ەلوردانىڭ 20 جىلدىق مەرەيتويىنا وراي, «استانا قالاسىنىڭ بوتانيكالىق باعىن جاساۋ جانە دامىتۋ بولاشاعى. تەوريا جانە تاجىريبە» تاقىرىبىندا دوڭگەلەك ۇستەل ءوتتى.
جيىنعا استانا اكىمىنىڭ ورىنباسارى قوسمان ايتمۇحامبەتوۆ, ءبىلىم جانە عىلىم ۆيتسە-ءمينيسترى بيبىگۇل اسىلوۆا, قازاتۋ رەكتورى اقىلبەك كۇرىشباەۆ, مەملەكەتتىك ۇيىمدار وكىلدەرى, گەرمانيا, فرانتسيا, يتاليا, رەسەي, بەلارۋس رەسپۋبليكاسى, ۋكراينا جانە قازاقستاننىڭ بوتانيكالىق باق باسشىلارى مەن ساراپشىلارى, سونداي-اق الىس-جاقىن شەت ەلدەردەن بوتانيكالىق الۋاندىلىقتى ساقتاۋ سالاسىنداعى تانىمال عالىمدار, «استانا-كوگالداندىرۋ قۇرىلىسى» اق وكىلدەرى قاتىستى.
قالا تۇرعىندارى ءۇشىن بوس ۋاقىتتى, مادەني جانە سپورتتىق ءىس-شارالاردى وتكىزۋ ءۇشىن جانە ينفراقۇرىلىمدى جاقسارتۋ ماقساتىندا قابانباي باتىر داڭعىلى مەن تۇركىستان, ورىنبور, بۇقار جىراۋ كوشەلەرىنىڭ اۋماعىنداعى بوتانيكالىق باق جۇمىستارىنىڭ اياقتالۋىنا بايلانىستى وتكىزىلگەن دوڭگەلەك ۇستەل بارىسىندا كۇرت كونتينەنتالدى كليمات جاعدايىندا استاناداعى بوتانيكالىق باقتىڭ قۇرىلۋىنىڭ جانە بولاشاعىن دامىتۋدىڭ وزەكتى ماسەلەلەرى تالقىلاندى.
ءوز سوزىندە قوسمان ايتمۇحامبەتوۆ ەلوردانىڭ بوتانيكالىق باعىنىڭ ەرەكشەلىگىن اتاپ ءوتتى. ونداعى جاساندى توعان جاز مەزگىلىندە كەلۋشىلەردى تاڭعاجايىپ سۋبۇرقاقپەن, ال قىستا مۇز ايدىنىمەن قۋانتپاق. جوبادا گۇلدى وزەندەر, قاراعاي جانە شىرشا قاراعاي ورماندارى, جەمىس باقشالارى, شاحمات تۇردەگى باقشا, لابيرينت تارىزدەس دوستىق باقشاسى دا قاراستىرىلعان. عىلىمي اۋماق ءۇشىن 17,7 گەكتار بولىنگەن بوتانيكالىق باق نەگىزىندە وسىمدىكتەردى ەنگىزۋ, ءوسىرۋ, كوبەيتۋ جانە ءتيىمدى قورعاۋ بويىنشا عىلىمي-زەرتتەۋ جۇمىستارى جۇرگىزىلمەك. ۆيتسە-مينيستر بيبىگۇل اسىلوۆا شاھارداعى بوتانيكالىق باقتىڭ پايدا بولۋ ماڭىزدىلىعىنا توقتالسا, قازاتۋ رەكتورى اقىلبەك كۇرىشباەۆ ەلورداداعى بوتانيكالىق باقتىڭ اشىلۋى ۋنيۆەرسيتەت عالىمدارىنا حرونوبيولوگيالىق وزگەرىستەرگە, جالپى ونىمدىلىك جاعدايىنا, اعاشتار داقىلدارىنىڭ بيولوگيالىق تۇراقتىلىعى مەن ولاردىڭ توپىراق-قورعانىشتىق جانە رەكرەاتسيالىق رولىنە عىلىمي زەرتتەۋلەر جاساۋعا جول اشاتىنىن جەتكىزدى. «ءبىز ءۇشىن بوتانيكالىق ساياباقتاعى باعالى وسىمدىك گەنوفوندىنىڭ پايدا بولۋى جانە ساقتالۋىن عىلىمي ورتالىقتىڭ زەرتحانالارىندا مولەكۋلالىق بيولوگيا جانە گەندىك ينجەنەريا ادىستەرىن قولدانۋ ارقىلى زەرتتەۋ ماڭىزدى ماسەلە» دەدى ول. ال ءوز كەزەگىندە بوتانيكا جانە فيتوينترودۋكتسيا ينستيتۋتىنىڭ باس ديرەكتورى گۇلنار سيتپاەۆا بوتانيكالىق باقتى دامىتۋدىڭ كەلەشەگى, ەلوردانىڭ ساياباق جۇمىستارىنا الەمدىك بوتانيكالىق باقتاردىڭ قاتىسۋى, بىرلەسكەن جوبالار مەن عىلىمي زەرتتەۋلەردى جۇزەگە اسىرۋ تۋرالى باياندادى. سونىمەن قاتار جيىنعا قاتىسۋشىلار گەرمانيا, يتاليا, فرانتسيا, رەسەي جانە قازاقستان ساراپشىلارىنىڭ باياندامالارىنا دا قۇلاق ءتۇردى. جيىن سوڭىندا بوتانيكالىق باقتىڭ ودان ءارى دامۋىنىڭ كەلەشەگى مەن جاڭا باعىتتارىن ايقىنداۋ جونىندە ارنايى قارار قابىلداندى.
