مەملەكەتتىك قىزمەت ىستەرى اگەنتتىگى استانا قالاسى بويىنشا دەپارتامەنتىنىڭ ۇيىمداستىرۋىمەن ەلوردادا «مەملەكەتتىك قىزمەتتەگى ايەلدەردىڭ ءرولى» تاقىرىبىندا دوڭگەلەك ۇستەل ءوتتى.
مەملەكەتتىك قىزمەتتە ايەلدەر ەرلەرمەن تەڭ مانساپ قۇرا الا ما؟ قىزمەتكە قابىلداۋ جانە جۇمىستان شىعارۋ كەزىندە ولاردىڭ قۇقىعى ساقتالا ما؟ جالپى مەملەكەتتىك قىزمەت جۇيەسىندەگى ايەلدەردىڭ ءرولى قانداي؟ مەملەكەتتىك قىزمەت ىستەرى اگەنتتىگى ۇيىمداستىرعان ديالوگ الاڭىندا بىرقاتار ساراپشى وسى ماسەلەلەردى تالقىلادى. جيىن ماقساتى – مەملەكەتتىك اپپاراتتا قىزمەت اتقاراتىن نازىك جانداردىڭ قۇقىقتىق جاعدايىن ايقىنداۋ, كاسىبي داعدىلارىن دامىتۋ, مەملەكەتتىك قىزمەتتە ءوزارا قارىم-قاتىناستىڭ جوعارى مادەنيەتىن قالىپتاستىرۋ.
دوڭگەلەك ۇستەلگە مەملەكەتتىك قىزمەت ىستەرى اگەنتتىگى استانا قالاسى بويىنشا دەپارتامەنتىنىڭ باسشىسى ماقسات مۋسين, استانا قالاسى اكىمدىگى جانىنداعى ايەلدەر ىستەرى جانە وتباسى-دەموگرافيا ساياساتى جونىندەگى كوميسسيا ورىنباسارى نازگۇل ماقجان, استانا قالاسى پوليتسيا دەپارتامەنتى يميدجدىك جۇمىس جانە ىشكى كوممۋنيكاتسيا ءبولىمىنىڭ باستىعى, پوليتسيا پودپولكوۆنيگى گۇلميرا شراحمەتوۆا جانە قالالىق ايەلدەر ىستەرى جانە وتباسى-دەموگرافيا ساياساتى جونىندەگى كوميسسيا مۇشەسى ليمانا قويشيەۆا جانە استانالىق مەملەكەتتىك قىزمەتشىلەر قاتىستى.
«قازىر مەملەكەتتىك قىزمەتتە جۇرگەن ايەلدەر بىلىكتى جانە تاجىريبەلى كاسىبي مامان رەتىندە وزگەلەرگە ۇلگى بولا وتىرىپ, ولاردى ىلگەرىلەتۋگە ۇلەسىن قوسۋى كەرەك. وكىنىشكە قاراي, بۇگىندە ادال, ءادىل مەملەكەتشىلدىك بەينەگە دەگەن سەنىم ازايعان جانە بۇل نەگىزسىز ەمەس. سوندىقتان ءبىز ءاربىر مەملەكەتتىك قىزمەتشىنىڭ جانە تۇتاستاي العاندا مەملەكەتتىك قىزمەتتىڭ يميدجىنە تەرىس ىقپال ەتەتىن بارلىق جاعىمسىز جاعدايدى بولدىرماۋ باعىتىندا جۇمىس ىستەۋىمىز كەرەك. بۇل پرەزيدەنتتىڭ باستاماسىمەن ايتىلعان ساياسي رەفورمالاردى جۇزەگە اسىرۋعا ىقپال ەتەدى» دەدى ءوز سوزىندە مەملەكەتتىك قىزمەت ىستەرى اگەنتتىگى استانا قالاسى بويىنشا دەپارتامەنتىنىڭ باس مامانى ابدىقاحار سلامقۇل.
