كەڭ اۋقىمدى شاراعا قر مادەنيەت جانە اقپارات ءمينيسترى مۇحتار قۇل-مۇحاممەد, سەناتور سارسەنباي ەڭسەگەنوۆ, قازاقستاندىق اۋعان جاۋىنگەرلەرى قاۋىمداستىعى توراعاسىنىڭ ورىنباسارى, ءماجىلىس دەپۋتاتى باقىتبەك سماعۇل, «قر قارۋلى كۇشتەرى ارداگەرلەرى» قب توراعاسى, «حالىق قاھارمانى» باقىتجان ەرتاەۆ, رامىزدەر جونىندەگى رەسپۋبليكالىق كوميسسيانىڭ مۇشەلەرى سەرىك ەركىمبەكوۆ جانە قر مەملەكەتتىك ەلتاڭباسىنىڭ اۆتورى جانداربەك مالىبەكوۆ ارنايى كەلدى.
ۇلتتىق قۇندىلىقتار ۇلىقتالعان كۇن
فورۋمنىڭ العاشقى كۇنى رەسپۋبليكانىڭ تۇكپىر-تۇكىپىرىنەن كەلگەن 200-گە تارتا دەلەگات اتىراۋدىڭ مۇراجايلارىن, تاريحي جانە مادەني ورىندارىن ارالاپ, مادەني ءىس-شارالارعا قاتىستى.
ەگەمەن ەلدىڭ رۋحى – مەملەكەتتىك ءانۇران شىرقالىپ, ەلدىڭ تۇتاستىعىن پاش ەتەتىن ەلتاڭباسى جارقىراعان, كوكتە تۋى جەلبىرەگەن سالتاناتتى فورۋم بۇعان دەيىن تۇركى تەكتەس حالىقتاردىڭ رۋحاني ورتالىعى – تۇركىستاندا باستاۋ الىپ, الاشتىڭ رۋحاني ورتالىعى – سەمەي, پاۆلودار, قوستاناي مەن استانا قالالارىندا جالعاسقان ەدى. ال, اتىراۋدا وتكەن فورۋمدا ءۇش مىڭعا جۋىق قاتىسۋشى بولدى.
اتىراۋ فورۋمى «ءبىزدىڭ تۋ, ءبىزدىڭ ەلتاڭبا, ءبىزدىڭ ءانۇران» اتتى پاتريوتتىق اكتسيادان باستاۋىن الدى. جەر-جەردەن جينالعان جۇرتشىلىقپەن بىرگە ساپ تۇزەگەن اۆتوجۇرگىزۋشىلەر, بايكەرلەر مەن سالت اتتىلار «اقجايىق» قوناق ءۇيى الدىنان ەنى – 10 مەتر, ۇزىندىعى – 20 مەتر بولاتىن مەملەكەتتىك رامىزدەرىمىز ەلتاڭبا مەن تۋدى سالتاناتتى تۇردە الىپ ءجۇرىپ, ورتالىق يساتاي-ماحامبەت الاڭىنا بارىپ, استانا ۋاقىتىمەن ساعات 11.00-دە تۋدى تۇعىرعا كوتەردى. بۇل كەزدە ءبىر ۋاقىتتا ەلىمىزدىڭ بارلىق وڭىرىندە مەملەكەتتىك ءانۇران ورىندالىپ, مەملەكەتتىك رامىزدەردى سالتاناتتى الىپ جۇرۋمەن پاتريوتتىق شارالار ۇيىمداستىرىلعان-دى.
اتىراۋداعى ورتالىق الاڭعا جيىلعان جۇرت رەسپۋبليكانىڭ بارلىق حالقىمەن بىرگە ءبىر مەزەتتە ەگەمەن ەلدىڭ رۋحى – مەملەكەتتىك ءانۇراندى ءبىر كىسىدەي شىرقادى. ەرەكشە ەلتاڭبا, اسقاق تۋ جانە ايبىندى ءانۇران جۇرتشىلىقتىڭ رۋحىن كوتەرىپ, كەۋدەلەرىنە وتانشىلدىق سەزىمىن ۇيالاتتى.
