«رۋحاني جاڭعىرۋ» اياسىندا ەلوردانىڭ 20 جىلدىعىنا وراي, استانا قالاسى «قازاق كۇرەسى» فەدەراتسياسىنىڭ قولداۋىمەن س.ماۋلەنوۆ اتىنداعى №37 مەكتەپتە 2005-2010 جىلعى جاسوسپىرىمدەر اراسىندا قازاق كۇرەسىنەن «كوك ءبورى» رەسپۋبليكالىق اشىق بىرىنشىلىگى ءوتتى.
بايراقتى باسەكەدە ەلوردانىڭ مەكتەپ وقۋشىلارىمەن قاتار اقمولا وبلىسىنان, سەمەي, ورال قالالارىنان كەلگەن 150-گە جۋىق جاس بالۋان باق سىنادى. جارىس قورىتىندىسى بويىنشا 2005-2007 جىلعىلار اراسىنداعى بەلدەسۋدە 50-دەن جوعارى سالماق دارەجەسى بويىنشا استانانىڭ نامىسىن قورعاعان №37 مەكتەپ وقۋشىسى رينات احمەت پەن №65 مەكتەپ وقۋشىسى اڭسار مامبەكوۆ ءۇشىنشى ورىندى, №64 مەكتەپ وقۋشىسى التىنحان ايتۋعان ەكىنشى ورىندى ەنشىلەسە, سەمەيلىك ازيم قۇرايىسوۆ ءبىرىنشى ورىندى قانجىعالاپ, «التىننان» القا تاقتى. ال 38 كەلى سالماق دارەجەسى بويىنشا اقتىق سىندا اقمولا وبلىسىنىڭ سپورتشىسى كەنجەبولات تالعاتتان باسىم تۇسكەن استانالىق ەرالى جاقسىلىقوۆ ءبىرىنشى ورىنعا يە بولىپ, «كوك ءبورى» اتاندى. سونداي-اق 2008-2010 جىلعىلار اراسىنداعى باسەكەدە جانداۋلەت وماش, ازامات قامباي, نۇرمۇباراك جاقسىلىقوۆتار جۇلدەگەر اتاندى. جەڭىمپازدار مەن جۇلدەگەرلەر ديپلومدارمەن, مەدالدارمەن جانە ارنايى سىيلىقتارمەن ماراپاتتالدى.
– «كوك ءبورى» ۇعىمى كوپشىلىككە ايتپاسا دا تۇسىنىكتى دەپ ويلايمىن. ويتكەنى قازاق قاسقىر مىنەزدى حالىق قوي. جالپى, قازىر دە باتىرلاردى كوك بورىگە تەلىپ جاتادى. سوندىقتان وسى جارىستى وتكىزۋدەگى, ونى «كوك ءبورى» دەپ اتاۋداعى ماقساتىمىز – «تاربيە – تال بەسىكتەن» دەگەندەي, مەكتەپ جاسىنداعى بالالاردى ۇلتتىق يدەولوگيا نەگىزىندە باتىرلىققا تاربيەلەپ, از دا بولسا قاسقىردىڭ قايسارلىعىن بويلارىنا ءسىڭىرۋ بولدى, – دەيدى جارىستى ۇيىمداستىرۋشى, قازاق كۇرەسىنەن بالالار جاتتىقتىرۋشىسى قايرات تۇرعانجانتەگى.
اتاۋى تاماشا ەكەن. كوك ءبورىنىڭ ۇرپاعىمىن دەيتىن نامىستى ۇلدارىمىز كوپ بولسىن.