«استانا ارەنا» ستاديونىندا بۇگىن تاريحي ويىن بولعالى تۇر. ۋەفا-نىڭ ەۋروپا ليگاسىندا ءتورتىنشى راۋندقا وتكەن استانالىق كوماندا پلەي-وفف ماتچىندا يسپانيانىڭ «ۆيليارەال» كومانداسىن قابىلدايدى.
كەشە قوس كوماندانىڭ باس باپكەرلەرى ماتچ الدىنداعى ءباسپاسوز ءماسليحاتىن وتكىزدى. «استانا» تىزگىنىن ۇستاعان بولگاريالىق ستانيمير ستويلوۆ كوماندانىڭ تارتىستى ماتچقا دايىن ەكەنىن ايتتى. «ارينە, بۇل جەكپە-جەكتە يسپانيالىق كوماندانىڭ فاۆوريت ەكەنىن جوققا شىعارا المايمىز. بىراق فۋتبولدىڭ اتى – فۋتبول. ءبىز وسىعان دەيىن شۆەتسيالىق ايك كومانداسىمەن ءوز الاڭىمىزدا تەڭ ويناعاندا, كوپشىلىك ستوكگولمدە ۇتىلامىز دەپ داۋرىققان ەدى عوي. ال ءبىز بولساق 3:0 ەسەبىمەن تىزە بۇكتىردىك. سوندىقتان جەڭۋگە شانس جوق ەمەس, بار. وسى ورايدا, اسىرەسە جانكۇيەرلەرىمىزگە سەنىممەن قارايمىز. بىزگە قىزۋ قولداۋ كورسەتەدى دەپ» دەپ تۇيىندەدى ءوز ءسوزىن استانالىق باپكەر.
ولاي بولسا, ءبىز دە ءوز تاراپىمىزدان كوماندامىزعا قولداۋ كورسەتەيىك دەگىمىز كەلەدى. ماتچ ساعات 21.00-دە باستالادى.
عالىم قوجابەكوۆ