– ءرامىزىمىز 1992 جىلدىڭ 4 ماۋسىمىندا كوتەرىلدى. بۇلار – مەنىڭ تۇمارىم. سەبەبى, شاڭىراق – ەلىمنىڭ تاتۋلىعى, بىرلىگى مەن بولاشاعى. شاڭىراققا كوز تىكسەڭ, كوك اسپان, كوك بۇلتتاردى كورەسىڭ. «باستاۋدىڭ سۋى لايلانسا, سۋ تاۋسىلادى. رۋح لايلانسا, ەل تۇنشىعادى» دەگەن اتا-بابالارىمىزدان قالعان اسىل ءسوز بار. باستاۋدىڭ سۋىن –
رۋحىمىزدى ساقتاۋىمىز قاجەت. بۇگىندە ەگەمەن ەلمىز, كوك تۋىمىز جەلبىرەپ تۇر كوگىمىزدە, ەل ۇرانىمىز بەن تاڭبامىزعا كوز سۇيسىنەدى. كوككە قالىقتاعان بايراعىمىزداعى كۇن بىزگە باقىت, جارىق سىيلايدى. ول – ماڭگىلىكتىڭ بەلگىسى. ال, قىران – قاھارماندىعىمىزدى ايعاقتايدى, – دەپ جۇرەكجاردى لەبىزىن بىلدىرگەن «حالىق قاھارمانى», قر پارلامەنتى ءماجىلىسىنىڭ دەپۋتاتى باقىتجان ەرتاەۆ پاتريوتتىق فورۋمدى جوعارى دەڭگەيدە ۇيىمداستىرىپ وتىرعان وبلىس باسشىسى باقتىقوجا ىزمۇحامبەتوۆتىڭ ەڭبەگىنە جەمىس تىلەدى.
– پاتريوتيزم ساياسي ۇعىم ەمەس, ول – مادەني, تاريحي تۇسىنىك, – دەيدى الماتى قالاسىنان قاتىسقان دەلەگات, اۋعان سوعىسى ارداگەرى اسكەرباي الپەيىسوۆ. – ءار ادام ءوزىنىڭ شىققان تەگىن, ءومىر-سالتىن, دۇنيەتانىمىن ءومىر ءسۇرۋ تارتىبىنە بايلانىستى بويىنا ءسىڭىرىپ, سول بويىنشا قازىرگى زاماننىڭ اعىمىنا سايكەس جوعارى تۇسىنىكتى ساناسىنا جيناقتاپ, ىزگىلىكتى ءىس جاساي السا, ناعىز پاتريوت – وسى. ەلىنە, جەرىنە, حالقىنا دەگەن بوياماسىز, ىشكى تازا سەزىم. بۇگىنگىدەي باستامالاردىڭ ەلىمىزدە كەڭىنەن قانات جايۋىنا جول اشاتىن, جاستاردىڭ رۋحاني جاعىنان وسۋىنە سەرپىن بەرەتىن فورۋم وتە قاجەت. ويتكەنى, ادام ءوز قاتارىنا قاراپ, بوي تۇزەۋ ارقىلى وي-ساناسىن جاڭعىرتادى, جاقسىلىققا ۇمتىلادى. ءسويتىپ, قوعامنىڭ دامۋىنا ىقپال ەتەدى. مۇنداي كەڭ كولەمدى شارالاردى بالاباقشادان باستاپ ۇيىمداستىرۋ كەرەك. ويتكەنى, بالانى قالاي باعىپ, وسىرسەڭ ول سولاي وسەدى ەمەس پە؟! – دەپ ءسوزىن اياقتادى ول.
– بۇگىن ەلىمىزدىڭ مارتەبەسىن اسقاقتار قۋانىشتى كۇن! اسىرەسە, جاس ۇرپاق ءۇشىن ماڭىزدى كۇن! قازاقستانىمىز جاساي بەرسىن! ەل الدىندا تۇرعان بولاشاق جوسپارلارىن بىرگە جۇزەگە اسىرايىق! ەلىمىزدە جەتىم بالا بولماسىن!,- دەيدى 110 جەتىم بالانى باۋىرىنا باسقان «نۇر» قايىرىمدىلىق بالالار ءۇيىنىڭ ديرەكتورى تۇياق ەسقوجينا.
