ەستەرىڭىزدە بولسا, گازەتىمىزدىڭ №47 سانىندا «قولجەتىمدى باسپانا – 2020» باعدارلاماسى بويىنشا «قازاقستاننىڭ تۇرعىن ءۇي قۇرىلىس جيناق بانكىنىڭ» جولداماسى بويىنشا جاس وتباسىلارعا ارنالعان باعدارلامانى جۇزەگە اسىرۋ ءتاسىمى جاريالانعان ەدى. ۇكىمەت 2012 جىلى بەكىتكەن اتالمىش باعدارلامانىڭ «جەكە مەنشىككە وتەتىن ارەندالىق باسپانا» تارماعىنىڭ نەگىزگى وپەراتورى – «قازاقستان يپوتەكالىق كومپانياسى يۇ» اق. وسى ورايدا, كومپانيانىڭ جانىنان ارنايى قۇرىلعان «قازاقستاننىڭ تۇرعىن ءۇي – قۇرىلىس كورپوراتسياسى» اق باسقارما توراعاسىنىڭ ورىنباسارى باتىرجان قاراكوزوۆتەن ازاماتتارعا باعاسىنا سايلى باسپانا ۇسىنۋ جولىندا قانداي ىستەر اتقارىلعانىن سۇراپ بىلگەن ەدىك.
– باتىرجان كومەكبايۇلى, ەلباسى ءوزىنىڭ جولداۋىندا جىل سايىن ەلىمىزدە كەم دەگەندە 6 ملن شارشى مەتر جاڭا ءۇي پايدالانۋعا بەرىلۋى كەرەكتىگىن تاپسىرعانى ءمالىم. وسى مەجەنىڭ ورىندالۋىنا «قازاقستان يپوتەكالىق كومپانياسى» قانداي ۇلەس قوسىپ جاتىر؟
– وزىمىزگە ارتىلعان مىندەتكە جاۋاپكەرشىلىك تانىتىپ, تۇرعىن ءۇي قۇرىلىسىن ساپالى ءارى دەر كەزىندە ورىنداۋ ءۇشىن 2012 جىلدىڭ تامىزىندا «قازاقستاننىڭ تۇرعىن ءۇي – قۇرىلىس كورپوراتسياسى» قۇرىلدى. كورپوراتسياعا قۇرىلىستىڭ بارلىق تەحنولوگيالىق پروتسەسىن باقىلاۋ, ياعني, جوبالاۋدان باستاپ تۇرعىن ءۇيدى قابىلداۋعا دەيىنگى بارلىق قىزمەت مىندەتى جۇكتەلدى. وسى ماقساتتا رەسپۋبليكالىق بيۋدجەتتەن بىلتىر 15 ملرد تەڭگە ءبولىندى. اتقارعان جۇمىستىڭ ناتيجەسى رەتىندە كورپوراتسيا 2014 جىلدىڭ ءبىرىنشى جارتىجىلدىعىندا ەلىمىزدىڭ 4 ايماعىندا 20 تۇرعىن ءۇي نىسانىن تاپسىرۋعا نيەتتى ەكەنىن
باسا ايتقىمىز كەلەدى.
– اتاپ ايتقاندا, قاي ايماقتار؟
– سانامالاپ ايتساق, الماتى قالاسىندا جالپى اۋماعى 6022 شارشى مەتردى قۇرايتىن 108 پاتەرلىك 2 تۇرعىن ءۇي, شىمكەنت قالاسىندا 56 195 شارشى مەترلىك نەمەسە 1080 پاتەرلىك, توعىز قاباتتى 15 تۇرعىن ءۇي جانە قاراعاندى قالاسىندا 20 176 م2 قۇرايتىن, 325 پاتەرلىك بەس قاباتتى 3 تۇرعىن ءۇي جانە پاۆلودار قالاسىندا 9 450 م2 قۇرايتىن 180 پاتەرلىك توعىز قاباتتى 1 تۇرعىن ءۇي سالىنىپ بىتەدى.
– ەندى ارەندالىق باسپانانىڭ بەرىلۋ ءتارتىبىن ايتا كەتسەڭىز.
– ارەندالىق باسپانا ارەنداتورعا
15 جىل مەرزىمگە بەرىلەدى. 1 شارشى مەتردىڭ قۇنى شامامەن 1000 – 1 300 تەڭگە. ون جىلدان كەيىن ارەنداتور باسپانانى ۋاقىتىنان بۇرىن تولەمىن جاساپ ساتىپ الۋىنا بولادى. وعان قوسا, جالعا الۋ مەرزىمى كەزىندە ارەنداتوردىڭ ءوتىنىشى نەگىزىندە پاتەرىن كەڭەيتۋگە جاعداي جاسالعان.
ەسكەرە كەتەرلىگى, قازاقستاننىڭ تۇرعىن ءۇي-قۇرىلىس كورپوراتسياسى تۇرعىزعان ارەندالىق باسپانا جەرگىلىكتى اكىمدىكتىڭ ءتىزىمى بويىنشا بەرىلەدى. ياعني, باسپانانى الۋعا ۇمىتكەرلەردى تىركەۋ كەزىندە الدىمەن شىن مۇقتاج توپتاردىڭ مۇددەسى ەسكەرىلەدى.
– جالپى, كورپوراتسيانىڭ «قولجەتىمدى باسپانا – 2020» باعدارلاماسى اياسىندا سالىناتىن ۇيلەرى ەلىمىزدىڭ بۇكىل اۋماعىن قامتي ما؟
– ارينە, بيىل تاعى ەلىمىزدىڭ بىرنەشە ايماعىندا تۇرعىن ءۇي قۇرىلىسىن باستاماقشىمىز. انىعىراق ايتساق, ورال, اقتوبە, پەتروپاۆل, قوستاناي, وسكەمەن, تاراز, قىزىلوردا, كوكشەتاۋ جانە استانادا كوپ قاباتتى ۇيلەر سالىنادى. ەگەر سانمەن سويلەتسەك, «قازاقستان تۇرعىن ءۇي – قۇرىلىس كورپوراتسياسى» باعدارلامانىڭ «جەكە مەنشىككە وتەتىن ارەندالىق باسپانا» تارماعى بويىنشا اعىمداعى جىلى 136 000 شارشى مەتر, 2015 جىلى 250 000 ش.م تۇرعىن ءۇيدى پايدالانۋعا بەرمەك. ال, 2016 جىلدان باستاپ باعدارلاما اياسىندا جىل سايىن 530 000 م2 باسپانا سالۋ كوزدەلىپ وتىر. بۇل دەگەنىمىز – 9-9,5 مىڭ پاتەر.
ادىلبەك جاپاق
