قاز كسر حالىق ءارتىسى, قاز كسر مەملەكەتتىك سىيلىعىنىڭ يەگەرى شارا جيەنقۇلوۆانىڭ 110 جىلدىعىنا ارنالعان «قاماجاي» I رەسپۋبليكالىق حورەوگرافتار بايقاۋى ءوز مارەسىنە جەتتى.
بۇل بايقاۋ جىل بويى ەلىمىزدىڭ وڭىرلەرىن ارالاپ, حورەوگرافتاردىڭ جۇمىسىن انىقتاۋعا مۇمكىندىك تۋعىزدى. ماماندار ەلىمىزدىڭ بارلىق وڭىرلەرىنە ارنايى بارىپ, بي انسامبلدەرىمەن تانىستى. جۇيرىكتەردى انىقتادى. ەلىمىزدەگى تۇڭعىش ۇيىمداستىرىلعان حورەوگرافتار بايقاۋى «استانا وپەرا» وپەرا جانە بالەت تەاترىنىڭ كىشى زالىندا «تۇركى حالىقتارىنىڭ بي مادەنيەتىنىڭ سيمبيوزى» اتتى عىلىمي-پراكتيكالىق كونفەرەنتسيامەن قورىتىندىلاندى.
كونفەرەنتسيانى قر مادەنيەت قايراتكەرى, «ناز» مەملەكەتتىك بي تەاترىنىڭ ديرەكتورى, «حورەوگرافيا ونەرىنىڭ قايراتكەرلەر قوعامى» توراعاسى ەركەبۇلان اعىمباەۆ قۇتتىقتاۋ سوزبەن اشتى. قاز كسر ەڭبەك سىڭىرگەن ءارتىسى, ونەرتانۋ كانديداتى, قازاق ۇلتتىق حورەوگرافيا اكادەمياسىنىڭ پروفەسسورى تويعان ءىزىم «شارا جيەنقۇلوۆانىڭ جان-جاقتى شىعارماشىلىعىنىڭ جالعاسى بولعان بايقاۋلاردىڭ قازاق ءبيىنىڭ دامۋىنا قوسقان ۇلەسى» دەگەن تاقىرىپتا بايانداما جاسادى. سونداي-اق جيىنعا قاتىسقان باسقا دا بي ونەرىنىڭ ماماندارى بايانداما جاساپ, تىڭداۋشىلارمەن پىكىر الماستى.
ال جۇلدەگەرلەردى انىقتايتىن گالا كونتسەرت «استانا» كونتسەرت زالىندا» ءوتتى.
بايقاۋدىڭ باس جۇلدەسىن استانالىق حورەوگراف ۇلان يزەناەۆ يەلەندى. جۇلدەگەرلەر مەن ديپلومانتتار ماراپاتتالدى.
قاز كسر حالىق ءارتىسى زاۋىربەك رايباەۆ اتىنداعى, قاز كسر ەڭبەك سىڭىرگەن ونەر قايراتكەرى, بالەتمەيستەر, پروفەسسور م.تىلەۋباەۆ اتىنداعى, قازاقستاننىڭ حالىق ءارتىسى, ونەرتانۋ كانديداتى, پروفەسسور داۋرەن ءابىروۆ اتىنداعى, قاز كسر حالىق سۋرەتشىسى, رەجيسسەر, اكتەر ءا.يسمايلوۆ اتىنداعى, قر مادەنيەت قايراتكەرى, ءبيشى-پەداگوگ ۇسەن ماقان اتىنداعى ارنايى جۇلدەلەر يەگەرلەرى انىقتالدى.
كەلەسى جىلى – قازاقتىڭ تۇڭعىش بالەريناسى, قازاقستاننىڭ ەڭبەك سىڭىرگەن ءارتىسى نۇرسۇلۋ تاپالوۆانىڭ 100 جىلدىعى. بۇل مەرەيتوي رەسپۋبليكالىق دەڭگەيدە, ءوز بيىگىندە اتالىپ وتەدى دەپ ۇمىتتەنەمىز.
تولقىن سۇلتان