تانىمال سپورتشى, مانەرلەپ سىرعاناۋدان الەم چەمپيونى دەنيس تەن دە فورۋمنىڭ جاستارعا بەرەتىنى مول ەكەنىن جاسىرمادى: «مەن اتىراۋ قالاسىنا العاش رەت كەلىپ تۇرمىن. مۇنداي اۋقىمدى شاراعا دا العاش قاتىسۋىم. بۇل جيىنعا شاقىرىلعانىما وتە قۋانىشتىمىن. بويىمدا وتانشىلدىق سەزىمى تولىپ, تولقىپ تۇرمىن. اسىرەسە, مەملەكەتىمىزدىڭ ءانۇرانىن اسا جاقسى كورەمىن».
حالقىمىزدىڭ رۋحىن, ۇلتتىق سالت-ساناسىن, قاھارماندىعى مەن دانالىعىن, بولاشاققا ءۇمiتiن, ارمان-تiلەگiن جەتكiزەتiن ەرەكشە قۇندى بەلگiلەر – ۇلتتىق رامىزدەرىمىزدى ۇلىقتاپ, جاستاردى وتانسۇيگىشتىككە باۋليتىن «مەنىڭ قازاقستانىم» اتتى رەسپۋبليكالىق ءVى پاتريوتتار فورۋمى وسىلاي باستالدى.
«جىل پاتريوتتارى» ماراپاتتالدى
ەگەمەندىگىمىزدىڭ بەرىك نىشانى – مەملەكەتتىك رامىزدەر كۇنى وتكەن قازاقستان پاتريوتتارىنىڭ VI فورۋمىنىڭ سالتاناتتى جيىنىنا مادەنيەت جانە اقپارات ءمينيسترى مۇحتار قۇل-مۇحاممەد ارنايى قاتىسىپ, پرەزيدەنت نۇرسۇلتان نازارباەۆتىڭ كەڭ-بايتاق ەلىمىزدىڭ تۇكپىر-تۇكپىرىنەن جينالعان وتانشىل جاستارعا جولداعان قۇتتىقتاۋىن جەتكىزدى.
وندا «مەملەكەتتىك رامىزدەرىمىز – تۋ, ەلتاڭبا جانە ءانۇران – تاۋەلسىزدىگىمىزدى ايگىلەيتىن, بارشا قازاقستاندىقتاردىڭ بىرلىگىن تانىتاتىن قاسيەتتى دە ماڭىزى زور بەينە-نىشاندار. شىنايى پاتريوتيزم مەن وتانعا دەگەن سۇيىسپەنشىلىك ونىڭ مەملەكەتتىك رامىزدەرىن قاستەرلەۋدەن باستالادى.
ەجەلگى زاماننان بەرى وتانىنا ادال ۇلداردىڭ ايبىندى ەرلىكتەرى, اتامەكەنگە دەگەن شەكسىز ىقىلاسى كەيىنگى ۇرپاققا ەلى مەن جەرىن ءسۇيۋدىڭ جارقىن ۇلگىسىن كورسەتىپ بەردى. فورۋم جاستار باستاماسىنا سەرپىن بەرىپ, ۇلى مۇراتتارعا ۇمتىلعان قازاقستان قوعامىن بىرىكتىرەر ايتۋلى وقيعا رەتىندە وتەدى دەپ سەنەمىن» دەلىنگەن.
