوزى ادامداردىڭ تاعدىرىن كىلت وزگەرتىپ, سارساڭعا سالادى. ودان جول تاۋىپ شىعۋ دا وڭاي ەمەس. سونداي شاقتاردا كەيبىر جاندار ماڭايىنان ەش جىلىلىق كورمەي, اششى سۋعا ءۇيىر بولىپ, دالا كەزىپ كەتەدى. ءبىز ونى استاناداعى «بەلگىلى تۇراعى جوق ادامدارعا ارنالعان بەيىمدەۋ» ورتالىعىنىڭ جۇمىسىمەن جاقىنىراق تانىسقاندا بايقادىق.
سەنىمگە سەلكەۋلىك تۇسپەسىن
بەيىمدەۋ ورتالىعىنىڭ اشىلعانىنا ون التى جىل بولعان. سودان بەرى ايتۋلى مەكەمە بەلگىلى تۇراعى جوق جانداردى الەۋمەتتىك ورتاعا قايتا بەيىمدەپ, قۇجاتتارىن تۇگەندەپ, جۇمىسقا ورنالاستىرىپ, بىرقاتار ساۋاپتى جۇمىستاردى اتقارىپ كەلەدى. بيىلعى توعىز ايلىق كورسەتكىش بويىنشا ورتالىققا 915 ادام تۇسكەن. ونىڭ ىشىندە باس قالادان 383 ادام بولسا, وزگە وڭىرلەردەن 532 ازامات تۇسكەن. سولاردىڭ قاتارىندا 696 ادامنىڭ قۇجاتى جوق ەكەن.
– ءبىزدىڭ ورتالىق 180 توسەك-ورىنعا لايىقتالعان. بۇگىندە ورتالىقتا 160 جۋىق ادام تۇرىپ جاتىر. قىس قاھارى سەزىلگەننەن بەرى كەلۋشىلەردىڭ سانى كوبەيدى. اسىرەسە, باسقا ايماقتان كەلگەندەر كوبىرەك. سودان كەيىن تۇنگى مەزگىلدە بارار جەرى جوق ازاماتتار كەشكىلىك وسىندا كەلىپ قونادى. جۋىنادى, دەمالادى, تاڭەرتەڭ قايتا كەتەدى. ءبىزدىڭ ورتالىقتا جاتقان ادامدارعا ءۇش ۋاقىت تاماق بەرىلەدى. كىتاپحانا جۇمىس ىستەيدى. مەديتسينالىق تەكسەرۋدەن وتكىزەمىز. قۇجاتتارىن انىقتايمىز. جوق بولسا, قايتا جاساۋعا كومەكتەسەمىز. بيىلدىڭ وزىندە 5 ادامعا مۇگەدەكتىك قۇجاتىن دايىنداپ بەردىك.
تاعى 5 كىسىنىڭ زەينەتكەرلىك قۇجاتىن ازىرلەدىك. 68 ازاماتتىڭ جەكە باس قۇجاتىن قايتا قالپىنا كەلتىردىك. ءتورت كىسىنى جۇمىسقا ورنالاستىردىق. 286 ادامدى تۇرعىلىقتى مەكەنجايىنا جىبەردىك, – دەيدى ورتالىق ديرەكتورى مۇرات كاريەۆ.
سونىمەن بىرگە, ورتالىقتىڭ اياسىندا «ۇتقىر الەۋمەتتىك جاساق» جۇمىس ىستەيدى. ول ەلورداداعى ءۇش اۋداننىڭ پوليتسيا پۋنكتتەرىمەن, كوممۋنالدىق مەكەمەلەرىمەن, مەديتسينالىق ورتالىقتارىمەن, قالالىق كوشى-قون پوليتسياسى باسقارماسىمەن, تەمىرجول ۆوكزالى جانە ساپارجايمەن تىعىز بايلانىس ورناتقان.
«ءبىزدىڭ ماقساتىمىز – ومىردە قيىندىققا تاپ بولعان ادامعا قولىمىزدان كەلگەنشە كومەك كورسەتىپ, سەنىمدەرى سەرپىلسە دەيمىز. وسىنداعى كوپ كىسىلەر ءوز قۇقىقتارىن بىلمەيدى. سوندىقتان ولارمەن پسيحولوگتار, زاڭگەرلەر جۇمىس ىستەيدى. ورتالىقتا ادامدار قاجەتتى كومەككە بايلانىستى ءبىر ايدان ءبىر جىلعا دەيىن تۇرادى. اسىرەسە, جەكە كۋالىكتەرى جوق ازاماتتاردىڭ قۇجاتىن راسىمدەۋ ۇزاققا سوزىلادى. ماسەلەن, بيىل بىزگە ءبىر ازامات ءتۇستى. ءوزى – اۋعان سوعىسىنىڭ ارداگەرى. ءبىز ونىڭ جاقىندارىن ىزدەستىردىك. قالاداعى اۋعان سوعىسى جاۋىنگەرلەرىنىڭ بىرلەستىگىنە حابارلاستىق. ولار بىزگە كەلدى. جاڭاعى ازامات اۋعان سوعىسىندا ەڭ ءبىر اۋىر نۇكتەدە بولىپ, ەرەن ەرلىك كورسەتكەن. سول كەزدە وعان مەدال ۇسىنىلىپ, ول بىراق تاپسىرىلماعان. سونى قارۋلاس دوستارى اكەلىپ تابىستادى. وتباسىنان اجىراسىپ, تۋىستارىنان دا بايلانىس ءۇزىپ العان. وعان بارلىق جاعداي جاسالىپ, جۇمىسقا ورنالاستىرىلدى. قازىر جاعدايى جاقسى. بىزگە كەلگەن ادامداردىڭ وتباسىلارىمەن, تۋىستارىمەن سويلەسىپ, ۇيلەرىنە قايتارۋعا كۇش سالامىز» دەيدى ورتالىق باسشىسى.
