«ەكو تاكسي» جYيتكيدI ەلوردادا
قىستىڭ العاشقى كۇنى ەلوردالىقتارعا جاڭا قىزمەت ءتۇرى ۇسىنىلىپ, «قازاق ەلى» مونۋمەنتى الاڭىندا «استانا ەكو تاكسي» قالالىق تاكسوپاركى ينۆەستيتسيالىق جوباسىنىڭ تۇساۋكەسەرى ءوتتى. استانا قالاسى اكىمدىگىنىڭ قولداۋىمەن «AllurGroup» اۆتوكولىك كومپانيالار توبى ىسكە اسىرعان جوبانىڭ قىر-سىرىمەن قازاقستان پرەزيدەنتى نۇرسۇلتان نازارباەۆ تانىستى.
شاھار اكىمدىگى ەكسپو-2017 حالىقارالىق كورمەسىنە قالانىڭ ينفراقۇرىلىمىن ءۇش تۇجىرىمدامالىق باعىت بويىنشا دايىنداپ جاتىر. اتاپ ايتساق, Astana mobility – قالانىڭ كولىكتىك ينفراقۇرىلىمى مەن لوگيستيكا سالاسىن جاڭارتۋعا جانە جاقسارتۋعا باعىتتالسا, Astana Green City – ەنەرگەتيكالىق ءتيىمدىلىك پەن جاڭارتىلاتىن ەنەرگيا كوزدەرى سالالارىنداعى شەشىمدەردى ءجۇزەگە اسىرۋدى كوزدەيدى. ال, Welcome to Astana, قازاقشالاعاندا – استاناعا قوش كەلدىڭىز باعىتى قالانىڭ تۋريستىك تارتىمدىلىعىن دامىتۋمەن قاتار, قوناق ءۇي, مەيرامحانا بيزنەستەرى مەن وزگە دە قىزمەت كورسەتۋ سالالارىن حالىقارالىق ستاندارتتارعا سايكەستەندىرۋدى قولعا الادى.
بۇل باعىتتاردىڭ العاشقى قادامى – مەملەكەتتىك-جەكە مەنشىك ارىپتەستىك قاعيداتى نەگىزىندە جۇزەگە اسىرىلعان «استانا ەكو تاكسي» جوباسى بولىپ وتىر. ونىڭ ماقساتى – ەلوردادا ەكولوگيالىق وتىنمەن جۇرەتىن كولىكتەردىڭ ءىرى تاكسوپاركىن قۇرۋ مەن جولاۋشىلارعا زاڭدى ءارى زامانعا ساي قىزمەت كورسەتۋ تۇرلەرىن دامىتۋ.
جوبانى ىسكە اسىرۋدىڭ ءبىرىنشى كەزەڭىندە سۇيىتىلعان گازبەن (پروپان-بۋتان قوسپاسىمەن) جۇرەتىن 100 اۆتوكولىك استانا جولدارىنا جىبەرىلەدى, ال, 2017 جىلعا قاراي ولاردىڭ سانى 500 اۆتوكولىككە دەيىن جەتەدى دەپ جوسپارلانۋدا. باستاپقى كەزەڭدە ينۆەستيتسيالار 450 ميلليون تەڭگەنى قۇراسا, ونى جۇزەگە اسىرۋ بارىسىندا تاسىمالداۋ سالاسىندا قوسىمشا جۇمىس ورىندارى قۇرىلۋى ءتيىس.
«استانا ەكو تاكسي» – تەك قالاداعى ەكولوگيالىق احۋالدى جاقسارتىپ قانا قويماي, جانارمايدىڭ تومەن باعاسى ەسەبىنەن تاكسيدە ءجۇرۋ قۇنىن ارزانداتۋعا مۇمكىندىك تۋعىزادى. اتاپ ايتساق, قازىرگى تاڭدا قالادا 18 گاز قۇيۋ ستانتسياسى جۇمىس ىستەيدى.
استانا حالقىنا قىزمەت كورسەتەتىن ەكولوگيالىق تازا كولىكتەرگە كەلسەك: «AllurGroup» كومپانياسى ۇسىنعان وڭتۇستىك كورەيالىق SsangYong كولىكتەرى قوستاناي قالاسىنا قۇراستىرىلىپ, جينالعان. حالىقارالىق ساپا ستاندارتتارىنا ساي كەلەتىن ولار تاكسومەترىمەن, GPS ناۆيگاتسياسىمەن, بانك كارتوچكالارىمەن جول ءجۇرىسىن تولەۋ تەرمينالىمەن, Wi-Fi جانە استانا قالاسى بويىنشا جول كورسەتكىشى جانە اقپاراتتى مۋلتيمەديالىق جۇيەسىمەن جابدىقتالعان.
جوبامەن تانىسۋ بارىسىندا مەملەكەت باسشىسى نۇرسۇلتان نازارباەۆ كولىكتەردىڭ بىرىنە ءمىنىپ, جاڭا تاكسيدىڭ العاشقى جولاۋشىسى بولدى.
امانعالي شميتۇلى