بۇدان سوڭ, شارانىڭ ەڭ باستى وقيعاسى – ەلىمىزدەگى «جىل پاتريوتتارىن» بەس نوميناتسيا بويىنشا ماراپاتتاۋ بولدى. ولاردىڭ اراسىندا سپورتشىلار, دارىگەرلەر, جاس عالىمدار, ۇستازدار مەن دارىگەرلەر, قۇتقارۋشىلار جانە ىشكى ىستەر ورگاندارىنىڭ قىزمەتكەرلەرى بار. «الەم تانىعان قازاقستان!» نوميناتسياسىندا ءوز ىسىنە سۇيىسپەنشىلىگىن, وتانعا دەگەن سەزىممەن استاستىرعان, تالانتىنا الەم تاڭداي قاققان تارلانبوزدار ماراپاتتالدى. سايىپقىراندارعا ارنايى سىيلىقتى تابىس ەتكەن مەملەكەتتىك ەلتاڭبا اۆتورى جانداربەك مالىبەكوۆ «شاڭىراق بيىك بولسىن دەگەن بەينەلەۋ ورىندالدى, بۇگىندە ەلتاڭبامىزدا كورسەتىلگەنىندەي, تەرەزەمىز تەڭ, شاڭىراعىمىز كەڭ مەملەكەت بولدىق» دەپ, جاستارعا اق جول تىلەدى. اتالمىش نوميناتسيا بويىنشا, «جىل پاتريوتى» اتانعانداردىڭ ىشىندە مانەرلەپ سىرعاناۋدان الەم چەمپيوناتىنىڭ كۇمىس جۇلدەگەرى دەنيس تەن دە بولدى. قۋانىشىن بىزبەن بولىسكەن دەنيس «بۇگىن مەن امەريكادا بولۋىم كەرەك ەدى. بىراق, مەن قالدىم. ويتكەنى, ءوز وتانىمنىڭ پاتريوتى اتانۋ – مەن ءۇشىن ۇلكەن مارتەبە, بارلىق سىيلىقتاردان دا قىمبات» دەگەن ول الداعى جوسپارلارىمەن دە ءبولىستى. مانەرلەپ سىرعاناۋ شەبەرىن الدا قىتايدا وتەتىن الەم كۋبوگىمەن قاتار, سوچي وليمپياداسى كۇتىپ تۇر. «ەلىڭنىڭ نامىسىن قورعاۋدان, ەلىڭنىڭ ابىرويىن اسقاقتاتۋدان اسقان باقىت جوق. تۋعان ەلىڭنىڭ تۋى كوكتە جەلبىرەپ, ءانۇرانى اۋەلەگەن ساتتە ەت-جۇرەگىڭدى ەرەكشە سەزىم بيلەيدى. ەلگە دەگەن ساعىنىشتىڭ ءتاتتى سەزىمى كەۋدەڭدى كەرنەپ تۇرادى. مۇنىڭ ءبارىن سەزىندىرەتىن ءبىر نارسە – كوكتە جەلبىرەگەن كوك بايراقتىڭ قۇدىرەتى مەن اۋەلەگەن ءانۇراننىڭ قۋاتى. سوچي وليمپياداسىندا ەلىم ءۇشىن تاعى ەرەكشە سىي جاسايمىن دەپ ويلايمىن», – دەدى سايىپقىران سپورتشى.
«اسقاق ازاماتتىق» نوميناتسياسى بويىنشا سىن ساعاتتا ناعىز ازاماتقا ءتان ءىس جاساعان بۇگىنگىنىڭ قاھارماندارى ماراپاتتالدى. مەيىرىمدىلىك, قايىرىمدىلىق, ءبىر سوزبەن ايتقاندا, ءوز حالقىنا قالتقىسىز قىزمەت ەتۋدى ومىرلىك بويتۇمار ەتكەندەرگە سىيلىقتى ساياساتتانۋشى نۇرلان ەرىمبەتوۆ تابىستادى. ولاردىڭ اراسىندا شىعىس قازاقستان وبلىسىنان كەلگەن كريمينالدىق پوليتسيانىڭ جەدەل ۋاكىلى ەرلان رۇستەموۆ, اناسىنىڭ جۇرەگىن مۇقتاج ادامعا بەرىپ, وزگەنىڭ ءومىرىن ساقتاۋعا سەپتىگىن تيگىزگەن يگور ۆوروتنيكوۆ, قوستانايلىق پوليتسەي ەرىك قويانباەۆ تا بولدى.
