ەسىلدىڭ سول جاعالاۋىندا كازكوممەرتسبانك بانكىنىڭ زاڭدى تۇلعالارعا ارنالعان جاڭا بولىمشەسى اشىلدى. بۇل بولىمشە جاقىندا عانا اۋىسقان QAZKOM اتاۋىمەن كليەنتتەرگە ساپالى جانە قاراپايىم قىزمەت ءتۇرىن ۇسىنباقشى. اشىلۋ سالتاناتىنا بانكتىڭ باسقارما توراعاسى مارك حولتسمان قاتىستى.
ەستەرىڭىزدە بولسا, 21 قازاندا تانىمال قارجى ينستيتۋتى ءوز اتاۋىن لاتىن الىپبيىنە كوشىرىپ, QAZKOM دەپ وزگەرتىپ, قازاقستاندىقتاردى قۋانتقان بولاتىن. ەندى, مىنە, بانك باسشىلىعىنىڭ مامىردا جاريالانعان جاڭا ستراتەگياسىنا سايكەس بانك استانانىڭ سول جاعالاۋىنان جاڭا بولىمشەنىڭ تۇساۋىن كەستى.
– ءبىز ەندى بولشەك ساۋدا جانە شاعىن جانە ورتا بيزنەس كليەنتتەرىنىڭ كوڭىلىنەن شىعۋ ءۇشىن بارىمىزدى جاسايمىز. ولارعا ساپالى ءارى جىلدام قىزمەت كورسەتۋ ءبىز ءۇشىن اسا ماڭىزدى. استانانىڭ حالقى كۇننەن-كۇنگە كوبەيۋدە, سول سەبەپتى كەيدە بانك بولىمشەسىندە ۇزىن-سونار كەزەكتەر بولىپ جاتادى. مىنە, وسى ماسەلەنىڭ الدىن الۋ ءۇشىن ءبىز زاماناۋي تەحنيكامەن جابدىقتالعان بىرنەشە بولىمشەلەردى اشۋدى كوزدەپ وتىرمىز. كاسىپكەرلەرگە ارنالعان بۇل بولىمشە تۇتىنۋشىلاردىڭ بارلىق مۇددەسىن ەسكەرە وتىرىپ, قاجەتتىلىكتەرىنە جاۋاپ بەرەتىنىنە سەنىمدىمىن, – دەدى ءوز سوزىندە QAZKOM باسقارماسىنىڭ توراعاسى مارك حولتسمان.
قابانباي باتىر كوشەسى, 32 مەكەنجايدا اشىلعان بولىمشەنىڭ قىزمەت كورسەتۋ الاڭى كەڭ ءارى تەحنولوگيالىق جانە زاماناۋي سەرۆيستىك ستاندارتتارعا جاۋاپ بەرەدى. اسىرەسە, «ۆيدەوبانكينگ» قىزمەتى كوڭىلدەن شىقتى. ونىڭ كومەگىمەن بانكتىڭ كەز-كەلگەن قىزمەت ءتۇرىن پايدالانۋعا بولادى. كەزەكتە تۇرماي-اق, ونلاين ارقىلى كونسۋلتاتسيالىق كەڭەستەن باستاپ, اقشا اۋدارۋ, شوتتان قولما-قول اقشا الۋ سىندى ەلۋگە جۋىق قارجىلىق قىزمەتتەردى جۇزەگە اسىرۋعا بولادى. اۆتوماتتى كاسسالار ارقىلى ارنايى كابينانىڭ ىشىندە كاسسيردىڭ قاتىسۋىنسىز-اق قارجىڭىزدى قولما-قول شەشىپ الۋعا دا مۇمكىندىك مول. يننوۆاتسيالىق جاڭاشىلدىقتى ەنگىزۋ ارقىلى تۇتىنۋشىلارعا وڭتايلى جاعداي جاسالعانى كوپتىڭ كوڭىلىنەن شىقتى.
380 شارشى مەتر جەردى الىپ جاتقان جاڭا بولىمشەدە 12 مەنەدجەر مەن 4 كاسسا جانە وزىنە-ءوزى قىزمەت كورسەتۋ كابيناسى جۇمىس ىستەيدى. ارينە, بانكومات پەن تولەم تەرمينالدارى دا قاراستىرىلعان.
«جاڭا فورماتتاعى مۇنداي بولىمشەنىڭ العاشقىسى 21 قازان كۇنى الماتى قالاسىندا اشىلعان بولاتىن. مىنە, استانالىقتار دا بانك جۇمىسىنداعى ساپالى وزگەرىستەرگە كۋا بولىپ وتىر. بۇل – ءبىزدىڭ تۇتىنۋشىلاردىڭ كوڭىلىنەن شىعاتىن قىزمەتتىڭ ماسشتابتى رەفورماسى. بانك اتاۋىنداعى Q ءارپىنىڭ وزگەرىسى كليەنتتەرىمىزگە موبيلدىلىكتى, قاراپايىمدىلىقتى, جىلدامدىقتى قامتاماسىز ەتەتىنىمىزدى, سونىمەن قاتار يننوۆاتسيالىق دامۋدىڭ جاڭا مۇمكىندىگىنە دەگەن تالپىنىسىمىزدى بىلدىرەدى. الداعى ۋاقىتتا بانك ەل بويىنشا ءوزىنىڭ 238 بولىمشەسىن وسىنداي جاڭا ۇلگىگە كوشىرۋدى كوزدەيدى» دەيدى اشىلۋ راسىمىندە ءسوز العان بانكتىڭ باسقارۋشى ديرەكتورى نۇرلان جاعىپاروۆ.
ونىڭ ايتۋىنشا, QAZKOM جىل باسىنان بەرى جالپى قۇنى 147 ملرد تەڭگەنى قۇرايتىن كاسىپكەرلەردىڭ جوباسىن قارجىلاندىرعان. تەك قىركۇيەك ايىنىڭ وزىندە 29 ملرد تەڭگە تۇتىنۋشىلارعا نەسيە رەتىندە ۇسىنىلدى. وسىلايشا, بانك قارجى نارىعىندا رەكوردتىق كورسەتكىشكە قول جەتكىزدى. ەلىمىزدە جانە ورتالىق ازيادا ەڭ تانىمال ءىرى بانكتەردىڭ ءبىرى – «كازكوممەرتسبانك» اق-نىڭ اكتيۆتەرى 30 ماۋسىمداعى جاعداي بويىنشا 4 893 ملرد تەڭگەنى قۇراپ وتىر.
گۇلميرا ايماعانبەت
