برازيلياداعى الەم بىرىنشىلىگىندە كۇن وتكەن سايىن قىزىققا تولى ۋاقيعالار ورىن الۋدا. العاشقى ويىنداعى ءتورت گول مەن تورەشىنىڭ قاتەلىگى تۋرالى ايتقانبىز. بىراق ودان كەيىنگى كەزدەسۋلەردە دە قازىلاردىڭ قاتە شەشىم قابىلداعانىنا كۋا بولدىق.
«ا» توبىنداعى ەكىنشى كەزدەسۋ مەكسيكا مەن كامەرۋن اراسىندا ءوتتى. العاشقىلارى ويىندى باسىنان اياعىنا دەيىن باسقارىپ, قارا قۇرلىقتان كەلگەن فۋتبولشىلاردىڭ ادىمىن اشتىرمادى. ءبىرىنشى تايمنىڭ وزىندە دجوۆانني دوس سانتوس ەكى گول سوقسا دا, باس تورەشى ونى ەسەپكە الماي تاستادى. كامەرۋن قۇراماسى ءالسىن-ءالسىن ءتارتىپ بۇزىپ, ويىننىڭ ءمانىن كەتىرۋمەن بولدى. دەگەنمەن كەزدەسۋدىڭ 61-مينۋتىندا پەرالتا سوققان جالعىز دوپ مەكسيكا قۇراماسىنا ءۇش ۇپاي اكەلدى. ەندى ولار كەلەسى تۋردا تۋرنير قوجايىندارىنا قارسى ويناسا, ۇپايسىز كامەرۋن جانە حورۆاتيا ءوزارا كۇش سىناسادى.
«ۆ» توبىنداعى تارتىس الەم چەمپيوندارىنىڭ تاس-تالقان بولۋىمەن باستالدى. وار-دا وتكەن الەم بىرىنشىلىگىندە سوڭعى رەت گوللانديامەن ويناعان يسپانيا قۇراماسىنىڭ برازيلياداعى العاشقى قارسىلاسى دا «قىزعالداقتار ەلى» بولدى. بىراق بۇل جولى لۋي ۆان گالدىڭ فۋتبولشىلارى جەڭىمپاز اتاندى.
ويىننىڭ 27-مينۋتىندا شابي الونسو پەنالتيدەن گول سوعىپ, يسپانداردى العا شىعارعان. ءبىرىنشى تايمنىڭ سوڭىنا قاراي روبي ۆان پەرسي كاسيلياستىڭ قاتەلىگىن پايدالانىپ, ەسەپتى تەڭەستىرىپ كەتتى. ارتىنشا روببەن مەن دە ۆرەي 53, 65 مينۋتتاردا ءبىر-بىردەن گول سوعىپ, يسپانيانىڭ جاعدايىن مۇلدە قيىنداتىپ جىبەردى. ۆيسەنتە دەل بوسكە الاڭعا جاڭا ويىنشىلارىن جىبەرسە دە, ولار ويىن ىرعاعىن ەش وزگەرتە العان جوق. كەيىن روبي ۆان پەرسي مەن ارەن روببەن ەكىنشى رەت قانجىعالارىن مايلاپ ۇلگەردى. قىسقاسى, يسپانيا قۇراماسى 1-5 ەسەبىمەن تاس-تالقان ۇتىلىپ, ءوز تاريحىنا داق قالدىردى. بۇعان كوماندا كاپيتانى يكەر كاسيلياستىڭ سالاق ويىنى كەسىر بولدى دەسەك, قاتەلەسپەگەن بولار ەدىك.