«جان جۇرەگىم – قازاقستان!» شىنايى پاتريوتيزمنىڭ اسقاق شىڭىنان كورىنگەندەردى حالىق قاھارمانى, ءماجىلىس دەپۋتاتى باقىتجان ەرتاەۆ ماراپاتتادى.
– ءبىزدىڭ بابالارىمىز تۇماداي تۇنىق باستاۋ سۋى لايلانسا, سۋ تاۋسىلادى, رۋح لايلانسا, ەل تۇنشىعادى» دەيدى. قۇدايعا شۇكىر, قانشاما قيىندىقتى باستان وتكەرسە دە, قازاقتىڭ رۋحى مۇقالعان كەزى جوق. كەرىسىنشە, نامىسى قايرالا ءتۇستى. سول نامىسى, رۋحى مىقتى بابالارىمىز بىزگە وسىناۋ ۇلان-عايىر جەردى اماناتتاپ, قازاق ەلىنىڭ تاۋەلسىز مەملەكەت بولۋىن اڭساپ ءوتتى. ەندى, مىنە, بابالار ارمانداعان تاۋەلسىز ەل بولعانىمىزعا 22 جىلعا اياق باستى, ءوزىمىزدىڭ مەملەكەتتىك ءانۇرانىمىز, تۋىمىز بار. ەلىمىز الەمگە تانىلدى, ەلباسىمىزدىڭ شەتەلدەرگە ساپارى كەزىندە, الەمدىك سپورت دودالارىندا قازاقتىڭ ءانۇرانى شىرقالىپ, كوك بايراعى ءجيى كوتەرىلەتىن مەرەيلى كۇنىمىز كوبەيدى. وسىناۋ ابىرويىمىز اسقاقتاعان, مەرەيىمىز تاسىعان قۋانىشتى كۇندەرىمىز ازايماعاي, ەلىن, جەرىن سۇيەتىن ازاماتتارىمىزدىڭ رۋحى مۇقالماعاي», – دەي كەلە حالىق قالاۋلىسى «جىل پاتريوتى» توسبەلگىسىن تابىستادى. اتاۋلى سىيلىقتى يەگەرلەرى – ەكى دۇركىن ازيا چەمپيونى شالقار جولامانوۆ, «ەرەن ەڭبەگى ءۇشىن» مەملەكەتتىك ناگراداسىنىڭ يەگەرى مايدان قۇسايىنوۆ اتاندى.
«ورگە قانات قاققان قازاقستان!» نوميناتسياسىن جۋرناليست وكسانا پيتەرس تابىستادى. ارناۋلى سىيلىق يەلەنگەندەردىڭ اراسىندا شاحماتتان ءتورت دۇركىن الەم چەمپيونى ءبيبىسارا اساۋباەۆا, زىمىران جانارمايىنىڭ جاڭا ءتۇرىن ويلاپ تاپقان اتىراۋلىق وقۋشى گاۋھار زايدەنوۆا دا بولدى.
ەڭ كىشكەنتاي نومينانت ءبيبىسارا اساۋباەۆا بۇگىندە بار بولعانى توعىز جاستا. شاحماتپەن 4 جاستان باستاپ اينالىسىپ كەلەتىن بۇل ويىن تۇرىنە اتاسى باۋلىعانىن ايتادى. «بىردە تەلەديداردان الەكساندر كوستىنيۋكتى ماراپاتتاپ جاتقان ءساتتى كورىپ قالدىم. سول ساتتەن باستاپ, شاحماتپەن اينالىسۋعا دەگەن قۇشتارلىعىم وياندى. كۇنى بۇگىنگە دەيىن ءتۇرلى دەڭگەيدەگى 12 التىن, 1 كۇمىس مەدال يەلەندىم. سونىڭ ىشىندەگى 4 التىن مەدال حالىقارالىق دەڭگەيدە. بىراق, بۇگىنگى سىيلىقتىڭ مەن ءۇشىن ماڭىزى ەرەكشە. ەلىمنىڭ پاتريوتى ەكەندىگىمدى ماقتان تۇتامىن», – دەيدى ول.