تاعدىر جولى تايعاناق
«ءبىز الدىمەن ادامداردىڭ پسيحولوگيالىق اۋىتقۋلارىن بايقايمىز. ادىستەمە بويىنشا ارنايى تەست جۇرگىزەمىز. ولارعا ارنالعان پسيحولوگيالىق سەنسورلىق بولمە بار. سوندا قابىلدايمىز. ونى ايەل ازاماتشالار كوبىرەك جاقسى كورەدى. بىزگە تۇسكەن كىسىلەر باستاپقىدا «مەنىڭ ەشقانداي تۋىسقانىم, وتباسىم جوق» دەپ وتىرىك ايتادى. ەكى-ءۇش رەت پسيحولوگيالىق كومەكتەن كەيىن وزدەرىنە كەلىپ, ءبارىن بىرتىندەپ ايتا باستايدى. ارينە, بۇل جەردەن تاعدىر جولى تايعاناق ءتۇرلى ادامداردى كەزدەستىرۋگە بولادى. ءتارتىبىن تۇزەپ, وتباسىنا ورالعاندار بار. كەيبىر كىسىلەرگە وسى كەزبە جاعدايلارى ۇنايدى» دەيدى پسيحولوگ مامان.
قىستا جۇمىس قاۋىرت
– كۇن سۋىعاننان بەرى ءۇي-كۇيى جوق ادامداردىڭ سانى كوبەيىپ كەتەدى, – دەپ باستادى ءسوزىن ورتالىق دارىگەرى زيباگۇل جۇماشەۆا. راسىندا, مەكەمەنىڭ ەمدەۋ بولىمىندە كەزەككە تۇرعانداردىڭ قاتارى ءبىر قارالىق. ءبىزدىڭ الدىمىزدا اق حالاتتى جاندار تۇندە قابىرعاسى شىعىپ, ورتالىقتى پانالاپ كەلگەن تۇراعى جوق كىسىنى جەدەل-جاردەم شاقىرىپ, باسقا اۋرۋحاناعا جونەلتىپ جاتتى.
«سۋىق تۇسكەننەن بەرى ورتالىققا تاۋلىگىنە 20-25 ادام كەلەدى. اسىرەسە, قىس مەزگىلىندە جۇمىس قاۋىرت. ورتالىقتى كەلىپ پانالايتىندار كوپ. ولاردىڭ تاعدىرلارى ءارتۇرلى. ەلورداعا جۇمىسقا كەلىپ, ەڭبەكاقىلارىن الا الماي دالادا قاڭعىرىپ قالعاندار دا بار. سوسىن ولار امالسىزدان وسىندا كەلەدى. ءبىز الدىمەن ولاردى مەديتسينالىق تەكسەرۋدەن وتكىزەمىز. ءتۇرلى اۋرۋلارعا بايلانىستى اناليز الامىز. فليۋوروگرافياعا تۇسىرەمىز. اسىرەسە, قىس كەزىندە قولى-اياعى ۇسىگەندەر كوبەيەدى. توبەلەسىپ, تاياق جەگەن, اۋىر جاراقات العاندار دا بولادى. الايدا, كۇردەلى اۋرۋلاردى ەمدەي المايمىز. ونداي جاعدايدا ناۋقاستاردى باسقا اۋرۋحاناعا جىبەرەمىز» دەدى زيباگۇل جۇماشەۆا.
نەمەرەسى العىس ايتتى
ءبىز بارعان كۇنى بەيىمدەۋ ورتالىعىنا تاڭعى التى كەزىندە ءبىر اجەي ءتۇسىپتى. ونى ماماندار قابىلداپ العان. كەيىن انىقتالعانداي, ول كىسى بالالارى مەن نەمەرەلەرى تاڭعى ۇيقىدا جاتقاندا, دالاعا شىعىپ كەتكەن. ەپتەپ ەسىن جوعالتقان كىسى ەكەن. سودان بالالارى ويانا سالىسىمەن اناسىن ىزدەيدى. كوشەدەگى جۇرگىنشىلەردەن سۇراستىرادى. كورگەن-بىلگەن ادام بولمايدى. اقىرى, ولار جەلىلىك پوليتسياعا حابارلاسادى. نەگىزىنەن, ونى پوليتسيا قىزمەتكەرلەرى كوشەدەن تاۋىپ الىپ, وسىندا تاڭەرتەڭ الىپ كەلگەن. «ءبىز اجەمىزدى جانۇشىرا ىزدەدىك. تۋىستاردان سۇراستىردىق. ولارعا بارماعان. كورشىلەر دە كورمەگەن. سودان پوليتسياعا حابارلاسىپ, ول كىسىلەر اجەمنىڭ بەيىمدەۋ ورتالىعىنا تۇسكەنىن حابارلادى. سودان وسىندا كەلىپ وتىرمىز. اجەمە بارلىق مەديتسينالىق كومەك كورسەتىلىپتى. ورتالىق ماماندارىنا العىسىم شەكسىز» دەيدى جوعالىپ تابىلعان كەيۋانانىڭ نەمەرەسى.
قىسقاسى, جىلىلىق ۇيالاعان ورتالىقتان ادامعا دەگەن ىزگى قاسيەتتى, ادال نيەتتى كورىپ, كوڭىلىمىز كوتەرىلدى. ەندەشە, ءبىر-بىرىمىزگە دەگەن جاناشىرلىقتان جازبايىق, اعايىن!
ازامات ەسەنجول