وسى توپتىڭ العاشقى تۋرىنداعى ەكىنشى كەزدەسۋ چيلي مەن اۆستراليا اراسىندا ءوتتى. ازيا جانە مۇحيت ايماعىنان كەلگەن قۇراما ويىننىڭ العاشقى بولىگىندە قارسىلاستارى سوققان ەكى گولعا ءبىر دوپپەن جاۋاپ بەرىپ, ەكىنشى تايمدا وراسان كۇشپەن العا ۇمتىلدى. كەزدەسۋدىڭ نەگىزگى ۋاقىتى اياقتالىپ, قوسىمشا مينۋتتار سىرعىپ جاتقاندا وڭتۇستىكامەريكالىقتار قارسىلاستار قاقپاسىنا تاعى ءبىر گول سوعىپ, اۆستراليانىڭ ءبىر ۇپاي جولىنداعى ءۇمىتىن ءۇزىپ تاستادى. بۇل ويىندا چيلي ساپىنان سانچەس, ۆالديۆيا, بوسەجۋر دەگەن جىگىتتەر كوزگە تۇسسە, ولارعا كەحيلل عانا جاۋاپ بەرە الدى.
«س» توبىنىڭ العاشقى ماتچىندا كولۋمبيا فۋتبولشىلارى گرەكيا قۇراماسىن 3-0 ەسەبىمەن جەڭىپ, فالكاوسىز دا دوپ تەبە الاتىندارىن دالەلدەدى. بىراق ويىن بارىسىنا قاراپ وتىرىپ گرەكتەردىڭ جاي عانا جولى بولماعانىن اڭعارۋعا بولادى. بەسىنشى مينۋتتا سوعىلعان ارمەرونىڭ گولىن 58-مينۋتتا گۋتەررەس ەسەلەدى. ال كەزدەسۋدىڭ 93-مينۋتىندا دجەيمس رودريگەس كولۋمبيا-گرەكيا اراسىنداعى ماتچقا نۇكتە قويدى.
وسى توپتاعى ەكىنشى كەزدەسۋ كوت د’يۆۋار جانە جاپونيا قۇرامالارىنىڭ اراسىندا ءوتتى. نەگىزى, وسى ءبىر توپتاعى ءتورت قۇرامانىڭ دارەجەلەرى تەڭ سانالعان. گرەكيانىڭ ءساتسىز ويىنىن ەسەپكە الماعاندا افريكالىقتار مەن ازيالىقتاردىڭ كەزدەسۋى كوپشىلىك كۇتكەندەي تارتىسقا تولى بولدى. ءبىرىنشى تايمنىڭ 17-مينۋتىندا جاپونيا ساپىنان كەيسۋكە حوندا گول سوعىپ, قارا جىگىتتەردىڭ ساعىن سىندىرعانداي بولدى. بىراق ويىننىڭ ەكىنشى بولىگىندە نەبارى ەكى مينۋت ىشىندە بوني مەن جەرۆينو ءبىر-بىردەن جاپوندار قاقپاسىن ءدال كوزدەپ, تارازى باسىن وزدەرىنە اۋداردى. كەزەك-كەزەك شابۋىلدارمەن جالعاسقان كەزدەسۋدە وسىدان كەيىن ەشقانداي گولعا كۋا بولمادىق.
«D» توبىنىڭ العاشقى كەزدەسۋىندە سەنساتسيا تىركەلدى. «ءولىم توبىنا» ءتۇسىپ, «ءومىر سۇرۋدەن قالدى» دەگەن كوستا-ريكا الەمنىڭ ەكى دۇركىن چەمپيوندارى سانالاتىن ۋرۋگۆاي قۇراماسىن 3-1 ەسەبىمەن تىزە بۇكتىردى.
