تۇڭعىش پرەزيدەنت كۇنى استانا سالتاناتتى شارالاردىڭ ساحناسىنا اينالدى. ەڭ اۋقىمدى مەرەكەلىك كونتسەرت «ءبىر ەل! ءبىر تاعدىر! ءبىر ەلباسى!» دەگەن اتپەن ەلورداداعى «سارىارقا» ۆەلوترەگىندە ءوتتى. وعان ون مىڭعا جۋىق ستۋدەنتتەر مەن وقۋشىلار قاتىستى.
ءبىر ەل – بۇل بارلىعىمىز ءۇشىن ورتاق ۇلتتىق مۇددەگە جۇمىلعان ورتاق قازاقستان. ءبىر تاعدىر – بارلىعىمىز ءبىرگە ءجۇرىپ وتكەن قيىندىقتار مەن جەڭىستەر. ءبىر ەلباسى – بۇل جاڭا مەملەكەت قالىپتاسۋىنىڭ وتپەلى كەزەڭىندە ءوز تاعدىرىن سەنىپ تاپسىرعان قازاقستان حالقىنىڭ جاۋاپتى تاڭداۋى. مىنە, قوعامدىق كەلىسىمدى ۇستاپ تۇراتىن وسى ءۇش تاعان مەرەكەلىك كونتسەرتتىڭ باستى ارقاۋىنا اينالدى.
كەش تىزگىنىن ۇستاعان بەلگىلى ارتىستەر ازامات ساتىبالدى, سىرىم قاشقاباەۆ جانە ءادىل احمەتوۆ داستۇرگە اينالعان ءىس-شارانىڭ ءمانى مەن مازمۇنىن جاستارعا ۇعىندىردى. ولار كوپشىلىككە ەلىمىزدىڭ بولاشاق ەليتاسىنىڭ قالىپتاسۋ ۇدەرىسى, ساياسي-ەكونوميكالىق رەفورمالاردىڭ تابىستىلىعى, ەلىمىزدىڭ الەمدىك قاۋىمداستىق الدىنداعى بەدەلى تۋرالى باياندادى.
ءىس-شارا بارىسىندا ەلوردالىق وقۋشىلار اراسىنداعى «قازاقستان – 2050: وقۋشىلار كوزىمەن» بايقاۋىنىڭ جەڭىمپازدارىن سالتاناتتى ماراپاتتاۋ ءراسىمى ءوتتى. تۇڭعىش پرەزيدەنت كۇنى قارساڭىندا ون مىڭنان استام وقۋشى قاتىسقان بايگەدە «ۇزدىك ەسسە» اتالىمىن №66 مەكتەپ-ليتسەيدىڭ 11-سىنىپ وقۋشىسى ايگەرىم بالابەكوۆا يەلەندى. «ۇزدىك عىلىمي جۇمىس» جەڭىمپازى بولىپ وقۋشىلار سارايىنىڭ شاكىرتى تەمىرلان ءنابي تانىلدى. «ۇزدىك يننوۆاتسيالىق جوبادا» ءبىرلەسىپ ەڭبەك ەتكەن №48 مەكتەپ-ليتسەيدىڭ وقۋشىلارى قاينار قاھارمان مەن سامات ومىرزاق توپ جاردى. ال «ۇزدىك ساۋلەت يدەياسى» №35 مەكتەپ-ليتسەيدىڭ ورەنى ارسەن ايباسوۆقا بەرىلدى. №50 مەكتەپ-ليتسەيىنىڭ تۇلەگى نازگۇل ءدۇيسەنباەۆا «كوشباسشى وقۋشى» اتاندى. ولاردىڭ بارلىعىنا قۇرمەت پەن سىي-سياپات كورسەتىلدى.
سونىمەن قاتار, مەرەكەلىك شارادا شىنايى باقىتتىڭ فورمۋلاسى بۇلدىرشىندەر كوزىمەن بەرىلدى. «وتباسى بار, ەلى بار, ەلباسى بار بەرەكەلى ەلدىڭ ءبارى باقىتتى!» دەگەن قوس بالاقاي بۇگىنگى بەيبىت ءومىردىڭ بەينەسى ىسپەتتى. كورەرمەندەر وقۋشىلار سارايىنىڭ, «رەنەسسانس» بالەت مەكتەبىنىڭ جانە وسكەمەندىك «فلەش» توبىنىڭ قاتىسۋىمەن «باقىت» قويىلىمىن تاماشالادى. شارادا جاستاردىڭ رۋحىن كوتەرەتىن پاتريوتتىق اندەر دە شىرقالدى. «الاشۇلى» توبى, ءمادينا ءسادۋاقاسوۆا, استانا وپەرا جانە بالەت تەاترىنىڭ ءارتىستەرى كوڭىل اسقاقتاتاتىن كوتەرىڭكى اندەرىن تارتۋ ەتتى.
مەرەكەلىك باعدارلامادا قازاقستاننىڭ ەل بولىپ قالىپتاسۋ جولى مەن 22 جىل ءىشىندە جەتكەن جەتىستىكتەرىن ايشىقتايتىن قويىلىمدار كورسەتىلدى.
گۇلميرا ايماعانبەت
