جىلداعى ءداستۇر بويىنشا قىستىڭ العاشقى كۇنى, اقوردا الدىندا باس شىرشانىڭ شامى جاعىلدى.
بيىل ۇيىمداستىرۋشىلار شىرشا شامىن جاعۋ ارقىلى بالالار مەن جاستاردىڭ سپورتقا دەگەن قىزىعۋشىلىعىن ارتتىرىپ, سالاۋاتتى ءومىر سالتىن ناسيحاتتاۋدى باستى ماقسات ەتىپتى. سونىڭ ءبىر ايعاعى رەتىندە بيىلعى شىرشا شىراعدانىن جاعۋ قۇرمەتى اۋەسقوي بوكستان الەم چەمپيو-نى, حالىقارالىق سپورت شەبەرى دانيار ەلەۋسىنوۆكە بۇيىردى. «جىلان جىلى ەل سپورتى ءۇشىن جەتىستىكتەرگە تولى بولدى. بۇگىندە دۇنيەجۇزى قازاق ەلىن جانە قازاقستاندىق سپورتشىلاردى جاقسى بىلەدى. تولايىم تابىستارىمىز بولا بەرسىن. كەلەر جىلدان دا ۇلكەن جەتىستىكتەر مەن جەڭىستەر تىلەيمىن» دەپ ىزگى تىلەگىن جەتكىزگەن جاس سپورتشى 25 مەترلىك شىرشانى قول يشاراسىن جاساپ, سامالاداي جارقىراتتى, ىلە-شالا كۇللى رەسپۋبليكاداعى شىرشالاردىڭ, سونىڭ ىشىندە ەلورداداعى ەلۋدەن اسا جاڭاجىلدىق شىرشالار جارىققا بولەندى.
سالتاناتتى شارانىڭ قۇرمەتىنە «كوڭىل-كۇي قۇبىلىسى» اتتى تەاترلاندىرىلعان قويىلىم كورسەتىلدى. جىلدىڭ ءتورت مەزگىلىن بيمەن بەينەلەپ, كىسى بويىمەن ءبىردەي قۋىرشاقتار جۇرشىلىقتى ەرتەگى الەمىنە جەتەلەدى.
اياز اتا مەن اقشاقاردىڭ بەينەسىندەگى اكتەرلەر عاني قۇلجانوۆ پەن اننا بۋربۋكينا دا جىلى لەبىزدەرىمەن تويدىڭ ءسانىن اشا ءتۇستى. جاڭا جىل, ەڭ الدىمەن, بالالارعا قىزىقتى. سوندىقتان مەرەكەلىك قويىلىمعا قىزىلدى-جاسىلدى كيىنگەن 4 مىڭنان اسا ەلوردالىق وقۋشى قاتىستى. مەرەكەلىك كوڭىل-كۇي مەدەت ءشايكەلوۆ, مارجان اراپباەۆا مەن رۇستەم جۇگىنىسوۆتىڭ ورىنداۋىنداعى «سپورت, سپورت, سپورت» انىمەن قىزا ءتۇستى.
شىرشانىڭ شامى جاعىلعان سوڭ, 7 مينۋتتاي وتشاشۋ بولدى.
قىمبات نۇرعالي