كەزدەسۋدىڭ 24-مينۋتىندا ەدينسون كاۆاني ون مەترلىك ايىپ دوبىنان ءمۇلت كەتپەي, ءوز قۇراماسىن العا شىعارعان. بىراق قارسىلاستار دا قاراپ قالماي, فەرناندو مۋسلەرا قورعاعان قاقپانىڭ ماڭىن تورۋىلداۋدان ەش تانعان ەمەس. ەكىنشى تايمدا كەمپبەلل ەسەپتى تەڭەستىردى. ارادا ءۇش مينۋت وتكەن سوڭ, ياعني, 57-مينۋتتا دۋارتە كوستاريكالىقتاردى العا شىعاردى. ويىن سوڭىنداعى الما-كەزەك شابۋىلداردىڭ بىرىندە الاڭعا جاڭا شىققان ۋرەنيا ءۇشىنشى گولدى سوعىپ, ۋرۋگۆايلىقتاردىڭ ءۇمىتىن ءبىرجولا ۇگىتىپ تاستادى. وسىلايشا وتكەن بىرىنشىلىكتىڭ جارتىلاي فينالىنا دەيىن جەتكەن وڭتۇستىكامەريكالىق فۋتبولشىلاردىڭ توپتان شىعا الماي قالۋ قاۋپى ارتا ءتۇستى. سونىمەن قاتار, بۇل ويىندا بيىلعى بىرىنشىلىكتىڭ العاشقى قىزىل قاعازى كورسەتىلدى. ونىڭ يەسى – ماكسي پەرەيرا.
ال, انگليا-يتاليا اراسىندا وتكەن كەزدەسۋدى كورگەن دە ارماندا, كورمەگەن دە ارماندا. بۇلاي دەۋدىڭ ءوز سەبەبى بار. قوس قۇراما دا كۇللى الەمگە ەۋروپالىق ويىن مانەرىن پاش ەتتى. «ءبىر جاعادان باس, ءبىر جەڭنەن قول شىعارۋدىڭ» دا وزىق ۇلگىسىن كورسەتتى بۇلار. قورعانىس, الاڭ ورتاسى, شابۋىل دەپ ءبولىپ-جارماي, بارلىعى بىردەي ۇيىمداسا تەر توكتى.
ءبىر-بىرىنەن ەش كەم تۇسپەيتىن كوماندالاردىڭ تەڭ دارەجەدەگى ويىنىنا قاراپ سۇيسىندىك. تاڭداي قاقتىق. ەگدە تارتقانىنا قاراماستان پيرلونىڭ جاس جىگىتشە قيمىلداۋى, ءالى تولىسىپ بولماسا دا ستەرلينگتىڭ تاجىريبەلى ويىنشىلارداي ويقاستاۋى – ءبارى-ءبارى جانكۇيەرلەرگە كەرەمەت كۇي سىيلادى.
35-مينۋت. كاندرەۆا بۇرىشتان جەتكەن دوپتى كىدىرتپەستەن اندرەا پيرلوعا اسىردى. ال «يۋۆەنتۋستىڭ» جارتىلاي قورعاۋشىسى پاستى ءوزى قابىلداماي, ءوزىنىڭ ەكى اياعىنىڭ اراسىنان ماركيزيوعا وتكىزە سالدى. بۇل 2002 جىلعى برازيليا مەن گەرمانيا اراسىنداعى فينالدىق ويىندى ەسكە سالدى. ون ءتورت جىل بۇرىن ريۆالدو دا وزىنە جەتكەن دوپتى ءدال وسىلاي وتكىزىپ جىبەرىپ, ناتيجەسىندە, ايگىلى رونالدو كان قورعاعان قاقپانى ءدال كوزدەگەن بولاتىن. بۇل جولى كلاۋديو ماركيزيو دا دجو حارتتان ايلاسىن اسىرىپ كەتتى. بىراق, كوپ ۇزاماي, ەكى مينۋتتان سوڭ اعىلشىنداردىڭ سول جاق قاپتالدان باستالعان شابۋىلى ءرۋنيدىڭ ستارريدجگە ادەمى پاس بەرۋىمەن جانە شابۋىلشىنىڭ ءمۇلت كەتپەۋىمەن جالعاستى. وسىلايشا تەڭ ەسەپپەن, قۇرامالار ۇزىلىسكە شىقتى. ال ويىننىڭ ەكىنشى جارتىسىندا كاندرەۆا تاعى دا انگليانىڭ ايىپ الاڭىندا جۇرگەن بالوتەلليگە اۋەلەتە پاس بەرىپ, «سۋپەر ماريونىڭ» گول سوعۋىنا جاعداي جاسادى. بۇل 50 مينۋت ەدى. كەيىن قوس قۇراما قولدارىنان كەلگەن بار مۇمكىندىكتى پايدالانىپ قالۋعا تىرىسقانىمەن, ەسەپ وزگەرمەدى.
