باس قالادا سۇلتانبەك ورىنباساروۆتى ەسكە الۋعا ارنالعان بوچچادان اشىق رەسپۋبليكالىق ءتۋرنيردىڭ بايراعى كوتەرىلدى. قازاقستاننىڭ 8 وڭىرىنەن كەلگەن پاراسپورتشىلار «اسپان» سپورت كەشەنىندە باق سىناۋدا.
مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى ەربول مىرزابوسىنوۆتىڭ ايتۋىنشا, ەلىمىزدە 200-دەن استام پاراسپورتشى بوچچامەن اينالىسادى.
– بيىل 13 سپورتشى ۇلتتىق پاراليمپيادالىق قۇراماعا قابىلداندى. ءبىزدىڭ قۇراما پاراازيالىق ويىندارعا قاتىستى, بۇل – ۇلكەن جەتىستىك. مينيسترلىك تاراپىنان ەلىمىزدە وسى سپورت ءتۇرىن دامىتۋعا جان-جاقتى قولداۋ كورسەتىلەدى, – دەدى اشىلۋ سالتاناتى كەزىندە كوميتەت توراعاسى.
استانا قالاسى دەنە شىنىقتىرۋ جانە سپورت باسقارماسىنىڭ باسشىسى ۆاسيلي لەۆيت بوچچا سپورتى مۇمكىندىگى شەكتەۋلى بالالاردىڭ قيىندىقتى جەڭۋگە ىنتالاندىراتىنىن اتاپ ءوتتى.
قازاقستان بوچچا فەدەراتسياسىنىڭ باس حاتشىسى نۇرگۇل ۇلجەكوۆانىڭ ايتۋىنشا, قازاقستاندا بوچچا سپورتىن قالىپتاستىرۋعا سۇلتانبەك ورىنباساروۆ ۇلكەن ۇلەس قوسقان, سوندىقتان بۇل تۋرنير جاتتىقتىرۋشىنىڭ ەڭبەگىنە قۇرمەت رەتىندە ۇيىمداستىرىلعان.
بوچچا – بۇل تىرەك-قيمىلى قاتتى زاقىمدانعان ادامدار ءۇشىن پاراليمپيالىق سپورت ءتۇرى سانالاتىن دوپ ويىنى. تۋرنير 6 ناۋرىزعا دەيىن جالعاسادى.
