كولىگىڭىزدىڭ ابدەن توزىعى جەتتى مە؟ وندا ءاۆتوموبيلىڭىزدى ءتيىستى ورىنعا وتكىزسەڭىز, جاڭا كولىك الۋعا جەڭىلدىك بەرىلەدى.
50 مىڭ كۆوتا ءبولىندى
قر ەنەرگەتيكا مينيسترلىگى ەسكى كولىكتەردى قابىلداۋ باعدارلاماسى بويىنشا 2019 جىلعا ارنالعان كۆوتا كولەمىن بەكىتتى. وكم وپەراتورى جاۋاپكەرشىلىگى شەكتەۋلى سەرىكتەستىگىنە كولىكتەردى اقشاعا جانە سەرتيفيكات بەرۋ باعدارلاماسىنا بيىل 50 مىڭ كۆوتا ءبولىندى. ونىڭ 25 مىڭى جەڭىلدىك سەرتيفيكاتى بولسا, قالعان 25 مىڭى اقشالاي وتەماقىعا قاراستىرىلىپ وتىر.
ايتا كەتۋ كەرەك, بيىل جۇك كولىكتەرىنە بەرىلەتىن سەرتيفيكات قۇنى ۇلعايتىلدى. ماسەلەن, بىلتىر ونىڭ قۇنى 450-650 مىڭ تەڭگە بولسا, وسى جىلدان باستاپ ول 750 مىڭ تەڭگەگە دەيىن كوتەرىلدى. ال جەڭىل اۆتوكولىك سەرتيفيكاتىنىڭ قۇنى بۇرىنعىشا – 315 مىڭ تەڭگە قالپىندا قالدى.
سەرتيفيكات قۇنى كولىك قۇرالىنىڭ ساناتىنا بايلانىستى باعدارلاما تالابى بويىنشا جويۋعا تاپسىرىلاتىن كولىكتەر تولىق جيىنتىقتا قابىلدانادى. ەسكى تەحنيكانى وتكىزۋشىگە جەڭىلدىك سەرتيفيكاتى بەرىلەدى. وتاندىق اۆتووندىرۋشىدەن كولىك ساتىپ العان كەزدە سەرتيفيكات سوماسى كولىك باعاسىنان شەگەرىلىپ قالادى. جەڭىلدىك سەرتيفيكاتىنىڭ قۇنى تاپسىرىلاتىن كولىك قۇرالىنىڭ ساناتىنا بايلانىستى باعالانادى. باعدارلاما بويىنشا وتاندىق وندىرۋشىدەن كەز كەلگەن ساناتتاعى كولىك قۇرالىن سەرتيفيكات ارقىلى الۋعا بولادى.
سونداي-اق اۆتوكولىك ساتىپ العاندا 2 سەرتيفيكاتتى بىرىكتىرۋ مۇمكىندىگى دە قاراستىرىلعان. بىراق جەڭىلدىك سەرتيفيكاتىن وزگەنىڭ اتىنا تىركەۋ ەكى رەتتەن ارتىق جۇرگىزىلمەيدى. ال ونى قايتارىپ بەرۋگە نەمەسە قولما-قول اقشاعا اۋىستىرۋعا مۇمكىندىك جوق. سەرتيفيكات تىركەلگەن كۇننەن باستاپ 12 ايعا دەيىن جارامدى بولادى.
جەڭىلدىك سەرتيفيكاتى باعدارلاماسى بويىنشا قانداي كولىك ساتىپ الۋعا بولاتىندىعى تۋرالى مالىمەتتى اۆتووندىرۋشىلەردىڭ رەسمي سايتتارىنان كورە الاسىزدار: www.bipek.kz, www.aziaavto.kz, www.sap.com.kz, www.hyundai-hta.kz, www.daewoobus.kz, www.kamazkamaz.kz.
88 مىڭ كولىك قابىلداندى
ەستەرىڭىزگە سالساق, مۇنداي ەسكى كولىكتى جويىپ, جاڭاسىن الۋعا جەڭىلدىك سەرتيفيكاتىن بەرۋ باعدارلاماسى قازاقستاندا 2017 جىلدىڭ 26 ماۋسىمىنان باستاپ ىسكە قوسىلعان بولاتىن. وسى ۋاقىت ىشىندە قازاقستاندىقتار بۇل باعدارلاما بويىنشا 20939 كولىگىن سەرتيفيكاتقا الماستىرعان. سونداي-اق ساتىپ الۋ باعدارلاماسى بويىنشا 67052 جەڭىل اۆتو قابىلدانىپ, ەسكى كولىگىن تاپسىرعان وتانداستارىمىزعا 10 ملرد 48 ملن تەڭگە كولەمىندە قاراجات اۋدارىلعان ەكەن. جالپى, قوس باعدارلامانىڭ قورىتىندىسى بويىنشا وكم وپەراتورى جشس 88 مىڭعا جۋىق ەسكى كولىكتى قابىلداعان.
ەسكى كولىكتەردى جويۋعا قابىلداۋ باعدارلاماسى وتاندىق اۆتوپاركتى جاڭارتىپ, ەكولوگيالىق كولىك قۇرالدارىنىڭ ءوندىرىسىن ىنتالاندىرۋ جانە قايتا وڭدەۋ سالاسىن دامىتۋعا مۇمكىندىك بەرمەك.
ەسكىنىڭ اتى – ەسكى, ەگەر توزىعى جەتكەن كولىگىڭىز بار بولسا, ونى تەزىرەك وتكىزىپ, جاڭالاۋعا اسىعىڭىز. سەبەبى سەرتيفيكات سانى شەكتەۋلى. ول ءۇشىن auto.recycle.kz سايتىنا كىرىڭىز نەمەسە 8 800 080 08 65 نومىرىنە ياكي 8 702 204 97 85 WhatsApp جەلىسىنە حابارلاسساڭىز بولعانى.
