كەشە ۇلتتىق مۋزەيدە «يراك اشىق اسپان استىندا: قازاقستاندىق جانە پولشالىق بىتىمگەر اسكەرلەر» اتتى حالىقارالىق كوشپەلى فوتوكورمە اشىلدى.
بۇل يگىلىكتى شارانى قر قورعانىس مينيسترلىگى, ۇلتتىق مۋزەي جانە كاپيتان-بىتىمگەر قايرات قۇداباەۆ اتىنداعى قوعامدىق قور مەن قازاقستانداعى پولشا رەسپۋبليكاسىنىڭ قورعانىس ىستەرى جونىندەگى اتتاشەسى ۇيىمداستىردى.
كورمەگە 50-دەن اسا تۋىندى ۇسىنىلدى. ونىڭ ىشىندە 2005 جىلعى 9 قاڭتاردا ۆاسيب پروۆينتسياسىندا ەرلىكپەن قازا تاپقان 29 جاسار كاپيتان قايرات قۇداباەۆتىڭ اۆتورلىق سۋرەتتەرى بار.
مادەني شارانىڭ اشىلۋىندا قر قورعانىس ءمينيسترىنىڭ ورىنباسارى گەنەرال-لەيتەنانت تالعات مۇقتاروۆ پەن پولشا رەسپۋبليكاسىنىڭ زاپاستاعى بريگادا گەنەرالى گجەگوج بۋشكا كورمەنىڭ ماڭىزىنا توقتالىپ, ەكى جاقتىڭ بىتىمگەر اسكەرلەرى يراكتا بەيبىت ءومىردى قالىپتاستىرۋعا بەلسەندى ۇلەس قوسقاندىعىن ايتتى. سونداي-اق اشىلۋ سالتاناتىندا استانا – ۆارشاۆا تىكەلەي تەلەكوپىرى ىسكە قوسىلىپ, وعان پولشا رەسپۋبليكاسىنىڭ ۇلتتىق قاۋىپسىزدىك بيۋروسى اسكەري كومانداسى دەپارتامەنتىنىڭ ديرەكتورى, بريگادا گەنەرالى ياروسلاۆ كراشەۆسكي مەن قازاقستاننىڭ پولشاداعى وكىلەتتى جانە توتەنشە ەلشىسى مارعۇلان باقىتۇلى قاتىسىپ, جيىلعان قاۋىمعا ىزگى لەبىزدەرىن ءبىلدىردى.
يراكتاعى ميسسيا كەزىندە قازباتتىڭ ينجەنەرلىك-ساپەرلىك وتريادىمەن 290 قازاقستاندىق اسكەري قىزمەتشىلەر قاتىسىپ, 10 رەت روتاتسيا بولعان. كونتينگەنتتىڭ نەگىزگى ماقساتى – جارىلماي قالعان اسكەري قارۋ-جاراقتاردى تاۋىپ الىپ زالالسىزداندىرۋ, دالالىق پۋنكتتەردى اۋىزسۋمەن قامتۋ, سۋدى تازالاۋ جانە مەديتسينالىق جاردەم بەرۋدى كوزدەگەن.
يراكتاعى ميسسيا باستالعالى جەكە قۇرام 4 ميلليون جارىلۋ قاۋىپ بار نارسەلەردىڭ كوزىن جويىپ, 6 718 تەكشە مەتر سۋدى تازالاعان, ساپەر ىسىنە يراك اسكەري اكادەمياسىنىڭ 572 كۋرسانتىن ماشىقتاندىرعان. قازاقستاندىق اسكەري دارىگەرلەر ايەلدەر مەن بالالارعا, سونداي-اق لاڭكەستىك شابۋىلداردان زارداپ شەككەندەرگە مەديتسينالىق جاردەم بەرۋمەن اينالىسقان.
الداعى 25 مامىردا ۆارشاۆاداعى پولشا ۆويسكوسى مۋزەيىندە وسى فوتوكورمەنىڭ اشىلۋى بولماق.