سونداي-اق, «ە» توبىنداعى شۆەيتساريا-ەكۆادور جانە فرانتسيا-گوندۋراس كەزدەسۋلەرى ءوتتى. قوس ويىندا دا ەۋروپالىقتاردىڭ مەرەيى ۇستەم بولعانىن ايتا كەتۋ كەرەك. شۆەيتساريا 0:1 ەسەبىمەن ۇتىلىپ جاتىپ, باپكەردىڭ كورەگەندىگى ارقاسىندا جەڭىستى جۇلىپ اكەتتى. وتتمار حيتتسفەلدتىڭ ەكىنشى تايمدا الاڭعا جىبەرگەن ەكى فۋتبولشىسى ءبىر-بىردەن گول سوعىپ, ءۇش ۇپايعا قول جەتكىزگەن. ال فرانتسيا گوندۋراسپەن تارتىسقا ءتۇسىپ, قارسىلاستارىن 3:0 ەسەبىمەن تاس-تالقان ەتتى. ويىننىڭ ءبىرىنشى بولىگىندە-اق گوندۋراس قۇراماسىنىڭ قاقپاسىنا پەنالتي بەلگىلەنىپ, ەكىنشى سارى قاعاز العان فۋتبولشىسى الاڭنان قۋىلدى. كارىم بەنزەما 11 مەترلىك ايىپ سوققىسىن ءدال ورىنداعاننان كەيىن 48-مينۋتتا وسى الەم بىرىنشىلىگىندەگى ەكىنشى اۆتوگول سوعىلدى. ونىڭ اۆتورى – گوندۋراس قاقپاشىسى ۆاليادارەس. 72-مينۋتتا بەنزەما تاعى ءبىر گول سوعىپ, وسى تۋرنيردەگى دۋبل جاساعان ۇشتىكتىڭ سوڭىنا ىلەستى.
«F» توبىنداعى ارگەنتينا مەن بوسنيا-گەرتسەگوۆينا اراسىنداعى ماتچ تا وينالدى. بۇل ويىندا الەم چەمپيوناتىنىڭ دەبيۋتانتى سانالاتىن ەۋروپالىق كوماندانىڭ فۋتبولشىلارى ەكى گول سوعىپ, وڭتۇستىكامەريكالىقتار ءبىر عانا دوپپەن كوزگە ءتۇستى. بىراق جەڭىس مارادونانىڭ ءىزباسارلارىندا كەتتى. كولاشيناتس كەزدەسۋ باستالماي جاتىپ ءوز قاقپاسىنا ابايسىزدا گول ۇرىپ العان سوڭ, 65-مينۋتتا لەو مەسسي ارگەنتينانى 2:0 ەسەبىمەن العا شىعارعان. ويىن سوڭىندا يبيشەۆيچ ءبىر گول سوعىپ, ءوز قۇراماسىنا ءۇمىت سىيلاعانداي بولدى. الايدا, ەسەپ وزگەرمەدى.
وسى توپتىڭ ەكىنشى ويىنى وتكەن تۇندە يران-نيگەريا اراسىندا ءوتتى. سونىمەن قاتار, «G» توبىنداعى گەرمانيا-پورتۋگاليا, گانا-اقش جۇپتارى دا العاشقى كەزدەسۋلەرىن وتكىزدى. ولار تۋرالى گازەتىمىزدىڭ كەلەسى نومىرىندە جاريالاماقپىز.
نۇريسلام قۇسپانعالي
