بىرەگەيلەر انىقتالاتىن بىرىنشىلىك
استانادا ۇستەل تەننيسىنەن قازاقستان رەسپۋبليكاسىنىڭ چەمپيوناتى ءوتىپ جاتىر. بىرەگەيلەردى انىقتايتىن بىرىنشىلىككە ەلىمىزدىڭ 16 وڭىرىنەن 112 سپورتشى قاتىسىپ جاتىر. وسى سايىستىڭ ناتيجەسىنەن كەيىن ۇلتتىق قۇراما جاساقتالماق.
ەلوردادا ءوتىپ جاتقان ەل چەمپيوناتى 11 ناۋرىز كۇنى باستالدى. تۋرنيردىڭ العاشقى كۇنىندە ايەلدەر اراسىنداعى كوماندالىق كەزدەسۋلەر ءوتتى.
– بۇل چەمپيونات استانا قالاسىندا العاش رەت ۇيىمداستىرىلىپ تۇر. بۇقارالىق سپورتقا باسا ءمان بەرەتىن ءبىزدىڭ قالامىز ءۇشىن بۇل تۋرنير – ۇلكەن مەرەكە. بىرىنشىلىككە استانا قالاسىنىڭ 20 تەننيسشىسى قاتىسۋدا. ونىڭ تەڭ جارتىسى ەرلەر بولسا, جارتىسى – قىزدار. بارلىعى – ءبىزدىڭ مەكتەپتىڭ تۇلەكتەرى مەن ءتاربيەلەنۋشىلەرى. استانالىقتاردىڭ ىشىندە كيريلل گەراسيمەنكونى ەرەكشە اتاپ وتۋگە بولادى. ول – سپورت شەبەرى, بىرنەشە دۇركىن قازاقستان چەمپيونى, قر سپارتاكياداسىنىڭ جەڭىمپازى, سونداي-اق, ريو وليمپياداسىنىڭ قاتىسۋشىسى. بولاشاعىنان مول ءۇمىت كۇتتىرەتىن سپورتشىلاردىڭ قاتارىندا ماليكا ساندىباەۆا دا بار. قالعان جاستارىمىزدى دا وسال دەۋگە بولمايدى. ولاردىڭ وسىنداي ۇلكەن سايىسقا قاتىسۋىنىڭ ءوزى مارتەبە, تاجىريبە بولماق, – دەدى №9 بالالار مەن ءجاسوسپىرىمدەر سپورت مەكتەبىنىڭ ديرەكتورى ايدىن توقباەۆ.
چەمپيوناتتا ەرلەر جانە ايەلدەر اراسىندا كوماندالىق كەزدەسۋلەر, جۇپتىق سايىستار جانە جەكە رازريادتاعى سايىستار وتەدى. سونداي-اق, بۇل تۋرنيردە جىگىتتەر مەن قىزدار جاعى ءوزارا ءبولىنىپ باق سىناماي, جۇپتىق جارىستا ارالاسىپ تا سىنعا تۇسەدى.
ناۋرىزدىڭ 16-سىنا دەيىن جالعاساتىن بىرىنشىلىكتە ازىرگە ايەلدەر اراسىنداعى كوماندالىق سايىس جەڭىمپازدارى انىقتالدى. بۇل سىندا قاراعاندىنىڭ قىزدارى تاعى دا چەمپيون اتاندى. تاعى دا دەۋىمىزدىڭ سەبەبى بار. بۇلار بىلتىرعى سايىستا دا التىننان القا تاققان. ولار جارتىلاي فينالدا باتىس قازاقستان وبلىسىنىڭ كومانداسىن جەڭىپ, فينالعا شىقتى. اقتىق سىنداعى قارسىلاسى الماتى كومانداسى بۇعان دەيىن پاۆلودارلىقتاردى جولدا قالدىردى.
سونىمەن, فينالدا قاراعاندى وبلىسى الماتىلىقتاردى 5:0 ەسەبىمەن تىزە بۇكتىردى. كوماندانىڭ ساپىندا ناتاليا سلادكوۆا, يۋليا گاتس, زاۋرەش اقاشەۆا, مارگاريتا حارەچكو جانە الەكساندرا سميرنوۆا وينادى. ال الماتىنىڭ قورجىنىنا كۇمىس مەدال سالعان قىزدار – ۆالەنتينا ۋسپانوۆا, ايا الىمباەۆا, انەل باحىت, ەلەنا بەيسەنوۆا جانە دينا ءجانادىلوۆا.
– سايىس وتە جوعارى دەڭگەيدە ءوتىپ جاتىر. جان-جاقتان جينالعان سپورتشىلار جەتەرلىك. ولاردىڭ ىشىندە تالاي جارىستا الدىڭعى قاتاردان كورىنىپ جۇرگەن سپورتشىلار دا بار. وسى سپورت تۇرىنە دەن قويعانىما بۇگىندە 24 جىل بولىپتى. اراسىندا ازداپ ءۇزىلىس الىپ, دەمالعان كەزىم دە بولدى. وسىناۋ جىلداردىڭ ىشىندە قازاقستان ۇلتتىق قۇراماسىنىڭ ساپىندا ۋنيۆەرسيادانىڭ جەڭىمپازى بولدىم. بىرىنشىلىكتىڭ ءساتتى وتۋىنە تىلەكتەسپىن, – دەدى ەلوردالىق تەننيسشى ءاليا جانپەيىسوۆا.
بۇگىن جەكە رازريادتاعى الدىن الا ويىندار جالعاسادى. ال ەرتەڭ جۇپتىق جارىستار باستالماق.
ورىنبەك وتەمۇرات