رەسەيلىك عالىمداردىڭ تاڭدايىن قاقتىرعان اتىراۋلىق نومينانت گاۋھار زايدەنوۆا بۇگىندە جۇمىسىنىڭ كورشى ەل عالىمدارى تاراپىنان ءارى قاراي زەرتتەلىپ جاتقاندىعىن ايتادى. قۋانىشىمەن بولىسكەن ول: «ەلباسى ايتقانداي, ەلىمىزدىڭ بولاشاعى جاستاردىڭ قولىندا. ياعني, ەلىمنىڭ ەرتەڭى مەن ءۇشىن دە ماڭىزدى. وسىدان توقتاماي, تەك ءارى قاراي ءوزىمدى دامىتىپ, ءارى قاراي ءوزىمدى كورسەتكىم كەلەدى», – دەيدى.
«ۇلتتىق مادەنيەت, ءداستۇردى دامىتۋداعى ۇلەسى ءۇشىن» نومينانتتارىنا سىيلىقتى جازۋشى, كومپوزيتور, قازاقستان مەن قىرعىزستاننىڭ ەڭبەك سىڭىرگەن مادەنيەت قايراتكەرى يليا جاقانوۆ تابىستادى. نومينانتتاردىڭ اراسىندا بەلگىلى پروديۋسەر قىدىرالى بولمانوۆ تا بولدى. قىدىرالىنىڭ باستاماسىمەن ومىرگە كەلگەن قازاقى قۋىرشاقتاردى ايتپاعاننىڭ وزىندە, ءبىر عانا «ۇلىتاۋ» جوباسىنىڭ كۇللى قازاقتى, قازاق مادەنيەتى مەن قازاقتىڭ بولمىسىن الەمگە تانىتقانى امبەگە ايان.
بۇگىنگىنىڭ باتىرلارىن ماراپاتتاعان سالتاناتتى شارادا قازاقستاننىڭ ەسترادا جۇلدىزدارى مارجان اراپباەۆا, ايگۇل ۇلكەنباەۆا, ەربولات قۇدايبەرگەن, «الاشۇلى» جانە «كەش YوU» توپتارى ونەر كورسەتتى.
مەملەكەتتىك رامىزدەر – ەل مەرەيى
مەملەكەتىمىز بەن ەگەمەندىگىمىزدىڭ بەرىك نەگىزى سانالاتىن رامىزدەر كۇنىنە وراي وتكەن رەسپۋبليكالىق پاتريوتتار فورۋمى اتىراۋ پوليتەحنيكالىق كوللەدجى قابىرعاسىنداعى كەزدەسۋ كەشىنە ۇلاستى. ءار وڭىردەن كەلگەن دەلەگاتتاردىڭ باسىن قوسقان جيىن بارىسىندا رامىزدەر تاريحى كەڭ تالقىعا سالىنىپ, ءتۇرلى ۇسىنىس-تىلەكتەر ايتىلدى.
الدىمەن, اتىراۋلىقتاردىڭ باستاماسىمەن جۇزەگە اسىرىلعان سالتاناتتى شارا ۇيىمداستىرۋشىلارى مەن ەلىمىزدىڭ ءار تۇكپىرىنەن كەلگەن قاتىسۋشىلارعا العىس ايتقان قر مەملەكەتتىك ەلتاڭباسى اۆتورلارىنىڭ ءبىرى جانداربەك مالىبەكۇلى: «بۇل مەنىڭ اتىراۋعا العاش رەت كەلۋىم. اسەم قالانىڭ كەلبەتىن كورىپ, ەلىمىزدىڭ قالىپتاسىپ, ەڭسەسىن تىكتەگەنىنە كۋا بولىپ وتىرمىن» دەگەن شىنايى لەبىزىن جەتكىزدى.
