مەرەكە كۇنى مەملەكەت باسشىسى «نازارباەۆ ورتالىعىنىڭ» جاڭا عيماراتىندا بولدى.
عيماراتتى ارالاۋ بارىسىندا نۇرسۇلتان نازارباەۆ نىساننىڭ نەگىزگى ولشەمدەرىمەن تانىستى. تۇڭعىش پرەزيدەنت كۇنى وزگە دە مەملەكەتتەردە, اتاپ ايتساق, اقش-تا, ەۋروپا, ازيا ەلدەرىندە مەرەكە رەتىندە اتاپ وتىلەتىنىن ايتا كەلە, ەلباسى قازاقستان پارلامەنتى ءوز شەشىمىمەن بەكىتىلگەن وسى مەيرامنان سوڭ ماڭىزدى مەرەكەلەردىڭ باستالاتىنىن, ولاردىڭ ىشىندەگى ەڭ ماڭىزدىسى – تاۋەلسىزدىك كۇنى اتالىپ وتىلەتىنىنە توقتالدى. «بۇل وقيعالار ءوزارا بايلانىستى. مەن ماندات الىپ, بارشا حالىقتىڭ قولداۋىنا يە بولعان سوڭ ونىڭ اتىنان ەلىمىزدىڭ تاۋەلسىزدىگىن جاريالاۋعا مۇمكىندىك الدىم. سوندىقتان, ءبىز بۇل كۇندى حالقىمىزدىڭ دامۋ جانە ءوسىپ-وركەندەۋدىڭ جاڭا جولىنا تۇسكەن كۇن رەتىندە اتاپ وتەمىز. بۇگىن استانا مەن وبلىستاردا ەلىمىزدىڭ ازاماتتارىنا تۇرعىن ۇيلەر بەرىلۋدە, حالىقتىڭ يگىلىگىنە قىزمەت ەتەتىن جاڭا الەۋمەتتىك نىساندار ىسكە قوسىلۋدا. بۇدان بولەك, بۇگىن ەلوردادا «ەكو تاكسي» جوباسىنىڭ تۇساۋى كەسىلدى, ول «ەكسپو-2017» كورمەسىنە دايىندىقتىڭ باسى بولىپ سانالادى. بۇل استاناداعى ەكولوگيالىق احۋالدى جاقسارتۋعا باعىتتالعان. ءبىز وسى تاجىريبەنى الماتىعا جانە قازاقستاننىڭ باسقا دا قالالارىنا تاراتامىز» دەدى نۇرسۇلتان ءابىشۇلى.
بۇل نىسان – كۇللى الەمگە بەلگىلى ارحيتەكتور نورمان فوستەردىڭ تۋىندىسى. وندا تاۋەلسىزدىگىمىزدىڭ تاريحى, الەمدىك ەكونوميكا مەن ساياسات جونىندە زەرتتەۋلەر جۇرگىزىلەدى. جاستار وتاندىق تاريح سالاسىندا جاڭاشا ءبىلىم الادى جانە تىلدەردى ۇيرەنەدى. كوپ فۋنكتسيونالدى عيماراتتىڭ اۋماعى 28 مىڭ شارشى مەتردەن اسادى, 9 قاباتتان تۇرادى. كىتاپحانانىڭ جالپى قورى 460 مىڭ كىتاپ ساقتاۋعا ارنالعان, ولاردىڭ 200 مىڭعا جۋىعى جابىق قور.
اتالمىش نىساندى سالۋعا اتسالىسقان قۇرىلىسشىلارعا, دەمەۋشىلەرگە ريزاشىلىعىن بىلدىرە وتىرىپ, ەلباسى عيماراتتىڭ مەملەكەت قارجىسىنا ەمەس, جەكە كاسىپكەرلەردىڭ قاراجاتىنا سالىنعانىن ايتتى.
