كەشە استانا قالالىق ءماسليحاتىنىڭ قۇرىلىس, ەكولوگيا, كولىك, ساۋدا جانە تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى تۇراقتى كوميسسيانىڭ وتىرىسىندا بىرقاتار باسقارمالاردىڭ 2017-2019 جىلدارعا ارنالعان بيۋدجەتى تالقىلاندى. بيۋدجەت جوباسىمەن ەلوردالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ءالىبي جۇماەۆ تانىستىردى.
قالاداعى اۆتوموبيل جولدارىنىڭ قالىپتى قىزمەتىن قامتاماسىز ەتۋ ماقساتىندا الداعى ءۇش جىلعا 13 272,5 ملن تەڭگە ءبولۋ جوسپارلاندى. بۇعان قالا كوشەلەرىندەگى جولداردى جوندەۋ كىرىپ وتىر. قالاداعى كولىك ينفراقۇرىلىمىنىڭ دامۋى ەرەكشە نازارعا الىندى. جاقىن ءۇش جىلداعى كەزەڭدە اتالمىش جۇمىسقا 67 240, 5 ملن تەڭگە قاراستىرىلدى.
بۇل قارجى بۇرىن باستالعان بىرنەشە جوبانى جۇزەگە اسىرۋدى جالعاستىرۋعا باعىتتالادى. اتاپ ايتساق, كىشى اينالما جولىنىڭ قۇرىلىسىنا, تۇرعىن الاپتاردا جولدار مەن ينجەنەرلىك جەلىلەردىڭ سالىنۋى مەن قالپىنا كەلتىرىلۋىنە, ش.بەيسەكوۆا كوشەسىنەن ابايدىڭ 150 جىلدىعى كوشەسىنە دەيىنگى س.سەيفۋللين كوشەسىندەگى جولدى سالۋعا, دوستىق كوشەسىنەن حالىقارالىق اۋەجايعا دەيىنگى ارالىقتاعى قابانباي باتىر داڭعىلىن قالپىنا كەلتىرۋگە, №14 – № 41 كوشەلەر ارالىعىنداعى بايانتاۋ كوشەسىندەگى جولدىڭ قۇرىلىسىنا, ماناس كوشەسىنەن ۋنيۆەرسيتەت قالاشىعىنا دەيىنگى ارالىقتاعى №41 جانە №42 كوشەلەردى سالۋعا بولىنبەك. سونداي-اق, كوممۋنالدىق كولىك پاركى مەن كوممۋنالدىق بازارعا كەلۋ جولدارىنىڭ قۇرىلىسىن جالعاستىرۋعا دا بيۋدجەتتەن قارجى قاراستىرىلعان.
قالالىق جەر قاتىناستارى باسقارماسىنا استانانىڭ جانە شاھارداعى رەسپۋبليكالىق ماڭىزى بار جەردىڭ پايدالانۋى مەن قورعالۋىن باقىلاۋ جانە جەردى زونداۋدى ۇيىمداستىرۋ ءۇشىن دە بيۋدجەتتەن قارجى بولىنبەك.
الەۋمەتتىك ماڭىزى بار ىشكى باعدارلار بويىنشا جولاۋشىلاردى تاسىمالداۋدى سۋبسيديالاۋعا ءۇش جىلدىق بيۋدجەتتە 541,0 ملن تەڭگە ءبولۋ جوسپارلاندى. سونىمەن بىرگە جول قوزعالىسى قاۋىپسىزدىگىن قامتاماسىز ەتۋگە, كولىك ينفراقۇرىلىمىن دامىتۋعا, سونىڭ ىشىندە جاڭا اۆتوبۋستاردى ساتىپ الۋعا, ت.ب. جۇمىستاردىڭ دا بيۋدجەتتەن الاتىن ءوز ۇلەسى بار.
استانانىڭ تۇرعىن ءۇي ينسپەكتسياسى باسقارماسىنا ءبىرنەشە باعىتتار بويىنشا جۇمىستى جۇرگىزۋگە دە بيۋدجەتتەن اقشا قاراستىرىلدى. سونىڭ ىشىندە كەلەسى جىلى قالاداعى كوپپاتەرلى 9 ءۇيدى كۇردەلى جوندەۋ شىعىستارى كىرىپ وتىر.
وتىرىستا باسقارما باسشىلارى ءوز مەكەمەلەرىنىڭ قىزمەتىن قامتاماسىز ەتۋگە قاجەت قارجىنىڭ قانداي جۇمىستارعا جۇمسالاتىنىن ناقتىلاپ, كوميسسيا مۇشەلەرىنىڭ سۇراقتارىنا جاۋاپ بەردى.
امانعالي قالجانوۆ