ءتول تەڭگەمىزدىڭ اۆتورى, ەلىمىزدىڭ باس ديزاينەرى, قر ديزاينەرلەر وداعىنىڭ پرەزيدەنتى تيمۋر سۇلەيمەنوۆ: «اۋەلگى باستا وسىنداي ۇسىنىس كەلىپ تۇسكەن ساتتە بويىمدى قورقىنىش پەن قۋانىش قاتار بيلەدى. قىزىعى مەن قيىندىعى قاتار ورىلگەن, جاۋاپكەرشىلىگى مول جۇمىستىڭ ناتيجەسىندە «تەڭگە» دەپ اتالاتىن ۇلتتىق ۆاليۋتامىز ومىرگە كەلدى»,- دەيدى. ايتا كەتەلىك, تيمۋر بيماشۇلى مەملەكەتتىك رامىزدەردىڭ دە تۇجىرىمداماسىن جاساۋعا اتسالىسقان. ەلىمىزدىڭ ءار تۇكپىرىندەگى, اسىرەسە, استانا مەن الماتىداعى بىرنەشە اسەم عيماراتتارعا قولتاڭباسىن قالدىرعان ديزاينەر.
– مەملەكەتتىك رامىزدەر – كەز كەلگەن ەلدىڭ قايتالانباس دارا بەلگىسى. ءانۇران دا ءدال سولاي. «مەنىڭ قازاقستانىم» ءانى رەتىندە تانىمال بولعان قازاقستاننىڭ ءانۇرانى پرەزيدەنت نۇرسۇلتان ءابىشۇلى نازارباەۆتىڭ باستاماسى بويىنشا, 2006 جىلى 6 قاڭتاردا ەلىمىزدىڭ پارلامەنتىندە بەكىتىلدى. ءبىرىنشى رەت ول 2006 جىلى 11 قاڭتاردا مەملەكەت باسشىسىنىڭ سالتاناتتى ۇلىقتاۋ راسىمىندە ورىندالدى. ءماتىنىن بەلگىلى اقىن جۇمەكەن ناجىمەدەنوۆ پەن ەلباسىمىز نۇرسۇلتان نازارباەۆ جازعانى بەلگىلى. ەستىگەندە رۋح بەرەتىن, جىگەرىڭدى جانيتىن تاماشا تۋىندىنىڭ مۋزىكاسىن جازعان – دارىندى دا دارا ءشامشى اعامىزدىڭ ورنى بولەك, – دەيدى مەملەكەتتىك رامىزدەر جونىندەگى رەسپۋبليكالىق كوميسسيا مۇشەسى, بەلگىلى كومپوزيتور, قازاق ۇلتتىق ونەر اكادەمياسىنىڭ ءبىرىنشى پرورەكتورى سەرىك ەركىنبەكوۆ.
كوپتىڭ كوكەيىندە قالار تاعىلىمدى كەزدەسۋدى پارلامەنت سەناتىنىڭ دەپۋتاتى سارسەنباي ەڭسەگەنوۆ: «بۇگىن – ەلىمىز ءۇشىن ەرەكشە كۇننىڭ ءبىرى. دۇنيەجۇزىندەگى بىرنەشە ۇلتتىڭ ىشىندە ەكى جۇزگە جۋىعى عانا ءوز مەملەكەتىن قۇرعان. سول ەلدەردىڭ اراسىندا تاۋەلسىز قازاقستان رەسپۋبليكاسى بار. اتا-بابالارىمىزدىڭ جانىن اياماي قورعاپ, كەيىنگى بۋىنعا امانات ەتكەن ۇلان-عايىر ەلىمىزدىڭ مەملەكەتتىك رامىزدەرىن ءوز قولدارىمەن جاساعان اعالارىمىز ورتامىزدا وتىر», – دەپ قورىتىندىلادى:
– بۇگىن ءبىزدىڭ باسىمىزدى قۇراۋعا سەبەپ بولىپ وتىرعان تەك مەملەكەتتىك رامىزدەر عانا ەمەس, ونىڭ استارىندا تاۋەلسىزدىگىمىز تۇر, – دەيدى سارسەنباي قۇرمانۇلى. – سوندىقتان, وسىناۋ مەيرام – ەڭسەلى ەگەمەندىگىمىز بەن تاۋەلسىزدىگىمىزدىڭ مەرەكەسى. مەملەكەت بولعاسىن ءرامىزدەرى بولۋى شارت. رەسمي تۇردەگى ءۇش مەملەكەتتىك رامىزىمىزبەن قاتار, بەيرەسمي ءتورتىنشى بەلگىمىز بار, ول – انا ءتىلى. رامىزدەر مەن انا ءتىلىمىزدى قۇرمەتتەۋ – بارىمىزگە مىندەت, ءار قازاق ءۇشىن قاسيەتتى دە قاستەرلى ۇعىمدار. ءار ادام وسى قاعيداتتى ەشقاشان ەسىنەن شىعارماۋى كەرەك.
ابزال جانداردىڭ يگى ىستەرى جاس ۇرپاققا ۇلگى بولىپ, ولاردى ءبىلىم مەن ىزدەنىسكە تارتىپ, ەلى مەن جەرىن سۇيۋگە تاربيەلەۋگە ۇلەس قوسارى ءسوزسىز. بۇل اسەرلى كەزدەسۋگە قاتىسقان جاستاردىڭ جۇزدەرىنەن انىق ءبىلىنىپ تۇردى.
جايىق بەتىندەگى جۇلدىزدى ءتۇن
«مەنىڭ قازاقستانىم!» ۇرانىمەن ۇيىمداستىرىلعان پاتريوتتار فورۋمى شەڭبەرىندەگى شارانىڭ سوڭعىسى كەشقۇرىم سۋ بەتىندە موتورلى قايىقتاردىڭ ءتۇرلى كورىنىس كورسەتكەن «لازەرلىك شوۋىنا» جالعاستى.
كەيىن, قولدارىنا كوك تۋدى جەلبىرەتىپ ۇستاعان شەرۋشىلەر سۋ بەتىندە سالتاناتپەن ءجۇرىپ ءوتتى. جايىق وزەنىنىڭ بالىقشى مەن جۇمىسكەر كەنتتەرىن ءبىر-بىرىنە جالعايتىن, اۆتوموبيل كوپىرىنىڭ تۇسىنان باستاۋىن العان شەرۋشىلەر تۇرعىن ءۇي قالاشىعى تۇسىنداعى اۆتوكوپىرگە كەلىپ اياقتالدى.
ءبىر ءسات داريانىڭ بەتى بەينە ساحناعا اينالۋى كەشتى تاماشالاۋعا كەلگەن كورەرمەندەردىڭ كوكىرەگىنە وتانشىلدىق سەزىمىن ۇيالاتتى. اتىراۋ ءوڭىرىنىڭ ونەرپازدارى مەن ەلىمىزدىڭ ەستراداسى جۇلدىزدارىنىڭ قاتىسۋىمەن كونتسەرت بەرىلدى. بۇلاردىڭ بارىنە دە ەگەمەندىگىمىز بەن تاۋەلسىزدىگىمىزدى تانىتاتىن, سونىڭ باستى ايشىقتارى بولىپ تابىلاتىن مەملەكەتتىك رامىزدەرىمىز ارقاۋ ەتىلدى.
اسىرەسە, سۋدىڭ بەتىنە ءتۇسىرىلىپ, سان الۋان قۇبىلعان رەڭگكە بولەگەن ءتۇرلى-ءتۇستى جارىقتار, لازەرلەر «قازاقستان, العا, بيىكتەرگە سامعا!», «مەنىڭ قازاقستانىم – مەنىڭ وتانىم!», «جاساي بەر, قازاقستان!», «مەملەكەتتىك رامىزدەر – ماقتانىشىم!» بولىپ, ايدىن توسىنە جازىلدى. وتانشىلدىق سەزىمگە بولەگەن سوزدەر كورەرمەندەردى رۋحتاندىرىپ, ماقتانىش سەزىمىنە بولەپ, مەرەيلەندىردى.
شارانىڭ سوڭى وزەن بەتىنەن ساۋلەلەنىپ كورىنگەن مەرەكەلىك وتشاشۋمەن مارەسىنە جەتتى.
نۇرگۇل ناسىر
